Кыдзи и пыр, Сыктывкарса коми культура шӧрин, «Коми войтыр» ӧтмунӧмса юкӧн да юркарса администрацияысь культура управление апрельын котыртлісны «Кор? Кӧні? Мый?» юр песан ордйысьӧм.
Нимкодь, мый ворсӧмас вочасӧн пырӧдчӧны выль командаяс. Шуам, таво 12 котыр петкӧдліс тӧдӧмлунсӧ. На пӧвстын Коми йӧзӧдчан керкаысь «Ас йӧз», Сыктывкарса 33ӧд номера школаысь «Сярганъяс», «КодзувКотыр» сборнӧй, «Юрган» телекомпанияысь «Кошка-кань», Кулӧмдін районса велӧдан управлениеысь «ШондіБанда», Национальнӧй библиотекаысь «НБРК», Емдінса землячествоысь «Емдінса», Эжваса коми культура шӧринысь «Эжваса комияс». Медводдзаысь на ворсісны Эжваса коми культура шӧринысь «Гордаяс», Коми Республикаса войтырлӧн Ёртасян керкаысь «АттӧДивӧ», а сідзжӧ «Эжвайывсаяс» да «МИ» том коми войтырлӧн «Ми».
Медводдза аддзысьлӧмыс вӧлі апрель 10 лунӧ. Тайӧ ворсӧмас витысь стӧча «лыйыштісны» журналистъяс – финалӧ петісны «Ас йӧз» да «Кошка-кань».
Мӧд ворсӧмас апрель 17 лунӧ сизим стӧч вочакывйӧн водзӧ петісны «КодзувКотыр», «ШондіБанда» да «Ми».
И со кольӧм четвергӧ Коми культура шӧринын юалӧм индалан дурпопа пызан гӧгӧр ӧкмис вит команда. На бӧрся сюся видзӧдісны жюритысь-донъялысьяс. Ӧти юалӧм, мӧд, коймӧд… Дерт, сетчыны некод эз кӧсйы. Но дас кыкнан юалӧм бӧрын жюри шуис, вермысьыс пӧ миянлы тӧдса нин, да нӧшта кык командалӧн стӧч вочакывйыс ӧтмында, та вӧсна сетам содтӧд юалӧм…
Веськыда шуа, та пӧрйӧ менӧ, кыдз «Ас йӧз» котырса капитанӧс, нимкодьӧдісны выль ворсысьяс – «Миысь» томулов.
Найӧ стӧча вочавидзисны весиг сэтшӧм юалӧмъяс вылӧ, мыйӧ ми сконйыштчим, да лоины коймӧд местаын.
Мӧд места шедӧдіс «Кошка-кань», а медся вынаӧн таво лои «ШондіБанда».
Та пӧрйӧ медбур ворсысьӧн шуисны «Кошка-каньысь» Елена Хозяиноваӧс.
А медбур юалӧмсӧ сетіс Кулӧмдін районса Пожӧг сиктысь коми кыв да литература велӧдысь Елена Игнатова. Со сійӧ: Нывъяс водзын вӧлi чукӧртчӧны ӧти керкаӧ, а зонъяс на вылын сералӧны да шуалӧны: «Точ, килим-калим, сера люзим-лязим». Унаӧн тӧдӧны, мый йылысь сёрниыс, но соссьӧны сыысь. Тӧдмалӧй, мый йӧзыс дзебӧны тайӧ кывъяс улас?
Вочакывйыс: зу да той.
Вайӧда тавося «Кор? Кӧні? Мый?» ворсӧмысь нӧшта некымын юалӧм.
Елена Быстровасянь. Тайӧ мортыс уна лыддьысьӧма, тӧдлӧма некымын кыв, серпасасьӧма, вуджӧдчӧма коми кывйӧ. Морт нимыс ӧнӧдз на олӧ да нималӧ каръясын да сиктъясын, весиг Урал гӧра йывлы сетӧма сылысь нимсӧ. Сы йылысь гижӧма и преданиеяс. Тӧдмалӧй, кодi тайӧ?
Перымса Степан.
Рассыхаев Микол Ӧльӧшсянь. Сыктывкар 245 во сайын лои карӧн. Такӧд йитӧдын юалӧм: 1913 воын Усть-Сысольскын тайӧс вӧлі вӧчӧны 105 морт. Во чӧжнас налӧн артмӧма 735 сюрс. Ӧнія кадӧ сійӧс вӧ-чӧны жӧ. И та кындзи сійӧс позьӧ аддзыны сідзжӧ туй бокъясысь. Мый тайӧ?
Кирпич.
Светлана Дубининасянь. Коми легендаын висьтавсьӧ: Исус Кристосӧс крест бердӧ тувъялiгӧн колӧма вит кӧрт тув, и витӧдсӧ колӧма тувъявны морӧс шӧрас. Но тайӧ абу лэдзӧма витӧдсӧ тувъявны. Исус та вылӧ шуӧма: меным бур вӧчӧмысь пӧ ӧнiсянь тэ кутан йӧзкӧд ӧти пызан сайын сёйны. Кодӧс тадзи аттьӧалӧма Исус Кристос?
Гутӧс.
Ольга Камаевасянь. Ӧтар боксянь – видзӧ кок, мӧдар боксянь – полысь морт. А бур кӧзяйкалӧн оз на и вичмы. Мый тайӧ?
Нямӧд.
Елена Быстровасянь. Быд гожӧм асыв да рыт, а тӧвнас сӧмын асывнас ыджыд мам вӧчӧ тадзи кинас: ӧти чунь, сэсся кык чунь, сэсся куим, сэсся нёль. И тадз колӧ сёысь. Та бӧрын ми ставӧн пӧтӧсь. Мый вӧлі вӧчӧ ыджыд мам?
Лысьтысьӧ.
Галина Пунеговасянь. Тӧдмалӧй уна войтырлы тӧдса нӧдкыв:
Юра – вемыс абу, пеля – оз кыв, мышка – кынӧмыс абу. Мый йылысь нӧдӧма?
Нинкӧм.
<> Елена Плетцер. Снимокъясыс Сыктывкарса коми культура шӧринысь.