Кольӧм вежонӧ Коми Республикаса юралысьлӧн Сыктывдін районын Общественнӧй приёмнӧйӧн веськӧдлысь Галина Ивановна Ватаманова пасйис гӧгрӧс тшупӧда юбилей. Чужан лун водзвылас ми аддзысьлім нимлунасьыськӧд да варовитыштім сылӧн яръюгыд олӧм йывсьыс.
Шуда-гажа томдыр кад
Галина Ивановна чужӧма Сыктыв районса Куратов сиктын. Казьтылӧ, мамӧй пӧ ёна корис мунны велӧдчыны врачӧ, а ме ас пытшкын кылі-тӧді, мый колӧ бӧрйыны мӧд туй. Школасӧ помалӧм бӧрын водзмӧстчысь ныв пырӧма босьтны тӧдӧмлун Сыктывкарса университетын филология факультетӧ.
–Студенталан кадӧ мыйсӧ сӧмын эг видлы! Весиг Ан-2 самолётсянь парашютӧн дас сизимысь чеччышті. А «Лазурь» стройотрядын видлі ачымӧс стюардесса уджын. Вобыд лэбалі ас регионса да странаса каръясӧ. Ӧнӧдз юрын лэбзьӧм водзвылын бортпроводницалӧн кывъясыс, – висьталӧ ань.
Университетын велӧдчигӧн практика вылӧ Галина ветлӧдлӧма Выльгортса шӧр школаӧ. Вузсӧ помалӧм бӧрын сэтчӧ и корӧмаӧсь коми кыв велӧдны.
Велӧдӧм, ёртасьӧм, творчество
Школаын специальносьт сертиыс часыс оз вӧлӧм тырмы да, медводдза восӧ том педагог нӧшта на и продлёнка нуӧдӧма. А сэсся коми кыв да литература велӧдны босьтчӧма.
–Ме зіли сетны эг сӧмын подув тӧдӧмлун, а пестыны челядь сьӧлӧмъясын вужвойтыр культура да кыв дорӧ муслун традиция, легенда, шылад да история пыр. Нуӧдлі быдсикас тема серти урокъяс. То коми оласноглы сиӧм сценка пуктам, то сёян-юанӧн тӧдмӧдӧм могысь чай юам. Шуам, та дырйи школьникъяс сюркнявлісны пель саяс, кыдзи коминас лоӧ хлеб, пирог, морс, велӧдчисны колана ног пукавны-варовитны пызан сайын. Мукӧддырйиыс быдса гаж-праздник артмывліс: пасьтасьлім национальнӧй костюмӧ, чолӧмавлім ёрта-ёртӧс, лыддим кывбуръяс, и ставыс тайӧ – комиӧн! Тадзи ныв-зон юр выв тырнас сунлісны миян республикаса вужвойтыр культура-традицияӧ. Тшӧкыда и Выльгорт кузя экскурсияӧн нуӧдлі, висьтавлі пыдди пуктана олысьяс йылысь, – казьтыштіс Галина Ивановна.
Колӧ шуны, медым велӧдчысьяс дыр на казьтылісны коми кыв да литература урокъяссӧ, педагог корлывлӧма школаӧ нималана гижысьясӧс. Челядь дорӧ тшӧкыда волывлӧмаӧсь Геннадий Юшков, Альберт Ванеев, Елена Габова да мукӧд.
–Чайта, ме вӧлі бур учительӧн, ӧд быдтас-велӧдчысьясӧй ӧнӧдз пыдди пуктӧны да чолӧмалӧны тӧдчана гажъясӧн. А тайӧ меным медвылыс донъялӧм, – висьталӧ ань.
Галина Ватаманова пуктіс тӧдчана пай и велӧданног сӧвмӧдӧмӧ. 2000 воын Мария Плосковакӧд найӧ йӧзӧдісны витӧд классын велӧдчысьяслы «Лысва» учебник. Во мысти петіс сы дорӧ методика пособие, а сэсся мукӧд авторкӧд тшӧтш – квайтӧд классалы «Зарань» учебник. 2009-2012 воясын лои йӧзӧдӧма витӧд-кӧкъямысӧд классъясын велӧдан учебникъяс.
Йӧзлы да йӧзкӧд, да град йӧрын
2022 воын Галина Ивановна босьтчӧма зільны Коми Республикаса юралысьлӧн Сыктывдін районын Общественнӧй приёмнӧйын. Та дырйи и велӧдан уджсьыс абу эновтчӧма. А 2020-ӧдын мунӧма школаысь да тырвыйӧ сетчӧма йӧзлы бур вылӧ удж-ноклы.
–Нимкодь, мый верма отсавны йӧзыслы разьны олӧмас кутшӧмкӧ гӧрӧд-мытшӧд. Век зіля вӧчны тайӧс быд тшупӧда власьт дорӧ шыӧдчӧмӧн. Йӧзыс эскӧны меным, и ӧвтыштчыны наысь ог вермы, век муна воча, – шуӧ Галина Ватаманова.
А удж бӧрас шойччыны-пальӧдчыны-вунӧдчывны радейтӧ аслас ӧшинь улас да град йӧрас. Дзоридзтӧгыс, градтӧгыс да быдсикас быдмӧг-кусттӧгыс пӧ овны ог вермы: найӧ бурмӧдӧны сьӧлӧм-лов, гажӧдӧны син. Став быдмӧгыслы пӧ колӧ торъя тӧжд-дӧзьӧр да радейтӧм. А пӧрадокын кӧ град йӧрыд, и муыс козьналӧ озыр урожайӧн.
–Зэв ёна радейта чукӧртлыны ас ордын матыссаясӧс, ёртъясӧс да уджъёртъясӧс. Насянь сэтшӧм шоныдӧн ӧвтӧ. Ӧтлаын ветлывлам тшак да тусь вотны, пасъям гаж-праздник. Шоныда казьтывла и Выльгортса народнӧй театрын Валентина Лекановалӧн веськӧдлӧм улын ворсӧмӧс. Торйӧн нин тшупӧма вежӧрӧ «Дзугйын» спектакльын чиганкаӧн петкӧдчӧмӧй, – сигӧртіс сёрнинымӧс Галина Ивановна.
Бӧркыв пыдди тӧдчӧдам, водзмӧстчӧмсьыс да пӧсь сьӧлӧмӧн уджсьыс Галина Ватамановаӧс вылӧ донъялӧма: пасйӧмаӧсь Россия Федерацияса велӧдан да наука министерствосянь да Коми Республикаса правительстволӧн администрациясянь почёт грамотаясӧн, регионса юралыссянь аттьӧалана гижӧдъясӧн, «Почётный работник общего образования РФ» отличие знакӧн, «Коми Республикаса заслуженнӧй уджалысь» нимӧн.
<> Елена Вишнякова.
Снимокъясыс Галина Ватамановалӧн гортса архивысь. Комиӧдіс Елена ПЛЕТЦЕР.