Февраль 21 лунӧ «Коми войтыр» ӧтмунӧм бара нуӧдӧ «Ӧтувъя коми диктант». Дас ӧти во ӧтувтӧ миянӧс тайӧ акцияыс. Та пӧрйӧ Россияын Айму дорйысьяс да Комиын Геройяс волы сиӧм гижӧдсӧ дасьтic Александр Шебырев. Кутшӧм ру сетӧ-козьналӧ миянлы коми диктантыс, да мыйлаколӧ пырӧдчыны акцияяс, висьталӧны миян вомъёртъяс.
Олег Лажанев, «Коми войтыр» ӧтмунӧмса исполкомӧн веськӧдлысь:
–Кольӧм во диктантсӧ гижис 4,5 сюрс сайӧ морт. Таво миянлы колӧ кыпыда воськовтны 5 сюрс сайӧ. Вермам ӧд? Вермам!
Тайӧ велӧдан акциясӧ котыртӧма коми кыв паськӧдӧм да комиӧн гижан сям кыпӧдӧм могысь. А таво сiдзжӧ мед и Айму вӧсна Ыджыд тыш да пӧль-пӧчнымӧс казьтыштны.
Дона войтыр! Кора тiянӧс кыпыда да радпырысь волыны диктант нуӧданінъясӧ да пырӧдчыны «Коми войтырлӧн» акцияӧ! Ставным, паськыда, сьӧлӧмсянь! Мед «Ӧтувъя коми диктантыс» сетас быдӧнлы позянлун гӧрдитчыны рӧдвужнад, кодъяс тышкасисны вӧрӧглы паныд да вермисны сійӧс, отсалicны миян страналы!
Виччысям!
Роман Носков, Коми Республикаын национальнӧй политикаса министр:
–«Ӧтувъя коми диктант» акция ӧтувтӧ став коми войтырсӧ сы вылӧ видзӧдтӧг, кӧні найӧ олӧны: Комиын, Москваын, Петыркарын, Мурманскын, Ямалын да уна мукӧдлаын.
Коми диктант гижигӧн ми матысяньджык тӧдмасям коми гижысьяскӧд.
Коми – ловъя кыв, и вермас торъявны весиг орчча сиктъясын. Но матыстӧ ставнымӧс литературнӧй коми кыв – сыӧн ми гижам диктантсӧ.
Диктант дырйи ми велӧдчам пыдди пуктыны чужан кывнымӧс – зілям гижны правилӧяс торкавтӧг.
«Ӧтувъя коми диктант» – тайӧ кыпыд гаж, кӧні ми кылам асьнымӧс комиясӧн!
Ольга Останкова, «Коми войтыр» ӧтмунӧмлӧн Сыктывдiн районса юкӧнӧн веськӧдлысь:
–Быд во ми гижам «Ӧтувъя коми диктант», и унаӧн юасьлӧны, мыйла пӧ? Да сы вӧcна мый миянлы дона асланым чужан кывным. Школаысь важӧн нин петiм, но быд во виччысям диктант лунсӧ, ӧд сэки чукӧртчам ми, коми йӧз, сёрнитам комиӧн, и сьӧлӧм выланым долыд, мый кывным юргӧ. Быд во диктант гижысьыс содӧ, А сідзкӧ, ми мунам веськыд туйӧд да кутам водзӧ сӧвмӧдны радейтана коми кывнымӧс!
Лидия Липина, Калининградын олысь коми ань:
–Коми диктант таво гижам дас ӧтиӧдысь нин. Зэв нимкодь, мый текстсӧ дасьтӧма Александр Шебырев – Пожӧг вожысь петӧм морт.
Олӧмыс нуӧдiс менӧ Коми муысь ёна ылӧ, но чужан кывйӧс ог вунӧд: и тані верӧскӧд быдлаын – кӧть гортын, кӧть улич вылын – сёрнитам комиӧн.
Век кута лача, мый кодкӧ кылас сёрнинымӧс да комиӧн жӧ шыӧдчас миян дорӧ: «Чолӧм!». Но эз на тай тадзи лолы…
Диктантсӧ гижа онлайн, водзджык. Чайта, ме кодьыс лоас оз этша, комияс ӧд олӧны оз сӧмын миян странаса уна пельӧсын, но и суйӧр сайын.
Ыджыд аттьӧ колӧ висьтавны библиотекаяслы, буретш найӧ котыртӧны тайӧ уджсӧ.
Эска, Кулӧмдiн районын коми диктант гижысьыс лоас медуна!
Наталья Канева, Изьва районысь Сизяб сиктса администрацияӧн юрнуӧдысь:
–«Ӧтувъя коми диктант» акция йылысь медводдзаысь ме тӧдмалi Санкт-Петербургын велӧдчигӧн. Сэки жӧ и веськалі коми шӧринӧ, и мыйта бур да кыпыд казьтылӧм сэксянь коли! А мыйта мортӧс диктантыс йитӧ-ӧтувтӧ!
Диктант гижӧмыс оз сӧмын коми гижанног, но и коми сёрни, традицияяс видзӧ. Питер карысь ме вои уна во сайын нин, но диктантыс век менам сьӧлӧмын, и гижа сiйӧс окотапырысь, и ог сӧмын гижан правилӧяс казьтыштӧм могысь.
Надежда Мисюряева, «Коми войтыр» регионкостса ӧтмунӧмлӧн Вуктыл районса юкӧнӧн веськӧдлысь:
–Школаын коми кыв ме эг велӧдлы, та понда «Ӧтувъя коми диктантыс» отсалӧ меным уна выльтор тӧдмавны да ышӧдӧ матыссаяскӧд да тӧдсаяскӧд тшӧкыдджыка комиӧн сёрнитны.
Мӧд во нин судзӧда да окотапырысь лыддя республикаса коми газет-журнал: «Коми му», «Би кинь», «Чушканзi», «Йӧлӧга», «Войвыв кодзув».
Анатолий Терентьев, «Ямал-Медиа» телекомпанияысь этша лыда вужвойтыр проектъяс юкӧнса редактор, «Изьватас олэм» программаса автор:
–Чужан кывъя диктант пальӧдӧ миянлысь вежӧр, чуксалӧ кывны асьнымӧс ӧтувъя войтырӧн. Ямалын сiйӧс уна во нин нуӧдӧ этша лыда вужвойтырлӧн тӧжд-мог кузя департамент. И изьватас яран, ӧстяк да селькуп войтыръяскӧд тшӧтш гижӧ диктантсӧ. Унаӧн на пиысь комисӧ школаын эз велӧдлыны, и найӧ тӧдмалӧны выль шыпасъяс, кылӧны, кутшӧм мичаа юргӧны коми кывъяс, кӧть абу ставыс на пиысь налы тӧдса. А миян эм позянлун чукӧртчывны, вӧчны снимок да йӧзӧдны интернетын.
Диктант гижӧны том и олӧма. Ми, Обдорса изьватас, радӧсь, мый эм позянлун тӧдны чужан кыв, сёрнитны сыӧн да сетны тайӧ тӧдӧмлунсӧ том войтырлы. Войтыр олӧ, кор эм чужан кыв! И Из сайын сiйӧс тшӧтш кыпӧдӧны да вылӧ донъялӧны!
Ольга Хасанова, «Коми войтыр» ӧтмунӧмлӧн Печора карса юкӧнӧн веськӧдлысь:
–Нимсьыс нин тыдовтчӧ, мый ми диктант гижан лунӧ, вежонӧ ӧтувтчам ыджыд да уна нэмса РӦД дорӧ, РӦДВУЖ гӧгӧр.
Кодкӧ бура, кодкӧ омӧльджыка тӧдӧ коми грамматика-пунктуациясӧ, но ми, унджыкыс, гижам коми диктантнымӧс ог «5» да «4» шедӧдӧм ради, а кӧсъям аддзывны асьнымӧс томӧн, школаын велӧдчан кадсяӧн, та вӧсна и гижигас чужӧмным пыр нюма.
Зэв мича, сьӧлӧм вӧрзьӧдана, мукӧддырйи шемӧсмӧдана текстъяс вӧзйӧны миянлы нималана гижысьяс. Ыджыд аттьӧ таысь налы!
Олам кӧ карын, диктант дырйи бара на позяс аддзысьлыны тӧдса йӧзкӧд. Татшӧм кыпыд аддзысьлӧмъяс бӧрын окота нимкодясьны-сёрнитны чужан кывйӧн. Ӧні и каръясын тшӧкыдджыка позьӧ кывны коми сёрнитӧ – ог полӧй ни ог яндысьӧй сыысь. А унаӧн босьтчӧны тшӧтш ас рӧдсӧ туявны.
Чайта, и та вӧсна, и уна мукӧд помка вӧсна позьӧ нин волыны да ӧтув гижны чужан кывъя диктант.
<> Юасис да гижӧдсӧ дасьтіс Инесса Орёл.