Дас вит во сайын, буретш Ыджыд Вермӧмсянь 65 во тыригкежлӧ, коми газет-журнал котырын уджалысьяс дасьтісны тайӧ зэв тӧдчана праздникыслы сиӧм «Победалӧн вунлытӧм тулыс» сьыланкыв чукӧр, кытчӧ лои ӧтувтӧма рочӧн да комиӧдӧмӧн Великӧй Отечественнӧй война кадся сьыланкывъяс.
Вир кисьтана курыд кадӧ чужӧм тайӧ мича сьыланкывъясыс ышӧдісны фронт вылын и тылын Победа дорысьясӧс эскыны бурас, югыд аскиа лунас. И ӧнӧдз найӧ юргӧны сиктын и карын, вӧрзьӧдӧны мортлысь ловсӧ, йиджтысьӧны сьӧлӧмас, шуда и шог лунӧ коланаӧсь да радейтанаӧсь миянлы «Катюша», «Эх, дороги», «В землянке», «Синий платочек»…
Ыджыд Вермӧмсянь 80 во тырӧм водзвылын шуим йӧзӧдны 10 «Коми му» газет лыддьысьяслы козин пыдди некымын сьыланкыв.
Землянкаын
Нӧйтчӧ кӧрт пачын дзескӧдӧм би,
Сирыс пес вылас синва кодь сӧдз.
Гудӧк шы улӧ казьтывлам ми
Чӧдлач синъяс да нюмъя вом рӧч.
Шӧпкис тэ йылысь рассялӧм эрд,
Москва гӧгӧрса вольсасьӧм чӧв,
Кӧсъя, мед эськӧ кылiн и тэ
Нормӧм гӧлӧсӧс, кӧн кӧть эн вӧв.
Ӧнi ме дорысь ылын тэ зэв,
Лымъя саваныс лача оз коль.
Тэӧдз ӧнi он лэб ни он кев,
Смертьӧдз воськолыс куим-ӧ-нёль.
Сьыв жӧ, гудӧкӧй, бушковсӧ вен,
Чуксав ылалӧм шудсӧ, эн пов!
Кын землянкаын онялӧ мен
Тэнад муслунӧн ымралысь лов.
Катюша
Дзордзалӧны яблоня и груша,
Юяс весьтын шлывгӧ-кывтӧ ру,
Кыркӧтш дорӧ волывлӧ Катюша
Крут кыр вывсянь видзӧдлыны ю.
Петавлывлӧ, гажа сьылан сьывлӧ,
Кутш кодь повтӧм зонсӧ сьылӧдӧ,
Кодсянь уна мелi кывсӧ кывлiс,
Кодсянь гижӧд дзебасын видзӧ.
Ой тэ, сьылан, нывлӧн гора сьылан,
Юсьӧн зарни шондi бӧрся кывт,
Зонлы ылысса граница вылын
Муса нывсянь козьнав шоныд кыв.
Мед оз вунӧд, кодi сылы муса,
Медым нывлысь кывлас сьылан гор.
Медым видзас ассьыс чужан мусӧ,
А Катюша видзас донатор.
Дзоридзалӧ яблоня и груша,
Юяс весьтын шлывгӧ-кывтӧ ру,
Кыркӧтш дорӧ волывлiс Катюша
Крут кыр вывсянь видзӧдлыны ю.
Медбӧръя кось
Ми бура шойччӧм эг нин тӧдлӧй косьяс бӧрын,
Пыр вӧлi некор – тыштӧ личӧдны оз позь.
Европа джынсӧ кыссим, кынӧм вылын гӧрим,
А аски, гашкӧ, лоас медбӧръяысь кось.
Припев:
Ещӧ неуна вай зэвтлам вын,
Медбӧръя кось пӧ медся сьӧкыд.
Гаж бырис гортысь, кӧн чужанiн,
Но он тӧд, кӧнi суас рӧкыд.
Ме нёльӧд во нии песся мустӧм война вылын.
Бать-мамлӧн нёльӧд, медбӧръяӧн чужтӧм пи.
Мен эськӧ гортын пӧся радейтны том нылӧс,
Да Рӧдиналы воча инмӧдлыны ки.
Припев:
Ми аски петам чорыд рукопашнӧй бойӧ,
Россия-мамлы сетам медбӧръяысь долг.
Некутшӧм полӧм абу татчӧ усьны шойӧн,
Да ловйӧн кольны век жӧ асьным пуктам мог.
Припев:
Ещӧ неуна вай зэвтлам вын,
Медбӧръя кось пӧ медся сьӧкыд.
Гаж бырис гортысь, кӧн чужанiн,
Но он тӧд, кӧнi суас рӧкыд.
Победалӧн вунлытӧм тулыс
Кор енэжсянь шондiыс дзирдалiс яр,
Кор ловзис и ваыс, и муыс,
Да доналӧм сынӧдас ыпъялiс жар,
Сэк воис Победалӧн тулыс.
Вот кольӧны вояс, но некор оз ло,
Мед паметьным та йылысь кусiс:
Ми вир сорӧн, тшын-би пыр кыссим нёль во,
Мед пуксис Победалӧн тулыс.
Кӧть сёрджык тэ чужлiн, но статя да ён,
Сувт миянкӧд тшӧтш знамя улас,
Мед сьӧлӧмад йиджтысяс тэныд, том зон,
Победалӧн вунлытӧм тулыс.
А кодкӧ кӧ лӧсьӧдӧ бара выль дой
Сё ранаӧн парсалӧм мулы,
Ми казьтылам налы, мый тӧдлiм сьӧд вой,
Да вӧлi Победалӧн тулыс.
А сынӧдыс сӧстӧм, да енэжыс лӧз,
И тӧвруыс бан боктӧ нюлӧ.
Мед дзирдалас шондi, мед пасъясны йӧз
Победалысь лунсӧ быд тулыс.
Алёша
Мед лым пиас ыбъясыс вошӧм,
Мед лым пиас вошӧм,
Мед лым пиас ыбъясыс вошӧм,
Мед зэръясӧн кисьталӧ тат,
Век сулалӧ тані Алёша,
Алёша, Алёша,
Век сулалӧ тані Алёша –
Болгар муын русскӧй салдат.
И сьӧлӧмлысь тіпкӧмсӧ торкӧ,
Век тіпкӧмсӧ торкӧ,
И сьӧлӧмлысь тіпкӧмсӧ торкӧ,
Кор пуляыс швачӧдіс дыр,
Мый сы вылын из гимнастёрка,
Пыр из гимнастёрка,
Мый сы вылын из гимнастёрка,
Дай сапӧгыс изйысь жӧ пыр.
Зэв унаӧс сэки ми воштім,
Зэв унаӧс воштім,
Зэв унаӧс сэки ми воштім,
И кымынӧн юрсӧ эз вай,
Но мый буретш тайӧ Алёша,
Алёша, Алёша,
Но мый буретш тайӧ Алёша,
Болгар муын тӧдӧны став.
Лӧнь му вывсьыс вывланьӧ кайӧм,
Лӧнь му вывсьыс кайӧм,
Лӧнь му вывсьыс вывланьӧ кайӧм,
И эновтны оз вермы кыр.
И нывъяслы дзоридз оз ваяв,
Оз ваяв, оз ваяв,
И нывъяслы дзоридз оз ваяв,
Сы кок улын дзоридзыс тыр.
И тӧдса, кыдз шонді да тӧлыс,
Кыдз шонді да тӧлыс,
И тӧдса, кыдз шонді да тӧлыс,
Кыдз енэжыс кодзулӧн тыр,
Век сулалӧ кар вылас чӧла,
Век сулалӧ чӧла,
Век сулалӧ кар вылас чӧла,
И кутас тадз сулавны пыр.
Мед лым пиас ыбъясыс вошӧм,
Мед ыбъясыс вошӧм,
Мед лым пиас ыбъясыс вошӧм,
Мед зэръясӧн кисьталӧ тат,
Век сулалӧ танi Алёша,
Алёша, Алёша,
Век сулалӧ танi Алёша –
Болгар муын русскӧй салдат.
<> Комиӧдісны Сергей КУЛИКОВ, Олег Уляшев да Нина ОБРЕЗКОВА.
Дасьтіс Анна ПОПОВА. Снимокъясыс ӧтуввезйысь.