Сыктывкарын эштӧдӧны ӧтпырйӧ некымын школаын ремонт. Дзоньтасьӧны сэні «Томулов да челядь» национальнӧй проектлӧн «Школаяс выльмӧдӧм» федеральнӧй уджтас серти.
Ӧшинь, ӧдзӧс, джодж, стен вежлалӧм да выль пызан-улӧс-шкап ньӧбӧм кындзи школаяссӧ мичмӧдісны регионса пасъясӧн, коми серӧн да гижӧдъясӧн.
Шуам, И.А.Куратов нима Сыктывкарса 1-ӧд номера школаын капремонт дырйи чужис коми литературалы подув пуктысь, кыв туялысь да вуджӧдчысь Иван Алексеевич Куратовлы сиӧм мурал.
А 38-ӧд номера школа стенын серпасалісны тайӧ школасӧ помалысь, лыжиӧн нималана котралысь, ставмирса чемпион, Турин карын тӧвся Олимпиадаса призёр, Россияса чемпион Василий Васильевич Рочевлы сиӧм мурал. Серпасъяссӧ дасьтіс Максим Умпелев.
«Коми войтыр» ӧтмунӧмса Сыктывкарса юкӧнын зільысьяслы сьӧлӧм вылӧ воисны татшӧм водзмӧстчӧмъясыс. Казьтыштам, капремонт дырйи школаяссӧ коми серӧн да коми кывъя гижӧдъясӧн мичмӧдӧм йылысь сёрнисӧ кыпӧдлісны Сыктывкарса коми войтырлӧн конференция да коми войтырлӧн 2024 вося съезд дырйи делегатъяс.
Ӧльӧш Рассыхаев.