Таво арнас мойвиис волыны Псковӧ. Таӧдз сэні некор эг вӧвлы. Кывлі, Псков губернияын чужлӧмаӧсь нималана маршал, Сӧветскӧй Союзса кыкысь Герой Константин Рокоссовский да композитор Модест Мусоргский.
Нӧшта син водзӧ сувтӧ режиссёр Сергей Эйзенштейнлӧн 1938 вося «Александр Невский» фильм, кӧні петкӧдлӧма, кыдзи 1241 воын тайӧ карас ыджыдалӧны Ливон орденса рыцарьяс.
Санкт-Петербургсянь Псковӧдз «Ласточка» электричка лэбӧ 3,5 час. И со нин Псковса кӧрт туй вокзал. Ӧти луннад, дерт, уналаӧ он слӧймы волыны. Телефон пыр тӧдмалі, кутшӧм автобусӧн позьӧ веськавны кар шӧрас.
Недыр мысти нин вӧлі XII нэмся кремль дорын, кассаас ньӧби билет да пыри пытшкас. Ме кодь жӧ ветлысь-мунысьыс чукӧрмис морт дас. И со экскурсовод мӧдіс висьтавлыны, мыйсянь артмӧма Псковыс.
«Сира ва» вылын кар
Медводдзаысь тайӧ карсӧ казьтыштӧмаӧсь «Повесть временных лет» небӧгын 862 воын, кор татчӧ «Варягысь княжитны воӧмаӧсь Рюрик князьяс братияыскӧд».
Но археологъяс туялӧмаӧсь, мый Великая юӧ сылӧн Пскова вож усянінын городищеас йӧзыс овмӧдчылӧмаӧсь кык сюрс во сайын на, VI-VII нэмъясын.
Тайӧ муас сэки овлӧмаӧсь славяна (Псковса кривичьяс), Скандинавияысь варягъяс да чудь (эст да лив). Финн-йӧгра кывйысь пӧ и петӧмаӧсь Пскова, Пьсков, Плесков, Пльсков. Piskawa (лив ногӧн), pihkwa, piskwa (эстонскӧйӧн) – тайӧ «сира ва». Кодсюрӧ вӧзйӧ тайӧ карыслысь исто-риясӧ петкӧдлан мичаджык вежӧртас. Важ славяна ног пӧ Псковсӧ колӧ гӧгӧрвоны кыдз «мужичӧйлӧн вына да зумыд морӧс». А ӧд збыльысь, тайӧ карыс уна нэм дорйис миян страналысь Рытыв-Войвывсӧ.
Псковсянь 10 километр ылнаын эм Выбуты кар. Буретш сэні 903 воын паныдасьӧмаӧсь Игорь князь да Ольга. Княгиняыс и пуктӧма Псковлы подувсӧ. Гӧгӧрыс вӧлӧма некымын стен. Медводдзасӧ кыпӧдлӧмаӧсь карыскӧд тшӧтш. Паськалыштӧм бӧрын ковмӧма мӧд – Довмонт стен, коймӧднас 1375 воын кытшовтӧмаӧсь Шӧр карсӧ, а XVI нэмын лӧсьӧдӧмаӧсь нёльӧдӧс, Окольничӧй кар гӧгӧрыс.
Крепосьтас вӧлӧм 37 башня, 14 ворота, стеныс вӧлӧма 9,5 километр кузьта да 2,5 метр судта. Но кор XIV нэмын мӧдӧмаӧсь вӧдитчыны пушка-пищальӧн, стенъяссӧ кыпӧдӧмаӧсь 17 метрӧдз, а кызтасӧ содтӧмаӧсь 6 метрӧдз.
И талун карса уличаяс пӧлӧн да парк-аллеяын позьӧ казявны киссьӧм стен коляссӧ.
1266 восянь Псковӧн 33 во веськӧдлӧма Литваысь пышйӧм Довмонт князь. Троича храмын сійӧс пыртӧмаӧсь Тимофей нимӧн. Сылӧн веськӧдлӧм улын Псковса дружина пасьвартӧма Литваса 8 пӧв ыджыдджык войска, а сэсся вӧтлӧмаӧсь и немеч рыцарьясӧс. Довмонт дырйи псковса вузасьӧмаӧсь Нарвакӧд, Ригакӧд, Дерпткӧд, Полоцккӧд, а сёрӧнджык – Ганзейскӧй союзса каръяскӧд. Псковсянь нуӧмаӧсь дона ку, ма, сись, гос, шабді да уна мукӧдтор. Татчӧ вайӧмаӧсь зарни, эзысь, ыргӧн да мукӧд кӧрт, ситеч, дона из, вина, пергамент да с.в.
IX-XII нэмъясӧ Псков вӧлӧма Киевса Русьын, а сэсся вуджӧма Великӧй Новгород улӧ. Но Псков пыр нырччӧма асшӧрлунлань. 1137 воын нин тані веськӧдлӧма вече.
Сӧмын 1348 воын Новгород кырымалӧма Болотовскӧй сёрнитчӧм, мый серти Псков лоӧма вече республикаӧн, тані лӧсьӧдӧмаӧсь ас оланпасъяс.
Ливон война дырйи Псков водзсасьӧма Польшаысь Стефан Баторий корольлы паныд. Полякъяс жугӧдӧмаӧсь стенсӧ, но крепосьтас пырны абу сяммӧмаӧсь. 31-ысь вӧрӧгыс уськӧдчылӧма стенъяс вылас, но сы мындаысь жӧ бӧрыньтчылӧма. Псковсаяс асьныс 46-ысь уськӧдчылӧмаӧсь атакаӧ.
Кыдз шуӧны историкъяс, сӧмын тайӧ коссьыс колӧ муӧдз копыртчывны псковсалы.
33 во мысти Псков вылӧ уськӧдчӧма Швецияса Густав Адольф король, но и сійӧ воштӧма армиясӧ.
1116-1709 воясӧ Псков 123-ысь воюйтӧма суйӧрсайсакӧд. И некод абу вермӧма босьтны карсӧ. 1240 воын тевтонечьяс видлӧмаӧсь, но абу жӧ вермӧмаӧсь, кытчӧдз кутшӧмкӧ предатель абу восьтӧма воротасӧ.
XVI нэмын Псков мичлун да экономика боксянь Москва да Новгород бӧрын вӧлӧма коймӧдӧн.
XVIII нэмын Псков абу нин воюйтӧма, границаыс вешйӧма рытыввывлань да.
Сэки жӧ Екатерина II карыслы сетӧма выль герб. Сы вылын пӧ – лым барс. Но Псков гӧгӧрын татшӧм зверыс абу, а сідзкӧ, некод сійӧс абу аддзылӧма. Серпасалӧмаӧсь пон сяма, ыж гӧна скӧр пемӧсӧс. Тайӧ пӧ лым барс и эм…
XIX нэмын тані вӧлӧма 41 вичко, 3 манастыр, 35 велӧдчанін, 9 больнича, 55 завод-фабрика, 22 шабді склад.
Первой мирӧвӧй война дырйи меститчылӧма Войвыв фронтлӧн штаб. 1917 вося тулысын Псковын сар престолысь мынтӧдчӧма Россияса император Николай II.
Айму вӧсна Ыджыд тыш дырйи тані ёна лыйсьӧмаӧсь. Фашистӧс вӧтлӧм бӧрын дзонь кольӧма сӧмын 6 прӧчент стрӧйбаыс. Но странаса правительство тшӧктӧма бӧр ловзьӧдны Россияса 15 важся кар, на лыдын и Псков.
Талун карас вӧчӧны машинаяс, сӧвмӧ вурсян да сёян-юан производство. Тані куим вуз, кык театp, филаpмония, планетаpий, библиотекаяс, художественнӧй музей да картинаа галерея.
Вежа Троича храм
Княгиня Ольга 957 воын пукалӧ вӧлӧм Великая ю мӧдлапӧлас. Виччысьтӧг крепосьт шӧрас усьӧма куим зэв югыд югӧр. Ольга тшӧктӧма сэні кыпӧдны Троича храм.
Тайӧ стрӧйбаыс вӧлӧма карыслы и дзоньнас Псков гӧгӧрса муыслы зэв тӧдчана. Ӧд сэні абу сӧмын юрбитӧмаӧсь Енлы. Храмас бласлӧвитлӧмаӧсь князьясӧс, сыкӧд орччӧн йӧзыс чукӧртчылӧмаӧсь вече вылӧ, вичко жыръясас видзӧмаӧсь дона кабала, сьӧм да уна мукӧдтор. И тыш вылӧ йӧзыс кыпӧдчылӧмаӧсь «Вежа Троича вӧсна».
Медводдза храмыс вӧлӧма пуысь да сулалӧма 180 во, кытчӧдз абу сотчӧма.
1138 воын Киевысь воӧм Всеволод-Гавриил князь тшӧктӧма кыпӧдны выль храм, пуысь жӧ. 1242 вося апрельын нималана Ледовӧй побоище водзвылын тані юрбитӧма Александр Невский. Апрель 5 лунӧ сійӧ пасьвартӧма Чуд ты вылын ливон орденса рыцарьясӧс.
1363 воын вичкоыс руп-ропмунӧма да киссьӧма. Сы пыдди кыпӧдӧмаӧсь коймӧд, та пӧрйӧ изйысь куим юра храм. Сійӧ сулалӧма 25 во, 1609-ӧдын сотчӧма жӧ. Сы местаын ӧні сулалӧ «Ольга крест».
67 метр судта, вит юра выль Троича храмсӧ эштӧдӧмаӧсь 1689 воын, но 1749-ӧдын стеныс мӧдӧма потласьны. Храмсӧ дзоньталӧны ӧнӧдз. Медым мудӧдыс водзӧ эз потлась, гӧгӧрыс ёнмӧдӧмаӧсь контрфорсъясӧн.
Сӧвет власьт кадӧ тані восьтӧмаӧсь музей, пытшкӧссӧ мичмӧдӧмаӧсь гербъясӧн, гӧрд дӧрапас-лозунгӧн, Сталин да Ленин портретъясӧн.
1941 вося августын храмсӧ бӧр сетӧмаӧсь Енлы эскысьяслы. Фашистъяс абу ёна кисьтӧмаӧсь сійӧс, но пышйигас гусялӧмаӧсь XVII-XVIII нэмся 8 ӧбраз.
Талун соборас квайт престол. Сизим яруса 42 метр судта иконостассӧ пуысь вӧчӧмаӧсь да зарниӧн вевттьӧмаӧсь Москваын Оружейнӧй палатаын.
Храмас нёль ракаын куйлӧны Довмонт-Тимофейлӧн, Всеволод-Гаврииллӧн, Святогорск манастырӧн веськӧдлысьлӧн да Никола Салослӧн мощиыс. Бӧръяыс – йӧй нисьӧ прӧсуж вӧлӧма, но псковса сійӧс пыдди пуктӧны да казьтылӧны.
1570 воын Иван Грозныйлысь войскасӧ пасьвартӧмаӧсь, найӧ бӧрыньтчӧмаӧсь Новгородлань. Сарыд локтӧма сэтчӧ да уна чинаӧс ӧшлӧма-кералӧма. Полӧмпырысь сійӧс виччысьӧмаӧсь и Псковын. Карас воӧм бӧрын сар виччысьтӧг паныдасьӧма тайӧ мортыскӧд. Николаыд корӧма Грозныйӧс аслас кельяӧ, сетӧма нянь да уль яйтор. Сарыд скӧрмӧма, Ыджыд видз дырйи пӧ менӧ номсӧдлан яйӧн!? Корысьыд и янӧдӧма сійӧс асьсӧ, а видз дырйи пӧ вир кисьтны позьӧ?
Та бӧрын сарыд лоӧма шаньджык да некодӧс ёнасӧ абу чиршӧдлӧма.
Ольга княгиня
Дерт, Псковса олысьяс пыдди пуктӧны карсӧ подулалысь Вежа Ольга княгиняӧс.
Сылы памятниксӧ восьтӧмаӧсь 2003 вося июль 23 лунӧ, карыслысь 1100 вося юбилей пасйигӧн.
Скульптор Вячеслав Клыков да архитектор Станислав Битный 4,5 метр судта памятниксӧ сувтӧдӧмаӧсь кар шӧрас, челядь паркын, Октябрь изэрдсянь неылын.
Бронза Ольгакӧд орччӧн том Владимир князь.
Веськыд киас княгиня кутӧ крест. Сійӧ быттьӧкӧ бласлӧвитӧ Владимирӧс, коді верстяммас да пыртас православиеӧ Русьнымӧс.
Памятник судта жӧ и сылӧн подулыс.
Сэні сулалӧны Псков историяысь нималана да тӧдчана йӧз – Никандр Пустынножитель, Всеволод Мстиславович (Гавриил) Псковский князь, патриарх Тихон, инокиня Васса, Псков-Печера манастырса игумен Корнилий, Александр Невский, митрополит Вениамин (Казанский), Довмонт князь Марфа Псковская гӧтырыскӧд, княгиня Елизавета, Евфросин Псковский да Никола Салос.
Памятникыскӧд орччӧн куйлысь изйӧ пасйӧма сьӧмӧн отсасьысь войтырӧс.
Пушкин да крестьянка
1983 вося июнь 3 лунӧ Псковын кыпыда пасйӧмаӧсь Пушкинлы сиӧм XVII ставсоюзса поэзия праздник.
Гожся садйын восьтӧмаӧсь нималана гижысьлы 3,15 метр судта памятник. Скульптор Олег Комов таӧдз вӧчӧма Пушкинлы нёль памятник. Найӧ сулалӧны Болдиноын, Тверьын, Кишинёвын да Испанияса Мадридын. Но витӧдыс воддзасьыс торъялӧ. Александр Сергеевич сэні абу ӧтнас, орччӧн пукалӧ сылӧн няня Арина Родионовна. Памятниксӧ нимтӧны и «Пушкин да няня», и «Пушкин да крестьянка».
Олег Комовлӧн висьталӧм серти, «Арина Родионовнасӧ» сійӧ серпасалӧма 1980 воын Алтайын, «Краснощеково» совхозын. Тайӧ – нималана механизатор, комбайнёр, Уджвывса Герой Мария Королёва.
Псковын Пушкин гижӧма 100 гӧгӧр мойд, «Евгений Онегин» да «Борис Годунов». Татчӧ сійӧ волӧма 17-ысь да олӧма 77 лун.
Куслытӧм би
1974 вося июль 23 лунӧ Победа изэрдын, важ крепосьт стен дорын кыпыда восьтӧмаӧсь Айму вӧсна Ыджыд тышын Вермӧмлы сиӧм мемориал.
Вывлань чургысьӧма 85 миллиметр калибра зениткаса 15 ствол. Война кадӧ найӧ дорйӧмаӧсь карвесьтса енэжсӧ. Талун ӧтчукӧрӧ сваритӧм стволъясыс быттьӧкӧ орган, пыр виччысян, мый мӧдас юргыны нор шылад. Мемориалсӧ вӧчӧмаӧсь «Псковмаш» предприятиеын зільысьяс.
Гранит подулас дзебӧмаӧсь тӧдтӧм салдатӧс, коді усьӧма 1941 вося июль 9 лунӧ Батьковичи грезд дорын Великая ю вуджигӧн.
Куслытӧм би дорас – война кадся каска. Великие Луки дорысь сійӧс аддзӧма мемориалсӧ вӧчысь архитектор Всеволод Смирнов. 1943 воын сійӧ ранитчӧма фронт вылын.
Кузнеч
2014 вося июль 26 лунӧ Псковлы тырӧма 1111 во. Тайӧ лунас челядь паркын восьтӧмаӧсь кузнечлы «Скобарь» памятник. Вӧчӧма сійӧс Беларусьысь скульптор Игорь Голубев.
Мыйла «Скобарь»? Буретш скобарьясӧн шуӧны Псков обласьтсаӧс.
Татчӧс кузнечьяс важысянь дорлӧмаӧсь зэв крепыд скӧба. Весиг пӧ Пётр I шведъяскӧд тыш водзын кежалӧма татчӧ да видлӧма кусыньтны скӧбасӧ. Абу вермӧма да сӧмын шуыштӧма, вот тайӧ пӧ скӧбаръяс!
Ни важ роч, ни важ славяна кывкудъясын «скобарь» кывйыс абу. Но важ кабала-документын эм «скопской» да «скобской» кывъяс. Лингвистъяс серти, тайӧ кывъяснас вӧдитчӧны XVIII нэмсянь, кор татчӧс кузнечьяс кӧрта кӧлуйнас мӧдӧмаӧсь могмӧдны матігӧгӧр войтырӧс да весиг петербургсаӧс.
Талун ветлысь-мунысь окотапырысь снимайтчӧны кузнечыскӧд, а инмӧдчылан кӧ пӧ нырас, мӧлӧтнакӧвальняас, водздӧраас, дорӧм пӧдкӧваас да киас, лоан шуда. Кӧсъян кӧ озырмыны, ки пыдӧсас позьӧ пуктыны сьӧмтор.
Кӧрт дас шайта ме коли жӧ, но водзӧсыс таысь эз на во. Нинӧм, виччысьыштам…
<> Николай РАЗМЫСЛОВ. Снимокъясыс авторлӧн.