Кольӧм вежалунӧ Коми Республикаса вужвойтырлӧн шылада-драмаа театрын петкӧдлісны Нина Обрезковалысь «Кок шонтысьяс» кык юкӧна теш.
Выль спектакльлӧн режиссёрыс – Россияса искусствоын заслуженнӧй уджалысь Светлана Горчакова, а сцена вывсӧ да паськӧмсӧ серпасаліс Коми Республикаса заслуженнӧй уджалысь Эрих Вильсон. Йӧктӧмъяссӧ пуктіс Коми Республикаса правительстволӧн премияа лауреат Ольга Просужих.
Тешын шӧр рольясас – Коми Республикаса народнӧй артист Андрей Епанешников (Мишӧ) да Коми Республикаса заслуженнӧй артистка Альбина Карманова (Клавди Мишӧлӧн гӧтыр). Сідзжӧ ворсӧны Елена Чувьюрова, Галина Подорова, Роман Поличенко, Дарья Рябцева, Кристина Поскребаева да Антон Куратов.
Спектакль заводитчигӧн ламбада шылад улӧ залӧ пырӧ Мишӧ (Андрей Епанешников), ветлӧма тшакла, и видзӧдысьясӧс, аньясӧс, йӧктӧдыштӧ, а сэсся гӧститӧдӧ кампетӧн. Тадзи видзӧдысьяс (стӧчджыка кӧ, аньяс) ылалӧны да дасьӧсь йӧктыны сьӧд уска Мишӧкӧд. Но збыльвылас ыззьӧдана шыладыс – лэч, кытчӧ уна во сайын шедлӧмаӧсь том мужичӧй-ань, да воясӧн сійӧ зэлалӧма пыр ёнджыка…
И сідз, сцена вылын шӧр арлыда гозъя: Мишӧ да Клавди. Видзӧдан да, ставыс налӧн бур: олӧны ӧта-мӧдсӧ радейтӧмӧн, ышмӧны-кутчысьлӧны ламбада улӧ. И друг пырӧ на ордӧ суседкаыс Матрен тьӧт (Галина Подорова) да висьталӧ вӧт, коді лёк водзын кырнышлӧн курксӧм кодь. Клавди тӧдмалӧ, мый верӧсыс сійӧс кызь во нин пӧръялӧ. Гозъялӧн да тшӧтш и Ӧньӧ пиыслӧн (ворсіс Роман Поличенко) шудыс пасьмунанвыйын.
Спектакльын серамбана серпасыс бергӧдчӧ шум-зыкӧ. И ламбада шыладыс тані мӧд рӧма нин (колӧ пасйыны, спектакль чӧжыс сійӧ юргӧ), абу кыпыд, ылӧдчан да пӧръясян шылад.
Кыдзи пасйи нин, оз сӧмын Клавдилӧн да Мишлӧн гозъякост олӧмыс трачкакыв, но и налӧн пиыслӧн. Ӧньӧ вайӧдӧ бать-мамыскӧд тӧдмӧдны карысь невестаӧс, коді вермас лоны зонлӧн чой, а Мишӧлӧн – ныв.
Альбина Карманова зэв бура ворсіс Клавдиӧс, кодлӧн нывбаба шудыс вӧлӧма рыж. Видзӧдысь эз нин нимкодясь, а шогаліс Клавдикӧд. Артистка, кыдзи и пыр, зэв бура сяммис петкӧдлыны гӧтырлысь да пиыс вӧсна мамлысь шогалӧмсӧ. Ышмысь Мишӧӧс тшӧтш быттьӧ нӧшкӧн вартісны. Сійӧ и мӧвпыштны эз вермы, мый курортын коркӧя каньялӧмыс уна во мысти сконйыштас, да лэчкас шедас и аслас пиыс.
Такӧд йитӧдын колӧ пасйыны и Эрих Вильсонлысь уджсӧ, кыдзи сійӧ мӧвпыштӧма-серпасалӧма сцена вывсӧ. Пожӧм да кыдз пу улӧ меститӧма семьялысь керка жыр. Шӧрас сулалӧ ыджыд пач. Тайӧ тшӧтш аслыспӧлӧс пас – семья би. Пу вужъясыс да вожъясыс, ӧти-кӧ, индӧны олӧм дзугсьӧм, а мӧд-кӧ, ӧта-мӧд костын топыд йитӧд вылӧ. Спектакль помасьӧ бура, семья оз пазав, мӧдарӧ на, паськалӧ.
–Кыдзи донъялан ассьыд геройтӧ, тайӧ спектакльсӧ, колӧ-ӧ татшӧмыс ӧнія видзӧдысьлы? – юалі Андрей Епанешниковлысь.
–Дерт жӧ, татшӧмыс колӧ! Тайӧ верстьӧӧс шмонь пыр кутшӧмакӧ ӧлӧдӧм. Кыдз шуласны, беддьыд кык пома, и кодарыс на тэныд инмас. Курорт роман, мужичӧй-аньлӧн каньялӧм вермас чорыда мӧрччыны. Колӧ пыр кутны тӧд вылад, мый кокньыд вежӧрӧн олӧмыд, ышмӧмыд, гашкӧ, и шогӧн бергӧдчас. И вермас лоны, тшӧтш и челядьыдлысь олӧмсӧ тшыкӧдан. Кыдзи и менам герой Михаил Иванович «Кок шонтысьясын». Театр та йылысь висьталӧ видзӧдысьлы, кыдз шуласны, ворсӧм пыр. Тайӧ миян теш, да ставыс бура помасьӧ, но век жӧ мӧвпыштӧй, – шуӧ Андрей Епанешников.
Роман Поличенко Ӧньӧлысь майшасьӧмсӧ зэв жӧ бура петкӧдліс.
–Мый эськӧ вӧчин, збыль олӧмас кӧ тадзи лои тэкӧд?
–Збыль олӧмын ме татшӧмсӧ некор эг аддзыв, сы вӧсна та кузя нинӧм шуны ог куж. Но меным кажитчӧ ворсны Ӧньӧӧс. Сійӧ радейтӧ нывъясӧс, кужӧ накӧд сёрнитны. Но Ӧньӧ и мӧвпыштны эз вермы, мый тадзи вермис лоны сыкӧд. Чайта, тайӧ тшӧтш менам геройлы водзӧ вылӧ урок вӧлі.
Пьесалӧн автор Нина Обрезкова пасйис, мый сылы кажитчис, кыдзи ворсісны артистъяс. Режиссёр бура бӧрйӧма найӧс.
–Нина Александровна, Светлана Гениевна спектакль сдайтігӧн шуис, мый постановкасӧ дасьтігас пьесаас мыйсюрӧ колӧма содталыштны, лӧсьӧдыштавны.
–Ме некымынысь бергӧдчылі сы дорӧ. Сійӧ эз вӧв дженьыд, а мӧд сикасджык. Мӧвпалі, мися, гашкӧ, колӧ пыртны и содтӧд геройясӧс, кодъяс йылысь сёрнитӧны Клавди да Мишӧ, но сэсся эг, мед пьесаыс оз артмы сериал кодь кузь. Но ме пырті Максимӧс (ворсіс Антон Куратов), мед вӧчны хеппи-эндсӧ, мед Таня (ворсіс Кристина Поскребаева) эз коль ӧтнас. А сідз, ме серти кӧ, постановкаыс артмис. Чайта, кутасны видзӧдны.
* * *
Пасъям, матысса кадӧ «Кок шонтысьяс» петкӧдласны апрель 6 лунӧ.
<> Екатерина МАКАРОВА. Снимокъясыс Евгения МУРАВЬЁВАЛӦН.