Июнь 27 лунӧ Комиын мунас федеральнӧй тшупӧдын «Работа России. Время возможностей» ставроссияса ярманга, коді нуӧдсьӧ РФ-са президент Владимир Путинлӧн индӧд серти таво вынсьӧдӧм «Кадры» нацпроект весьтӧ.
Тайӧ чукӧртчылӧмыс тӧдчана кыдз удж корсьысьяслы, сідз и уджӧн йӧзӧс могмӧдысьяслы.
Кыдзи юӧртіс Комиын удж, занятосьт да йӧзӧс уджӧн могмӧдан министерствоӧн веськӧдлысь Татьяна Майкова, миян регионын ярмангасӧ котыртласны Сыктывкарын торгово-промышленнӧй палатаын, Ухтаса государственнӧй техническӧй университетысь «Буревестник» велӧдчан да спорт комплексын, а сідзжӧ мукӧд кар-районын республикаса занятосьт шӧринлӧн кызь филиалын.
–Предприятие-организацияӧн да фирма-котырӧн кыксё гӧгӧр веськӧдлысь лӧсьӧдчӧны вӧзйыны ярманга вылӧ волысьяслы быдсикас профессия серти прӧст уджалан местаяс. Оз тырмыны нянь пӧжалысь и механик, инженер и экономист, уна мукӧд специалист. Тайӧ жӧ лунас лоӧ котыртӧма быдсикас мастер-классъяс, интерактивнӧй тренингъяс да с.в. Торъя площадкаяс шуӧма лӧсьӧдны вермытӧмъяслы да спецоперацияса участникъяслы, – висьталіс Татьяна Майкова.
Ярманга дырйиыс жӧ нуӧдасны том йӧзлы «Профессияяслысь фестиваль», кӧні опыта консультантъяс ышӧдасны-туйдасны колледж-техникум помалысьясӧс бӧрйыны специальносьт сертиныс удж.
Тӧдчана, кыдз висьталіс Татьяна Майкова, тавося ярманга вылас лоӧ пасйӧма наградаясӧн регион тшупӧдын «Лучший по профессии» конкурсын «Вурсьысь» нимпасын вермысьясӧс.
* * *
Казьтыштам, Комиын удж вылӧ инасян ставроссияса ярмангасӧ нуӧдӧны 2023 восянь. Таво апрельын сылӧн регионса тшупӧдӧ пырӧдчисны удж корсьысь 3,4 сюрс да уджӧн йӧзӧс могмӧдысь 203 морт. Чайтӧм серти, июнь 27 лунӧ федеральнӧй тшупӧдын ярманга вылас воласны оз этшаджыкӧн.
<> Гижӧдсӧ дасьтіс Александра Артеева. Снимокъясыс ӧтуввезйысь.