Коми Республикаса вужвойтырлӧн шылада-драмаа театр шедӧдіс челядьлӧн да том йӧзлӧн «Движение Первых» ставроссияса общественно-государственнӧй ӧтмунӧмлысь грант, и тайӧ сьӧм вылас таво июньын лоӧ збыльмӧдӧма «Майбыр» театральнӧй уджтас.
Тайӧ проект сертиыс челядь да томулов театрын чукӧртчылӧм-аддзысьлӧм дырйи сӧвмӧдасны коми кывйысь да литератураысь тӧдӧмлуннысӧ, пырӧдчасны вужвойтыр традицияясӧ, тӧдмаласны, кыдзи колӧ дасьтысьны сцена вылын ворсны, театрса серпасалысьяслӧн туйдӧм-велӧдӧмӧн вӧчаласны реквизит, тӧдмасясны уна мукӧдторйӧн.
Квайт лун чӧж театр вочаалас Сыктывкарса детплощадкаясысь челядьӧс. Налы петкӧдласны спектакльяс да нуӧдасны мастер-классъяс.
Ичӧт войтыр видзӧдасны коми мойдъяс, кодлы колӧ, рочӧ вуджӧдӧмӧн, аддзысьласны нималана артистъяскӧд, тӧдмаласны, кыдзи колӧ сцена вылын асьнысӧ кутны, а сідзжӧ мичаа сёрнитны, велӧдчасны вӧчавны важся коми серъяса маскаяс да видзӧгъяс, пыраласны экскурсияӧн кулиса-посйӧд сайӧ да видзӧдласны, мый вӧчсьӧ театрса цех-мастерскӧйясын.
Тайӧ квайт луннас театрӧ волас квайтсёысь унджык нывка да зонка.
Колӧ тӧдчӧдны, «Майбыр» уджтаснас Коми Республикаса вужвойтырлӧн шылада-драмаа театр пуктӧ ас водзас мог туйдны-ышӧдны челядьӧс да том йӧзӧс пыдди пуктыны да видзны коми войтырлысь нэмӧвӧйся озыр культурасӧ, пырӧдчыны коми театральнӧй творчествоӧ.
Тайӧ проектыс отсалас паськыдджыка вӧдитчыны «Коми театр быдӧнлы» уджтасӧн, водзӧ нуӧдны «Ме радейта коми кыв» акция, мед томулов окотапырысьджык волывлісны национальнӧй постановкаяс вылӧ, тшӧтш и школасяньыс ёрта котырӧ ӧтувтчалӧмӧн.
* * *
Челядьлӧн да том йӧзлӧн «Движение Первых» ставроссияса общественно-государственнӧй ӧтмунӧмсянь грант босьтӧм могысь 2025 воын Коми Республикасянь вӧзйӧмаӧсь кызь проект, вермысьӧн лоӧма нёль, на лыдын зэв бур рейтинга – Коми театрлӧн уджтас.
Россия пасьталаысь шыӧдчӧмаӧсь 5.567 проектӧн, на лыдысь донъявны шуӧмаӧсь 3.592-ӧс, а вермысьӧн лоӧма 514. Тӧдчана, мый та боксянь Коми театрлӧн страна пасьталаын рейтингыс – 87-ӧд. А Россияысь сӧмын кык театр босьтӧмаӧсь таво тайӧ грантсӧ.
Евгения Савина.
Снимокъясыс Коми Республикаса вужвойтырлӧн шылада-драмаа театрысь.