Сыктывкарын вӧчисны «Мама-предприниматель» федеральнӧй программалы регионса тшупӧдын кывкӧртӧд.
Челядя аньяслы бизнесын отсӧг сетан тайӧ уджтас-конкурсас вермысьӧн лоис сьӧд сэтӧр промышленнӧя быдтӧм-вӧдитӧм кузя аслас проектӧн Луздор районысь Ольга Смирнова.
Видз-му овмӧсын сійӧ абу выль морт. 2024 воын медбуръяс лыдын помалӧма «Производство органической продукции» нырвизьын Россельхозбанклысь «Фермер школа».
–Ме Луздор районысь, радейта муӧн да быдмӧгъясӧн вӧдитчыны. Первойсӧ тайӧ вӧлі меным хоббиӧн, сэсся велӧдчи, а ӧні со аслам проектӧ босьтчи. Сьӧд сэтӧр зэв бура быдмӧ миян республикаын, а вот промышленнӧя тайӧ вотӧссӧ вӧдитны некод на эз босьтчыв, – висьталӧ Ольга.
Сійӧ ёртасьӧ АПК-са компетенция шӧринысь специалистъяскӧд, кодъяс и отсалӧмаӧсь сылы дасьтыны «Мама-предприниматель» конкурс вылӧ проектсӧ. Ольга окотапырысь пырӧдчӧ шӧринас котыртӧм семинаръясӧ, бизнес-миссияясӧ.
Тӧдмасьӧма Иваново, Кострома, Ярославль обласьтъясысь предпринимательяслӧн опытӧн, кыдзи нажӧвитчыны вотӧс вӧдитӧмӧн.
Талун Ольга зільӧ оз сӧмын ас вылас. Мукӧд фермеркӧд ӧтув сійӧ котыртӧма видз-му кооператив.
–Ме дугдывтӧг велӧдча, босьта выль тӧдӧмлун, тӧдмася мукӧдлӧн бур опытӧн. «Мама-предприниматель» программа лоис уджын водзӧ воськолӧн, маркетинг-нейросетьыд меным абу нин сідз шусяна теория, а практика нин, – водзӧ висьталӧ Ольга да юксьӧ дум-кӧсйӧмнас, мый лӧсьӧдчӧ садитны выль сэтӧр кустъяс, паськӧдны плантацияяссӧ. 150 сюрс шайта грант вылас кӧсйӧ ньӧбны ӧнія киськасян оборудование, а водзӧ сэсся босьтчыны механизируйтӧмӧн нин чукӧртны вотӧссӧ да вӧчны сыысь чӧскыд вӧлӧга.
Казьтыштам, сиктса районъясысь ӧтиын олысьяскӧд аддзысьлігӧн регионӧн веськӧдлысь Ростислав Гольдштейн тӧдчӧдіс, мый республикаса правительство сетӧ став колана отсӧгсӧ меставывса аграрийяслы, кодъяс вӧчӧны сёян-юан. И налӧн эм став позянлуныс бура нажӧвитчыны.
–«Мама-предприниматель» программа петкӧдлӧ, мый весиг неыджыд овмӧдчӧминъясын эмӧсь аньяс, кодъяс зільӧны сӧвмӧдны ассьыныс сикт-грезднысӧ, – висьталӧ регионса видз-му овмӧс министерствоӧн юрнуӧдысь Сергей Елдин. – И миянлы тӧдчана, медым на пиысь быдӧн тӧдіс: сылы отсаласны.
–Эн полӧй! Босьтчӧй асланыд уджӧ, и ставыс артмас! – эскӧдӧ и Ольга Смирнова.
Гижӧдсӧ дасьтіс Александра АРТЕЕВА. Снимокыс ӧтуввезйысь.