Коми КВН-лы сиӧм гимн-кыпса тайӧ кывъясыс быд пӧрйӧ ышӧдӧны шмонитны радейтысьясӧс петкӧдчыны серамбана гажас. Со и та пӧрйӧ юркарса да республикаса быдса нёль котыр ордйысисны шмонитны кужӧмын – декабрь 6 лунӧ Сыктывкарса «Октябрь» шӧринын венласисны медводдза местаяс вӧсна.
Медвылыс местаяс вӧсна венласисны юркарысь «КилоМэтръяс», «Эжва йывса бабаяс», Кӧрткерӧс районса Одыбысь «Коланторъяс» да Висерысь «Едрит-кудрит». А хедлайнералісны, ордйысьысьяс кындзи петкӧдчисны Кулӧмдін районысь «Скӧрӧдумсаяс» да «ШОК».
Конкурсын венласьысьяслысь кужанлун-сямсӧ донъяліс пыдди пуктана жюри: Виктория Пименова, кывбуралысь Анжелика Елфимова, ас вылӧ уджалысь Иван Шахов, юркарса администрацияын культура управлениеӧн веськӧдлысьӧс вежысь Сергей Латкин да «Скӧрӧдумъяс» котырын ворсысь Олеся Пашнина. А гажа рытсӧ нуӧдіс «Скӧрӧдумъяс» котырса нырщик Игорь Князев.
«Поз тыр шуд» нима ворсӧмсӧ вӧлі сиӧма Семья волы да, дерт, та гӧгӧр кызвын шмоньыс и гартчис. Командаяс кыпӧдісны семьяын, гозъя костын, ас котырын, гортын паныдасьлан быдсикас мытшӧд-юалӧм. Дерт, казьтыштісны и республикаын тӧдчана лоӧмторъяс. Чайтӧмысь, видзӧдысьяс пӧвстысь унаӧн тӧдісны сценавывса геройясын асьнысӧ ли матыссасӧ. Зэв тай сьӧ-лӧмсяньыс сералісны-клопайтісны-а. Быд команда зэв шоныд ваш нюмӧн вочаалісны да колльӧдісны.
«Майбырыд уна оз овлы» да «Ставныс гортын» петкӧдчӧмъяс бӧрын жюри муніс вӧчны кывкӧртӧдъяс. А сэккості залын пукалысьясӧс гажӧдісны скӧрӧдумсаяс. И видзӧдысьяс бара на кынӧм висьмытӧдзыс ваксисны да ки пыдӧс донавмӧн кекӧначисны.
И со – став командаыс сцена вылын. Донъялысьяс юӧртӧны помшуӧмъяс: коймӧд местаын «Едрит-кудрит», мӧд тшупӧдынӧсь «Эжва йывса бабаяс», «КилоМэтръяс» – медводзынӧсь. Медбур ворсысьнас та пӧрйӧ шуӧма «КилоМэтръяс» командаысь Елена Плетцерӧс. «Коланторъяслы» вичмисны Сыктывкарса витӧд коми КВН-ӧ пырӧдчӧмысь диплом да козинъяс.
Окота висьтавны ыджыд аттьӧ ворсысьясӧс козьналысьяслы. Майбыр, найӧ быд пӧрйӧ лышкыда вӧзйӧны-вичмӧдӧны сьӧлӧм-лов бурмӧданатор.
Сідз, кӧвӧэнасьысьяслы позяс мичмӧдчыны-баситчыны «Мича Райда» шырсянінын (веськӧдлысьыс Галина Васильевна Харитонова), номсасьны «Пироги по-коми» котырын (веськӧдлысьыс Анастасия Вячеславна Надуева) пӧжалӧм чӧскыд пирӧг-шаньгаӧн, искусствоӧ вӧйтчылӧмӧн шойччыштны Коми Республикаса вужвойтырлӧн шылада-драмаа театрын (веськӧдлысьыс пыдди Валентина Ивановна Судакова) да Виктор Савин нима драма театрын (директорыс Михаил Николаевич Матвеев). Тӧвся кӧдзыд лунъясӧ ворсысьяс мӧдасны шонтысьны «Югыд-арт» мастерскӧйын (веськӧдлысьыс Светлана Владимировна Турова) ас киӧн кыӧмторъясӧн.
Майбырыд пӧ уна оз овлы. Сідзи и эм. Ставӧн виччысьӧмӧн виччысям локтан воӧ республика тшупӧда нин коми КВН, кор сцена вывсянь бара на юрӧбтас сылы сиӧм кып:
«Вай гораджыка шмонит-сьыв!..».
Вак-вак-вак…
Роддомысь выпишитчигӧн:
–Аня, кагаыд тай нӧ абу ме кодь?!
–Кыдз нӧ абу тэ кодь? Кык син, ӧти ныр, и тэ кодь гора гӧлӧса!
–А мыйла кучикыс сьӧд?
–Дааа, менам век ставыс сотчӧма…
* * *
Сиктса лавка дорын.
–Господьӧ, код нӧ татшӧм мисьтӧмыс?!
–Тайӧ? Миян моньным.
–Но-о-о, ен сыкӧд, зэв тай мича да лӧсьыд!
* * *
Реклама.
Сыктывкарын воссис выль стоматология «Пинясь». Пиньтӧг чужин, пиньтӧг и кулан.
«КилоМэтръяс».
* * *
–Ма-ам! Ме верӧс сайӧ кӧсъя!..
–Код нӧ тэнӧ кутӧ? Пет. То тай, майбыр, кымын жӧник вӧтлысьӧ.
–А код сайӧ?
–Иван сайӧ.
–Сійӧ йӧй.
–Сідзкӧ, Ӧлексан сайӧ.
–Сійӧ вывті сюсь.
–А Петырыд нӧ?
–Сійӧ зырым сёйысь.
–А ачыс мый шуӧ?
–Чӧскыд пӧ тай…
* * *
Семья-котыр мӧдӧдчӧ суйӧр сайӧ. Пиыс кутасьӧ сачокӧн, киас тыра банка.
–Мый нӧ, кага, вӧчан? Лок нин, поездсьыд колям.
–Чирк кутала.
–А банкаас мый?
–Кӧза сіт.
–Мый нӧ тэн таысь?
–Чирксӧ косьтам-жаритам, а кӧза сітсӧ сакаралі да, кампет лои. Китаяд ӧд быдтор вылӧ азымӧсь!
«Едрит-кудрит».
* * *
–Бать, тэ ӧд ме кодьнас коркӧ вӧлін жӧ?
–Вӧлі, пиук, вӧлі.
–Кыдз нӧ сэки та ыджда рушкутӧ новлӧдлін?..
* * *
Гозъя мунӧны поездӧн.
–Марья, тэныд сэн абу дзескыд пукавнытӧ?
–Абу. Зэв лӧсьыд.
–Гашкӧ, кӧдзыд да?
–Абу-абу, эн шогсьы.
–Ӧшиньсяньыс оз пӧльт ни?
–Оз-оз.
–Вай либӧ местанад вежсям.
* * *
–Бабук, ме кӧсъя лоны квадроберӧн!
–А коді нӧ сійӧ сэтшӧмыс?
–Найӧ пасьтасьӧны пемӧсӧ да ветлӧдлӧны-чеччалӧны нёль кокӧн.
–Тэнад батьыд, сідзкӧ, быд смена кост квадробер: порсь моз руксӧ да нёль кокӧн гортад ӧдва кыссьӧ.
«Коланторъяс».
* * *
–Комиысь пенсионер пӧ бара на мошенникъяслы куим миллион вуджӧдӧма.
–Да-а, майбырыд уна оз овлы.
–А тупӧйлуныд овлӧ.
–А ачыд на шӧрӧ эн сюрлы?
–Сюрлі, да той кучикыд, вӧлӧм, карточка пырыд оз мун…
* * *
–Мый нин выльыс светас?
–Таво пӧ Комиын зэв озыр урожай босьтӧмаӧсь, нелямын прӧчентӧн унджык.
–А тӧлкыс? Бара ставсӧ овощехранилищеын сісьтасны.
–Оз сісьтыны. Водзвыв думыштӧмӧн шыбитӧмаӧсь.
–На опережение уджалӧны!
«Эжва йывса бабаяс».
<> Алина Латышева. Снимокъясыс Наталья Исаковалӧн да Сыктывкарса коми культура шӧринысь