Быдсикас выль юӧртан технологияяс кӧть бӧръя кадас пыртӧны-вужйӧдӧны, торйӧн нин ылі сикт-грездын йӧзыд векджык поштаын чукӧртчылӧны-аддзысьлӧны. Татчӧ локтӧны радейтана газет-журнал вылӧ гижӧдчыны, жилищно-коммунальнӧй услугаӧн могмӧдӧмысь да сотӧвӧй йитӧдысь вештысьны, ыстыны-босьтны пӧсылка, ньӧбны ӧттор-мӧдтор коланатор, да и выльторъяс на тӧдмавны да тӧдсаяскӧд олӧм-вылӧм йылысь варовитыштны.
Сиктсаяслы быдлунъя олӧм-уджас отсасьысьяс лыдын – Сыктывдінса Зеленеч сиктысь Елена Голдобина. Таво тырӧ сылӧн пошта юкӧнын зільны босьтчӧмсянь 25 во. Газетса корреспонденткӧд сёрниын ань висьтасис аслас удж-нок да олӧм-вылӧм йывсьыс.
–Чужи ме Донецк обласьтса Енакиево карын, а 1986 воын бать-мамкӧд локтім овны Кӧмъяр посёлокӧ, – паніс сёрнисӧ Елена Александровна. – Школадырся воясыс лэбовтісны, и дасӧд класс помалӧм бӧрын ме пыри Сыктывкарса технологическӧй колледжӧ велӧдчыны бухгалтерӧ. Сійӧс эштӧді да бергӧдчи посёлокӧ – коліс отсасьны бать-мамлы. Сёрӧнджык чужті пи да пукалі сыкӧд отпускын.
1999 воын поштаса начальникыс петӧма декретӧ, да Еленалы вӧзйӧмаӧсь уджавны сы пыдди.
–Артмӧ, уджсикасыс ачыс аддзис-бӧрйис менӧ, – нюмъялӧ нывбаба. – Кӧмъярын быдми да, татчӧс олысьяссӧ бура тӧді, та вӧсна эг повзьы да кокньыда-ӧдйӧ пырӧдчи выль сикас уджас.
Абу гуся: поштаын зільысьясыд быд семьяын ас йӧз кодьӧсь – быд керкаын виччысьӧны газет, письмӧ, пенсия. Посёлоксаяс век шоныда вочаавлісны, тшӧкыда пызан сайӧ пуксьӧдлывлісны чай юны. Сэки нин казялі, мый быд кӧзяйкалӧн пӧжасыс торъялӧ, шаньга-пирӧгыс да чериняньыс абу мукӧдлӧн кодь.
Кыдз шулӧны, регыдъяыс пӧ тшӧкыда лоӧ пыр кадсяӧн. Кӧмъярын зільыштӧм мысьт Елена Голдобина поштальоналыштӧма орчча Яснӧгын, а 2001 воын сылы вӧзйӧмаӧсь Зеленечын удж. Тайӧ ыджыд сиктыс лоӧма Елена Александровналы мӧд чужанінӧн, тані жӧ нывбаба аддзӧма выль ёртъясӧс, но удж-нокыс вичмӧма юр выв тырыс. Бур, таын ёна отсалӧма сиктса пошта юкӧнӧн веськӧдлысь Нина Михайлова. Сибыд да ыджыд сьӧлӧма Нина Григорьевна колана здукӧ век мыччывлӧма отсӧга ки. Да и мукӧд уджъёртыс абу ӧтдортлӧмаӧсь. А мыйкӧдыра мысти ань ачыс босьтчӧма веськӧдлыны отделениенас.
–Кызьысь унджык во тані зілигад поштаад унатор вежсис, – висьталӧ Елена Александровна. – Пыртам уджӧ выль технологияяс, вӧзъям уна сикас выль услуга. Талун кӧть ӧтуввезйын быдсяма юӧрӧн позьӧ тӧдмасьны, миян эмӧсь на лыддьысьысь войтыр, кодъяс сё нинӧмысь оз вежны типография кӧрӧн йиджтысьӧм-ӧвтан газет-журналтӧ гаджет вылӧ.
Елена Голдобиналӧн висьталӧм серти, Зеленечын олысьяс шань сьӧлӧмаӧсь да сибыдӧсь, век дасьӧсь воны отсӧг вылӧ. Мукӧддырйиыс пӧ локтан поштаӧ, а ӧдзӧс вугъяс дача вӧдитысьяс козин тыра пакет пысалӧмаӧсь: кабачок и помидор, ӧгуреч и сёян турун сӧвтӧмаӧсь.
–Татшӧм аслыссяма аттьӧалӧмъяссьыс сьӧлӧм-лов вылад шоныд, да нӧшта на быд пӧрйӧ шуан аслыд, мый вӧчан йӧзлы колана да тӧдчана удж.
А уджсьыс прӧст кадсӧ нывбаба коллялӧ матыссаясыскӧд.
–Менам кык молодеч-пи, – гӧрдитчӧмӧн ошйысьӧмӧнмоз шуӧ Елена Голдобина. – Ыджыдджыкыс, кызь кӧкъямыс арӧса Никита, во сайын гӧтрасис да олӧ асшӧра. Ичӧтджыкыслы, Артёмлы, дас кӧкъямыс тырис. Велӧдчӧ Улыс Новгородын Н.И.Лобачевский нима университетын тренерӧ. Зэв ёна радейтӧ спорт, окотапырысь ворсӧ баскетболӧн (спорт-физкультураӧ пырӧдчӧ ичӧтдырсяньыс вок вылас видзӧдӧмӧн). Ме эска, налӧн гуся кӧсйӧм-мӧвпъясныс збыльмас, и олӧмас ставыс артмас.
Прӧст кадӧ нокся дзоридзьясӧн. Ӧні со босьтчи рӧдмӧдны мича антуриум. Та кузя юӧръяснас тӧдмася мукӧдсяньыс, а сэсся видла вӧчны ставсӧ на моз жӧ. Ӧшинь вылын талун дас нёль ичӧтик антуриум быдмӧ. Виччысьӧмӧн виччыся, кор дзоридзавны кутасны да нимкодьӧдасны менӧ! Шойччан кадӧс челядькӧд кындзи колляла тшӧтш ёртъяскӧд, окотапырысь уяла бассейнын, ислала лызьӧн. Тадзи шойччӧм бӧрас содӧ вын-эбӧсыд.
Войдӧр кадӧ шойччан лунъясӧ да праздникъяс кежлӧ ветлывлі Кӧмъярӧ бать-мам дорӧ. Накӧд орччӧн век дум вылӧ усьліс ичӧтдырӧй. Шоныд рытъясӧ ӧтлаын юлім туруна чай, пывсьылім чӧс-кыд кӧра корӧсьӧн. Бать-мамӧй мунісны нин олӧмсьыс, да Кӧмъярын керканым тыртӧм. Но чужан посёлокын олӧ Елена Михайловна Пономарёва тьӧткаӧй, коді отсаліс меным быдтыны пиянӧс. Зонъяс сійӧс бабушка Ленаӧн и шуӧны. Сійӧ юкӧ миянкӧд шогсӧ и гажа-шуда здукъяссӧ, велӧдӧ да чуйдӧ-индалӧ. Миян шань да дона Лена тьӧтканым, – сигӧртіс сёрнисӧ Елена Голдобина.
Ирина Романова.
<> Комиӧдіс Елена Плетцер. Снимокъясыс Елена ГолдобиналӦн гортса архивысь.