Кольӧм воторникӧ, сентябрь 9 лунӧ, «веськыд йитӧд» дырйи республикаса юралысьлысь удж вӧчысь Ростислав Гольдштейн вочавидзис Комиын олысьяслӧн юалӧмъяс вылӧ.
Вежон чӧжӧн воӧма сизим сюрс сайӧ юалӧм, нӧшта кӧкъямыссё – регионӧн веськӧдлысьлӧн веськыд эфирын кык час чӧж сёрнитігӧн.
Кыдзи тыдовтчис, республикаын олысьясӧс медъёна майшӧдлӧны шогмытӧм туйяс, дзоньвидзалун ви-дзан юкӧнын, жилищно-коммунальнӧй овмӧсын тырмытӧмторъяс. Дерт, Ростислав Гольдштейн дорӧ шыӧдчигӧн быдӧн юксис аслас тӧждӧн, но торъя мортӧс майшӧдланаторйыс инмӧ Комиын олысь став войтырыслы, и бырӧдны падмӧгсӧ – регионса правительстволӧн да муниципалитетъясӧн юрнуӧдысьяслӧн мог.
Сёрни панігӧн Ростислав Гольд-штейн пасйис, Коми Республика пӧ – менам оланін, тані ме быдми, лои веськӧдлысьӧн. И сизим сюрс юалӧмыс пӧ – тайӧ сизим сюрс разьтӧм на гӧрӧд. Мытшӧдъяс вылас индӧмӧн пӧ йӧзыс петкӧдлӧны, кутшӧм нырвизьын колӧ водзӧ сӧвмыны республикалы.
Та бӧрын Ростислав Гольдштейн казьтыштіс Россияса президент Владимир Путинкӧд неважӧн аддзысьлӧмсӧ.
–Ме тӧдмӧді президентӧс, кутшӧм уджтасъяс збыльмӧдам республикаын, – шуис сійӧ. – Тайӧ и газохимическӧй комбинат да аммиака селитра вӧчан завод стрӧитан, Сереговса санаторийын 400 морт вылӧ артыштӧм торъя военнӧй операцияын тышкасьысьясӧс реабилитируйтан шӧрин восьтан, ылі районъясӧ биару вайӧдан да мукӧд тӧдчана проект.
Республикаса юралысьлысь удж вӧчысь пасйис, торъя военнӧй операцияын тышкасьысьяслы да налӧн семьяяслы отсӧг сетӧм кузя пӧ Коми – странаса вит медбур регион лыдын. Сідзжӧ содӧ уна челядя семьяыс, ӧні республикаын татшӧмыс артавсьӧ 2,3 сюрс котыр.
Ростислав Гольдштейнлысь юалісны, мыйӧн коляс вежӧрас тавося бӧрйысян кампанияыс. Сійӧ вочавидзис дженьыда, республика сӧвмӧдӧм могысь пӧ уджыс уна да, кампанияыс кыдзкӧ бокиті и муніс. Дженьыда вочавидзис и нӧшта ӧти юалӧм вылӧ: регионӧн веськӧдлӧм бӧрад пӧ воддза кык юралысь моз жӧ Москваӧ овны мунанныд?
–Ог, – шуис Ростислав Гольд-штейн. – Гашкӧ, Ухтаӧ муна, сэні менам оланінӧй.
Менсьым сьӧлӧмӧс быттьӧ выйӧн мавтыштісны, кор экран вылын мыччысис Удораысь Дина Чупрова да комиӧн чолӧмасис и комиӧн жӧ корис котыртлыны татшӧм аддзысьлӧмъяссӧ чужан кывйӧн.
«Веськыд йитӧдсӧ» нуӧдісны москвасаяс – Александра Суворова да Дмитрий Щугорев, и найӧ пыр жӧ ловзисны-ыззисны: сідзкӧ пӧ, и миянлы тшӧтш ковмас велӧдчыны комиӧн сёрнитны. Дерт, велӧдчыштам пӧ, воис накӧд ӧти кывйӧ Ростислав Гольдштейн, но медбура пӧ йӧзкӧд комиӧн сёрнитны артмас уна челядя мам, «Коми войтыр» ӧтмунӧмӧн веськӧдлысьӧс вежысь Анастасия Михайловалӧн. «Коми кыв лоӧ Коми Республикалӧн культурнӧй идентичносьтлы подулӧн», – пасйис Ростислав Гольдштейн.
–Аттьӧала регионын олысьясӧс, кодъяс пырӧдчисны миян сёрниӧ, – висьталіс «веськыд йитӧд» сигӧртӧм бӧрын республикаса юралысьлысь удж вӧчысь. – Ме мӧда вӧчны ставсӧ, медым венны и гырысь, и ичӧт мытшӧдсӧ. Кӧть ичӧт, торъя мортлы инман мытшӧдсӧ гырыссьыс торйӧдны оз позь. Эм кӧ мытшӧдыс, сійӧс колӧ бырӧдны миянлы правительствокӧд, муниципалитетса власьт тэчаскӧд ӧтув. А та могысь ставыс эм: Россияса президентсянь да странаса правительствосянь отсӧг и Комиын олысь водзмӧстчысь да зіль йӧз.
<> Гижӧдсӧ дасьтіс Павел СИМПЕЛЕВ.