Декабрь 22 лунӧ опера да балет театрын петкӧдчис войтыркост конкурсъясса лауреат, енбиа пианист Иван Бессонов.
Кыдзи пасйисны театрын, Иван Бессоновлӧн аслас ворсанног, да сійӧс ыдждӧдлӧны том Моцартӧн. Иван ичӧт арлыдӧн на лоӧма «Россия» телеканалын «Синяя птица» ставроссияса конкурсын вермысьӧн.
2018 воын том виртуоз Россияысь медводдзаӧн вермӧма Eurovision Young Musicians («Классическое Евровидение») конкурсын. Ӧні петкӧдчӧ миян странаса нималана дирижёръяскӧд: Владимир Спиваковкӧд, Валерий Гергиевкӧд, Александр Сладковскийкӧд, Владимир Федосеевкӧд.
Иван Бессоновлӧн творческӧй кудйын – Мариинскӧй театрса, Е.Ф.Светланов нима Россияса государственнӧй, П.И.Чайковский нима государственнӧй академическӧй ыджыд симфоническӧй, Татарстанса государственнӧй симфоническӧй, Россияса Национальнӧй филармоническӧй, «Новая Россия» государственнӧй симфоническӧй оркестръяскӧд петкӧдчӧм.
Сыктывкарын сійӧ ворсіс опера да балет театрса симфоническӧй оркестркӧд, кодӧн веськӧдлӧ Ариф Дадашев. Юргис фортепианолы оркестркӧд кык концерт: В.А.Моцартлӧн «Концерт №23 ля мажор» да П.И.Чайковскийлӧн «Концерт №1 сибемоль минор». Кыкнанныс зэв мыла да сьӧлӧм вӧрзьӧдана. А енбиа виртуозлӧн ворсӧмыс лоис козинӧн татчӧс меломанъяслы.
–Иван Бессоновлӧн гастрольыс уна во вылӧ нин артыштӧма, тшӧкыда ветлывлӧ Россияса, суйӧрсайса фестивальяс вылӧ да.
И миянлы зэв нимкодь, мый енбиа пианист петкӧдчис Сыктывкарын. Тайӧ шылада гажсӧ котыртӧма Коми Республикаса юралысьлӧн грант весьтӧ, – висьталісны Коми Республикаса опера да балет театрын.
<> Екатерина МАКАРОВА. Снимокъясыс ӧтуввезйысь.