Луздорысь Леткаса культура керка лоӧма аслас «Покровские посиделки – от старины до наших дней» уджтасӧн культураын водзмӧстчысьяслы сьӧма отсӧг сетан Президент фондлӧн гранта конкурсын вермысьӧн, да сылы вичмӧма проектсӧ збыльмӧдӧм вылӧ 1.027.190 шайт.
Гранта сьӧм вылас кӧсйӧны ньӧбны луздорса фольклор паськӧм, сценавывса кӧмкот, микрофонъяса радиоаппаратура, баян да мукӧд коланатор, медым дасьтыны да нуӧдны Вежа Богородичалӧн Пӧкрӧв лунлы сиӧм гаж, кодӧс православнӧйяс пасйӧны октябрь 14 лунӧ.
–Миян районса быд сикт-грездын олысьяслӧн эм асланыс важся праздник, кодӧс пыдди пуктӧны да пасйӧны воысь-во: Прокопьевкаын – Рӧштво дырся ворсӧмъяс, Мутницаын – Трӧича, Гурьёвчиын – Илля лун. Леткаын, жаль, абу кольӧма татшӧм важся праздниксӧ пасъян традицияыс. И та вӧсна шуим ловзьӧдны миян сиктын нэмӧвӧйся йӧзкостса Пӧкрӧв лун, – юксис аслас мӧвпъясӧн Леткаса культура керкаысь директор Ольга Можегова.
Театральнӧй постановкаыс сы йылысь, кыдзи важӧн пасйылӧмаӧсь Пӧкрӧв гажсӧ, кутшӧм традицияяс сэк вӧлӧмаӧсь.
Шуам, талун этша нин коді тӧд вылас уськӧдас, мый Русьын буретш октябрь 14 лунсянь заводитлӧмаӧсь ворсны кӧлысь. И тайӧ кадас гӧтрасьысьяслысь семьяяссӧ шулӧмаӧсь медся крепыдӧн да шудаӧн.
Постановкаас пырӧдчас Леткаысь кык творческӧй котыр: ветеранъяслӧн «Молодость души» коллектив да том йӧзлӧн «Креатив». «Покровские посиделкисӧ» петкӧдласны оз сӧмын Леткаын, но и Луздор районса мукӧд сикт-грездын.
* * *
Казьтыштам, культураын водзмӧстчысьяслы отсӧг сетан Президент фондлӧн выль конкурсӧ позьӧ пырӧдчыны июль 10 лунӧдз. Грант вермасны босьтны некоммерческӧй котыръяс, асшӧр уджалысьяс, ООО-яс, бюджет учреждениеяс. Вермысьяслы татшӧм сьӧма отсӧгсӧ урчитӧма 100 сюрссянь 20 миллион шайтӧдз.
Конкурсӧ пырӧдчӧм могысь позьӧ шыӧдчыны кӧть кутшӧм творческӧй уджтасӧн: небӧг лэдзны, гастроль котыртны, выль концерт дасьтыны да с.в. Та дырйи медтӧдчанаыс – мед вӧзйӧм проектыс отсаліс сӧвмӧдны Коми Республикаын культура.
<> Елена Осипова. Снимокыс ӧтуввезйысь.