Коді шуис, мый Войвыв вӧр-ваыс гажтӧм да ӧтсяма? «Сезон охоты на ООПТ» конкурсӧ пырӧдчысьяс квайтӧд во нин эскӧдӧны, мый тайӧ шуӧмыс некыдз оз лӧсяв збыльыслы. Налӧн фотообъективӧ веськалӧны медся мича рытъя да асъя кыаяс, налы сетӧны снимайтны асьнысӧ лэбачьяс да пемӧсъяс, найӧ пырӧдчылӧны гут-гаглӧн гуся олӧмӧ, найӧ аддзӧны мичсӧ омӧль поводдяысь да быдлунъя олӧмын миянлы тыдавтӧмсӧ. Но медся тӧдчанаыс – фотоохотникъяс сяммӧны кутны тайӧ кадрын да колана здукӧ личкыштны фотоаппарат затворӧ.
Август 20 лунӧ юркарса «Югӧр» культурнӧй водзмӧстчӧмъяс шӧринын восьтісны торйӧн нин видзана вӧр-ва юкӧнъясын (ООПТ) вӧчӧм снимокъяслы сиӧм выставка да вӧчисны тайӧ конкурсыслы кывкӧртӧд.
Выставка вылын петкӧдлӧма фотоохотникъяслысь «Пемӧсъяс да лэбачьяс», «Вӧр-васа серпасъяс», «Быдмӧгъяс да тшакъяс», «Менам челядьдырся ю» да мукӧд нимпасын уджъяс. Таво конкурс вылӧ воис Комиысь, Киров обласьтысь да Москваысь 250-ысь унджык удж. Пырӧдчисны сэтчӧ 13-сянь 66 арӧсӧдз войтыр.
Таво выставкасӧ восьтісны выль ногӧн. Жырсӧ вӧлі юкӧма некымын станция вылӧ. Сідз, «Историческӧйын» гӧсьтъясӧс тӧдмӧдісны конкурслӧн историяӧн, «Музыкальнӧйын» – сьыліс Коми Республикаса народнӧй артистка Вера Булышева.
«Награднӧй» станцияын регионса вӧр-ва да гӧгӧртас видзӧм кузя министр Роман Полшведкин пасйис козинӧн конкурсын вермысьясӧс. Сійӧ аттьӧаліс ставнысӧ водзмӧстчӧмсьыс, вӧр-ва да ассьыныс уджсӧ радейтӧмысь, а сідзжӧ висьталіс гуся кӧсйӧмсӧ – вӧчны конкурссӧ Россия тшупӧдаӧн да йӧзӧдны медбур снимокъяссӧ открыткаясын. Ассяньыс козинъяс сетіс и «Югыд ва» национальнӧй паркын зільысь Анна Душейко. Сійӧ торйӧн аттьӧаліс нацпарк снимайтысь-нимӧдысьясӧс.
«Исследовательскӧй» станцияын бинокулярӧн позис видзӧдлыны быдмӧг-гаглысь тэчассӧ. «Речной дозорын» Сыктывкарса госуниверситет бердын лицейын велӧдчысьяс видлалісны юысь ва, «Ремесленнӧйын» окотитысьяс вермисны велӧдчыны кыны сюмӧдысь кӧрзина. «Интерактивнӧй» бӧръя станцияын проекторӧн петкӧдлісны выставка вылӧ веськавтӧм снимокъяс.
Кӧсъянныд кӧ аддзывны Войвывлысь збыльвывса мичсӧ да гусяторъяссӧ – ветлӧй «Югӧрӧ». Выставкаыс кутас уджавны сентябрь 20 лунӧдз.