Комиын олысьяс дасьтысьӧны пасйыны воздушно-десантнӧй войскалы 95 во тырӧм.
Республикаса юралысьлысь удж вӧчысь Ростислав Гольдштейнлӧн
индӧд серти таво тайӧ гажсӧ шуӧма котыртлыны Кӧрткерӧс сиктса аэродромын.
Бӧръя кык вонас республика пасьталаысь десантникъяс ВДВ лунас чукӧртчывлісны Визинын, но тайӧ сиктыс юркарсянь ылын да, унаӧн эз вермывны ветлыны сэтчӧ. Та боксянь Кӧрткерӧсын, дерт, кивывджык чукӧртчывнысӧ.
Кыдз висьталіс республикаӧн веськӧдлысьлӧн референт, Афганистанын войнаса ветеран Станислав Хахалкин, унджык позянлуныс тшӧтш и артистъяслы да вузасьысьяслы сэтчӧ волынысӧ.
Таво август 2 лунӧ Кӧрткерӧсын ВДВ праздник дырйи енэжӧ кыпӧдчыласны да парашютӧн чеччаласны тшӧтш и парма-ягын кусӧдчан Коми шӧринысь профессионалъяс. Такӧд йитӧдын аэродромсӧ донъявны волісны республикаса юралысьлӧн администрацияын уджалысьяс, Кӧрт-керӧс районӧн веськӧдлысьяс, регионса десантник союзӧн да ветеран котыръясӧн юрнуӧдысьяс. Налӧн кывкӧртӧд серти, сэні ставыс бур да позьӧ лэбзьыны-пуксьыны самолётӧн.
Гаж дырйиыс котыртласны и мотокросс. Окотитысьяс вермасны петкӧдлыны ассьыныс сямсӧ Калашников автомат разьӧм-чукӧртӧм, тыш-косьын вӧдитчан пурт шыблалӧм да войнакӧд йитчӧм мукӧд конкурсын.
Десантникъясӧс да налысь гӧсьтъяссӧ гажӧдасны сьылан-йӧктан котыръяс, аниматоръяс челядьлы нуӧдасны аслыспӧлӧс ворсӧмъяс.
Воласны гаж вылас и сёян-юанӧн, сувенирӧн да мукӧд тӧварӧн вузасьысьяс.
А мед праздник вылас вермисны волыны унджыкӧн, Сыктывкарсянь Кӧрткерӧсӧ да бӧр юркарӧ кутас ветлыны содтӧд автобус.
–Чайта да, Комиын герой воӧ миянлы торйӧн нин тӧдчана, мед ВДВ луныс мунас кыпыда, яръюгыда, мед тайӧ гажсӧ дыр на нимкодьпырысь кутасны казьтывны республикаын олысьяс, – пасйис Станислав Хахалкин.
<> Гижӧдсӧ дасьтіс Александра АРТЕЕВА. Снимокыс ӧтуввезйысь.
