Июнь 27 лунӧ миян странаын став 89 регионас мунас федеральнӧй тшупӧдын «Работа России. Время возможностей» ярманга. Такӧд йитӧдын шуӧма котыртлыны 1.900 площадка, на лыдысь кызь кыкӧс – Комиын.
–Кыдзи и быд во, удж вылӧ инасьӧм кузя ставроссияса тайӧ ярмангаыс мунас Томулов лун водзын, кор школаын ныв-зон сдайтӧмаӧсь нин экзаменъяс, вуз-техникум помалысьяс дорйӧмаӧсь нин диплом уджнысӧ. «Работа России. Время возможностей» ярманга нуӧдан медшӧр могыс – отсавны том специалистъяслы, оз на кӧ тӧдны, кытчӧ инасьны, бӧрйыны сьӧлӧм сертиныс удж.
Сэк жӧ предприятие-организацияясӧн, ас овмӧсъясӧн веськӧдлысьяслы эм мый вӧзйыны и опыта нин профессионалъяслы, кӧсйӧны кӧ найӧ вежны ассьыныс уджсӧ. Талун дас сизим сюрсысь унджык компанияын виччысьӧны татшӧм специалистъяссӧ, – висьталіс Россия Федерацияса премьер-министр Татьяна Голикова.
Делӧвӧй программанас позяс тӧдмасьны июнь 27 лунӧ «Работа России» порталын да Россияса минтрудалӧн соцсетьясын.
–Таво регионъяс тшупӧдын ставроссияса ярманга дырйиыс удж вылӧ босьтӧма 44 сюрс мортӧс. Та дырйи джынсьыс унджык волысьыс вӧлӧма вуз-колледж помалысь да студент, – пасйис Россияса минтрудаӧн веськӧдлысь Антон Котяков.
Ярманга дырйиыс быд регионын лоас аслас программа. Комиын удж корсьысьяслы позяс волыны Сыктывкарын Торгово-промышленнӧй палатаын да Ухтаын техническӧй университетлӧн «Буревестник» учебно-спортивнӧй комплексын лӧсьӧдӧм площадкаясӧ. Уджӧн могмӧдысьяс дорӧ шыӧдчывны позяс и регионса кар-районын республикаса занятосьт шӧринлӧн филиалъясын.
Предприятие-организацияӧн 200 гӧгӧр веськӧдлысь вӧзъясны экономикалӧн уна юкӧнын кык сюрс сайӧ вакансия.
Ярманга дырйиыс лоӧ нуӧдӧма тренингъяс, мастер-классъяс, позяс аддзысьлыны «Работа России» шӧринысь специалистъяскӧд. Торъя площадкаяс котыртласны СВО-са участникъяслы да вермытӧмъяслы.
* * *
Казьтыштам, РФ-са президент Владимир Путинлӧн индӧд серти татшӧм ярмангасӧ шуӧма нуӧдны быд во, тавосянь «Кадры» нацпроект весьтӧ.
Снимокыс ӧтуввезйысь. <> Гижӧдсӧ дасьтіс Александра АРТЕЕВА.