Коми Республикаын медся яръюгыд общественникъяс лыдын – Сыктывдін районысь Евгений Напалков, быдмысь войтырӧс военно-патриотическӧя воспитайтӧмын водзмӧстчысь-зільысь. Зеленечын олысь мужичӧй висьталіс аслас олӧм-вылӧм, видзӧдласъяс, удж йывсьыс да весиг юксис гуся мӧвп-кӧсйӧмнас.
–Евгений Александрович, висьтыштӧй ас йывсьыныд.
–Чужи-быдми да ола Зеленечын. Ӧкмыс класс помалӧм бӧрын велӧдчи рабочӧй профессияӧ да 1994 воын муні армияӧ. Служиті пограничнӧй войскаын Ылі Войвылын. А демобилизуйтчӧм бӧрын тӧлысь мысти нин пыри спецназ отрядӧ. Унаысь вӧлі «пӧсь точкаясын» кузь командировкаын. А ӧні со 12 во нин пенсия вылын шойчча.
–Пенсионер олӧмыд – абу тіянлы. Ті век общественнӧй олӧм вабергачынӧсь. Та йылысь паськыдджыка висьтыштӧй.
–2014 воын Донбассын да Луганскын ыпнитіс да, ми служба-удж кузя ёртъяскӧд да миян кодь видзӧдласаяскӧд котыртім Эжва районын доброволечьясӧс дасьтан шӧрин, мед быдӧн тӧдіс кӧть нин военнӧй подготовка подувсӧ.
Та вӧсна жӧ 2015 воӧ восьтім «Вӧркань» военно-патриотическӧй клуб, кӧні медшӧр могыс – быдтыны челядьӧс да томуловӧс патриотъясӧн. Клубыс ӧнӧдз уджалӧ. Курсантъяс тӧдмасьӧны Россияса да Вооружённӧй вынъясса историяӧн, военно-прикладнӧй спорт сикасъясӧн.
Сійӧ жӧ кадас ме лои Коми Республикаса Общественнӧй палатаын экспертӧн. Регионса олысьяскӧд да общественнӧй олӧмын водзмӧстчысьяскӧд аддзысьлігъясӧн пыр эскӧдлі ставнысӧ, мый быдмысь войтырлы быть колӧ лоны дасьӧн дорйыны Айму. Историяысь тӧдам, мый век колӧ дасьтысьны омӧльджыктор кежлӧ. И коді сэки шуасьліс паныд, ӧні гӧгӧрвоисны, мый ми правӧсь. Таысь ньӧти абу нимкодь, но «Кӧсъян мир – дасьтысь война кежлӧ» шуӧмыс збыльмӧ.
–Тайӧ жӧ тіян абу дзик ӧти проект?
–Сідз и эм. «Вӧркань» военно-патриотическӧй клуб 2019 воын шедӧдіс республикаса юралысьлысь грант да збыльмӧдіс «Достойное поколение шагает по Республике Коми» ыджыд уджтас.
Боевӧй офицеръяскӧд, казакъяскӧд, юнармееечьяскӧд ми волім регионса уна школаӧ, кӧні некымын часӧн велӧдім челядьӧс лазертагӧ, курсантъяс петкӧдлісны военнӧй дасьлунын ассьыныс кужанлун-сямсӧ, сетім позянлун и велӧдчысьясыслы водзмӧстчыны.
Аддзим быдмысь войтырлысь ӧзъян синнысӧ, гӧгӧрвоим, мый и бать-мам миян дор, да 2020 воын лӧсьӧдім Коми Республикаса томуловӧс патриотическӧя воспитайтан «Достойное поколение» асшӧр некоммерческӧй котыр.
–Асьныд вӧлінныд тыш-кось мунанінын да, велӧданныд ныв-зонмӧс военнӧй подготовка подулӧ?
–Огӧ сӧмын таӧ. Миян котырын талун 120 курсант. Медся поснияскӧд, 5 арӧссянь 1 класс помалысьӧдз, пӧртам олӧмӧ «Менам страна. Менам семья» уджтас: тӧдмӧдам государство историяӧн, краеведениеӧн, военнӧй подготовка подулӧн да моделированиеӧн. Ныв-зон окотапырысь мастеритӧны-вӧчӧны техника-танк макетъяс. НВП-ас найӧс пыртӧдам кызвыннас ворсӧм пыр.
А шӧр да гырысь группаясас – 2-11 классъясын велӧдчысьяс. Сэні миян 70 гӧгӧр морт. Тані программаыс сьӧкыдджык. Шуам, коймӧд классын курсантъяслы колӧ сдайтны тактическӧй медицинаысь экзамен: раненӧйлы пуктыны жгут, лӧньӧдны дойсӧ да эвакуируйтны. Песам томуловӧс физкультураӧн, спортӧн, боевӧй искусствоӧн, велӧдам дзоньвидза оласногӧ. Дасьтам и Аймулы служитігкежлӧ, котыртлам торъя военнӧй подготовка курс. Та дырйи кутам тӧд вылын и ныв-зонлысь арлыдсӧ. Шуам, неважӧн пуктім эксперимент – ӧтлаӧдім арлыд сертиыс торъяланаясӧс, да ӧні гырысьджыкъяс отсасьӧны посниджыкъяслы. Программасӧ пыр сӧвмӧдам-вежлалам, содтам выль занятиеяс. Бурмӧдам и материально-техническӧй подув. Уджалам Эжваса велӧдан учреждениеяскӧд топыд йитӧдын. Сэні курсантъясным тӧдӧмлунсӧ босьтӧны да, сюся ви-дзӧдам-донъялам, кыдзи велӧдчӧны, кутӧны асьнысӧ школаас.
–Гожӧмнас ті челядькӧд ветлывланныд Нювчимӧ сборъяс вылӧ. Курсантъяслы сэн сьӧлӧм вылас воӧ?
–Да, ветлывлам сэтчӧ военно-полевӧй сборъясӧн. Таво гожӧм сэні лоӧ квайт лунся квайт смена. Лагерас олам казармаын моз: лӧсьӧдам часӧвӧй постъяс, индам дневальнӧйясӧс, патрульяс, песам физкультураӧн. Телефонӧн да гаджетӧн вӧдитчыны ог лэдзӧй. Смена бӧрын уна бать-мам казялӧны, мый челядьыс вужвыйӧныс вежсьӧны бурланьӧ: унджык кужӧны-тӧдӧны, лоӧны вежавидзысь-кывкутысьӧнджык.
Дерт, овлӧ, и вильшасьлӧны (Евгений Напалков нюмъялӧ – О.К.). Полевӧй лагерын бӧръя войыс «королевскӧй» – асывнас зонъяс палялӧны фломастер-зелёнкаӧн «мичмӧдӧм» чужӧмаӧсь.
–Уджсьыныд водзӧсыс эм?
–Миян выпускникъяс – Рӧдинаса збыль патриотъяс. Ме наӧн гӧрдитча. Зонъясысь 80 прӧчентыс бӧрыннас мунӧны босьтны тӧдӧмлун военнӧй да силӧвӧй вузӧ. Найӧ ставныс вермӧны НВП кузя инструкторавны. Неважӧн звӧнитліс Вооружённӧй вынъясса боевӧй часьтысь офицер да аттьӧаліс срочнӧй службаса ӧти салдатӧс – миянлысь выпускникӧс – бура дасьтӧмысь. Миян курсантъяс унатор нин тӧдӧны-кужӧны да колана здукӧ век вермасны сувтны дорйыны Айму. Стӧча тӧда, ми уджъёртъяскӧд обороноспособносьт ёнмӧдӧм кузя ассьыным могнымӧс пӧртам олӧмӧ тырвыйӧ.
–Быд мортлӧн эм кутшӧмкӧ гуся мӧвп-кӧсйӧм… А мый кӧсъянныд ті, тыш-косьса ветеран?
–Ме эськӧ эг шу тайӧс мӧвп-кӧсйӧмӧн, а ёнджыкасӧ могӧн. Челядьӧс та мында во воспитайтіг-быдтігӧн век окота вӧлі восьтыны кадет корпус. Неважӧн миян котырлы вичмӧдісны Эжва районын детсад стрӧйба, и матысса кадӧ тайӧ кӧсйӧмсӧ ми збыльмӧдам.
–Коми Республикаса Общественнӧй палатаын ті петкӧдчанныд Сыктывдінсянь пӧшти ӧтнаныд…
–Ме юрнуӧда нэмӧвӧйся духовно-нравственнӧй озырлун, патриотическӧя воспитайтан да волонтёралӧм сӧвмӧдӧм-паськӧдӧм кузя комиссияӧн, кӧні видлалам-разям тыш-косьса ветеранъяслы инмана уна юалӧм-гӧрӧд. Ыджыд тӧдчанлун сета «Пера. Путь героя» велӧдан удж-тас збыльмӧдӧм-бурмӧдӧмлы. Мукӧдыскӧд тшӧтш чукӧрта да нуа гуманитарнӧй конвойӧн СВО-са боечьяслы отсӧг. Майшӧдлӧ и Комиысь пыр унджык томуловлӧн мунӧмыс. Том йӧзлы колӧ лӧсьӧдны регионын лючки олӧм могысь став коланасӧ. Татшӧм могыс уна на. И ме зіля вӧчны йӧзлы бур вылӧ став позянасӧ.
Ольга Калмыкова.
<> Комиӧдіс Елена Плетцер. Снимокъясыс Евгений Напалковлӧн гортса архивысь.