Кулӧмдін районса Кебанъёль посёлокын эштӧданвыйын выль спортплощадка.
Сійӧс лӧсьӧдӧмаӧсь Школьнӧй уличаса 1б-ӧд номера керка дорын. Уджас босьтчӧмаӧсь май 1 лунӧ. Тайӧ каднас гӧгӧрыс потшӧмаӧсь, нюжӧдӧмаӧсь би. Футболӧн ворсысьяслы сувтӧдӧмаӧсь ворота, а баскетболистъяслы – кӧрзинаа щит. Ӧні посёлоксалӧн лоас бур шойччанін, а сідзжӧ ки-кок физкультураӧн да спортӧн песанін.
Сыктывдін районса Зеленеч сиктын «Спорт – норма жизни» уджтас серти 2019 воын на лӧсьӧдлӧмаӧсь выль спортплощадка. Ӧні шуӧмаӧсь выльмӧдны ворсан веркӧссӧ да вежны кутшӧмсюрӧ тренажёр.
Сиктса челядь ёна радейтӧны татчӧ волыны, быд лун ворсӧны футболӧн да баскетболӧн, а кодсюрӧ и сідз котралӧ, ёнмӧдӧ дзоньвидзалунсӧ.
Таысь ӧтдор сиктса спортшкола бердын восьтасны лызьӧн котралысьяслы жыр.
2018 воын на Зеленечын кӧсйылӧмаӧсь лӧсьӧдны выль стадион, та улӧ весиг му вичмӧдӧмаӧсь. Сиктсаяс кутӧны лача, мый матысса кадӧ тайӧ уджтассӧ збыльмӧдасны.
Тайӧ жӧ районса Выльгортын спортшколаас тренируйтчӧ 93 футболист да лызьӧн котралысь. Н.С.Власов нима лызьӧн котралан базасӧ шуӧмаӧсь выльмӧдны да ньӧбны выль эмбур. Стадионас челядь мӧдасны котравны тӧв и гожӧм.
Таысь ӧтдор «Россияса спорт» программа серти лӧсьӧдасны ГТО норматив сдайтанін. Талун пӧдрадчикыс футболӧн ворсаніныскӧд орччӧн дасьтӧма нин сы улӧ мудӧд.
Воркутаса «Юбилейнӧй» стадионын лӧсьӧдӧны «сюсь» спортплощадка. Сэні позяс ворсны баскетболӧн, волейболӧн да мини-футболӧн. Лоас и воркаут радейтысьяслы юкӧн, налы содтӧд сувтӧдасны кык тренажёр. Спортплощадкаас быдлаын лоасны торъя QR-кодъяс. На отсӧгӧн быдӧн вермас тӧдмавны, кыдзи бурджыка песны асьтӧ. Талун спортплощадкаас монтажникъяс лӧсьӧдӧны оборудование.
Став тайӧ уджсӧ вӧчӧны «Бизнес-спринт «Я выбираю спорт» федеральнӧй уджтас вылӧ подуласьӧмӧн.
«Россияса спорт» госпрограмма серти татшӧм жӧ «сюсь» спортплощадка да спортзал кыпӧдасны Емдін районын. ГТО норматив сдайтанінъяс восьтасны Сыктывкарын да Ухтаын.
2026-2027 воясӧ Удора районса Косланын кыптас универсальнӧй спортзал. Та могысь 150 миллион шайт видзасны федеральнӧй да республикаса бюджетъясысь. Спортзалсӧ шуӧма вӧчны ӧдйӧ тэчана блок-конструкцияысь.
Но, тыдалӧ, оз быдӧн колана ног донъяв государстволысь миян дзоньвидзалун вӧсна тӧждсӧ.
Сыктывкар бердса Выльтыдорын Механическӧй уличаса 13-ӧд номера керка дорын лӧсьӧдӧны выль спортплощадка. Турника комплекс, тренажёръяс да пуклӧсъяс вылӧ республикаса да карса сьӧмкудйысь видзӧмаӧсь 3 миллион шайт.
Пӧдрада котырыс абу на удитӧма помавны уджсӧ, кодъяскӧ витысь нин жугӧдӧмаӧсь тренажёръяссӧ, гусялӧмаӧсь электрокабель да кӧрт арматура.
Кыдз висьталісны дирекцияас, спортплощадкаас кодсюрӧ дучкӧ курыд зелля, а гортас сьӧрсьыс нуӧ дармӧвӧй болт-гайка, фанера да электрооборудование.
Матысса кадӧ тані ӧшласны видеокамераяс. Россияса Уголовнӧй кодексысь 214-ӧд статья серти (вандализм) кузь киа да наян войтырӧс позяс кыскыны кывкутӧмӧ 14 арӧссянь.
<> Гижӧдсӧ дасьтіс Николай РАЗМЫСЛОВ. Снимокъясыс ӧтуввезйысь.