Гаждор грездысь Тарабукинъясӧс тӧдӧны и Сыктывдін районын, и Сыктывкарын. Татчӧс овмӧсын позьӧ ньӧбны ловъя форель. Черисӧ ас дырйиыд гумовтасны садӧксьыс. Татшӧм кыйдӧсыдла волӧны пӧ Сыктывкарса ресторанъясын да суши-баръясын пусьысь-пражитчысьяс.
Владислав Тарабукин велӧдчӧма сварщикавны. Армияысь воӧм бӧрас уджыштӧма ӧти предприятиеын, а сэсся босьтчӧма зільны ас вылас. Медалӧма кык отсасьысьӧс, да мӧдӧмаӧсь сваритны-вӧчавны кӧрта кӧлуй.
Но том мортӧс кыскӧма чужан Гаждорас.
–Армияын на ӧтуввезйысь видзӧді чери рӧдмӧдӧм йылысь ролик. Сэки нин ышті да ютубысь мӧді корсьны, кутшӧм оборудование колӧ та могысь, бассейнсӧ бурджык аслыд вӧчны али дасьсӧ ньӧбны, мыйӧн да кыдзи вердӧны черисӧ, – казьтылӧ Владислав.
Том морт юксьӧма аслас мӧвпъясӧн батьыскӧд, коді Пальса школаын нуӧдӧма труд урок. Батьыс думыштчӧма жӧ. Недыр мысти вокыскӧд ветлӧмаӧсь Ростов-на-Донуӧ форель рӧдмӧдан ыджыд фабрикаӧ. Сэтысь и ньӧбӧмаӧсь кык бассейн. Та вылӧ видзӧмаӧсь став чӧжӧм сьӧмсӧ – 2,4 миллион шайт. Оборудованиесӧ ладмӧдны Гаждорӧ волӧмаӧсь Ростов-на-Донуса специалистъяс.
Зіль мортыдлы пӧ уджыд пыр тай этша. Окота лоӧма паськӧдчыны. Но матысса рӧдвужыс мыйӧн вермӧмаӧсь, отсалӧмаӧсь нин, чӧжӧм сьӧмыс абу нин кольӧма. Владислав кутӧма лача государство вылӧ, и абу весьшӧрӧ.
2021 вося февральын 26 арӧса Владислав Тарабукин лӧсьӧдӧма бизнес-план, пырӧдчӧма конкурсӧ да шедӧдӧма куим миллион шайта «Агростартап» грант. Государствосянь комбикорм, ёс да техника-оборудование ньӧбны чуктӧма нӧшта 1,6 миллион шайт.
Тайӧ сьӧм весьтас грездас дзоньталӧма стрӧйба, нюжӧдӧма сэтчӧ ва, шоныд да би, а сідзжӧ лӧсьӧдӧма форель быдтан нӧшта кык бассейн. Кыкнанас позьӧ рӧдмӧдны 2,5 тоннаӧн чери.
Ёссӧ вайӧма Москваысь да Ярославльысь, сэтысь жӧ ньӧбӧма кӧрым. Форель быдмӧ зэв ӧдйӧ. Вайӧм ёс-чериыс 150 грамма, а кӧкъямыс тӧлысь мысти нин сьӧктаыс содӧ кык да джын килограммӧдз.
Медводдза вонас Владислав быдтӧма нёль тонна форель, нӧшта во мысти – куим пӧв унджык. 2026 воын республикаса вузасянінъяс пыр кӧсйӧ инавны 17 тонна чери, либӧ 14 сюрс лов.
Кӧрымнас ковмӧма жӧ майшасьыштны. Медводдзасяньыс сійӧс вайлӧмаӧсь Финляндияысь, но тайӧ странаыс дугдӧма ёртасьны Россиякӧд, да ковмӧма корсьны орчча регионъясысь.
Владислав Фёдоровичлӧн висьталӧм серти, грездсаяс ошкӧны сылысь зільӧмсӧ. Ӧти-кӧ, черисӧ налы фермер иналӧ донтӧмджыкысь. А мӧд-кӧ, грездыс мӧдӧма ловзьыны. Бӧръя вояснас тані кыпалӧма нёль выль керка. Кодсюрӧ карысь бӧр воӧма-овмӧдчӧма чужанінас.
А Владислав кӧсйӧ водзӧ на паськӧдчыны. Майбыр, эндӧм муыс матігӧгӧрас тырмӧ. Эм пӧ и ыджыд стрӧйба улӧ подув, кытчӧ позяс кыпӧдны выль акваферма. Лоас пӧ и квайт пасьта да дас метр кузьта гӧп, кытчӧ мӧдасны лэдзавны гырысь черисӧ.
– Вӧлі мӧвп босьтчыны рӧдмӧдны кролик, но найӧ пӧ зэв висьлӧсӧсь. Кӧсйылі лӧсьӧдны индюкъяс, но рӧскодыс пӧ та могысь уна. Сідзкӧ, водзӧ мӧда сӧвмӧдны акваовмӧс. Но чипан-индюк да Семён дзодзӧг тапикасьӧны жӧ йӧрын, – шмонитігмоз висьталіс Владислав.
Тыдалӧ, пи вылас видзӧдӧмӧн ыззьӧма и Фёдор батьыс. 2024 воын тшӧтш дасьтӧма бизнес-план да пырӧдчӧма конкурсӧ. «Агростартап» грант серти картупель вӧдитӧм могысь вичмӧма нёль сайӧ миллион шайт.
–Комиын фермерлы медся кивыв вӧдитны «мӧд няньтӧ». Гӧгӧр эндӧм му, ёг-турунӧн, раскӧн да адгумӧн ставыс тырӧ. 2024 воын квайт гектар пукті. Мувердас да кӧйдыс ковмис ньӧбны, гӧрны медавлі трактор. Арнас чукӧртім 63 тонна картупель, 55-сӧ иналім. Грант весьтӧ ньӧбим выль «Беларусь», сы дорӧ гӧр-агас, телега, фронтальнӧй погрузчик, культиватор-окучник, фреза, картупель пуктан-керан да мукӧд агрегат, – юксис аслас мӧвпъясӧн Фёдор Геннадьевич.
2029 воӧдз сійӧ кӧсйӧ надзӧник паськӧдчыны 16 гектарӧдз. Сэки пӧ позяс босьтны 224 тонна «мӧд нянь». Инавны кӧсйӧ йӧзлы, вузасянінъясӧ, общепитӧ да бюджет учреждениеясӧ. Эм пӧ пуысь да пеноблокысь кык хранилище, тӧвнас позяс ломтыны пескӧн да биаруӧн.
Чужлӧма Фёдор Тарабукин тайӧ жӧ районса Позялӧм посёлокын, велӧдчӧма Придашса да Пальса школаясын. Сизим во воспитателялӧма Гаждорса детдомын. Та бӧрын кызь во Эжваса 15-ӧд номера ГПТУ-ын, а сэсся СЛПТ-ын труд урок дырйи велӧдӧма студентъясӧс вӧдитчыны чер-пилаӧн да сварщикавны.
Картупельысь ӧтдор Елена гӧтырыскӧд вӧдитӧны ыджыд овмӧс, яй вылӧ быдтӧны чипан, дзодзӧг, утка да индюк.
Тарабукинъяслӧн бройлеръяс да форель йылысь юӧрсӧ позьӧ аддзыны ӧтуввезйысь, тӧдмавны сарапана радио пыр. Ичӧт Слуда грезд туйвежын та йылысь юӧртӧ и ыджыд баннер.
* * *
Россияса президентӧн вӧзйӧм программаыс ёна отсалӧ фермеравны босьтчысьяслы. «Агростартап» уджтас серти Коми Республикаын 33 мортлы вичмӧма грант. Государство та могысь видзӧма 100 миллион шайт. Тайӧ сьӧма отсӧгнас фермеръяс быдтӧны вотӧс, град выв пуктас, лысьтӧны йӧв, вӧчӧны яй, ма, сыр да мукӧд вӧлӧга.
<> Николай РАЗМЫСЛОВ. Снимокъясыс авторлӧн да ӧтуввезйысь.