Медицинаын уджалысьяс лун водзын окота тӧдмӧдны лыддьысьысьясӧс Сыктывкар бердысь Вылыс Максаковкаса амбулаторияын участкӧвӧй терапевт Кира Андреевна Панюковакӧд.
Пыр мелі нюма, вежавидзысь да бурдӧдчысьяс вӧсна тӧждысьысь Кира Андреевнаӧс ёна пыдди пуктӧны посёлокын. Уна шань кыв да сьӧлӧмсянь аттьӧалӧм вичмӧ сылы.
Кира Андреевна чужлӧма Сыктывкарын. Ичӧтсяньыс нин тӧдӧма, мый верстьӧ олӧмсӧ йитас медицинакӧд. Юркарса 33-ӧд номера школа помалӧм бӧрын пырӧма велӧдчыны Кировса государственнӧй медакадемиялӧн Коми филиалӧ. 2009 воын мӧдӧдӧмаӧсь уджавны Максаковкаӧ. И со 15 во нин Кира Андреевна бурдӧдӧ посёлокса олысьясӧс. Быд лун волывлӧ юркарсянь.
Терапевтлӧн уджыс абу кокньыд, ӧд буретш медводз сы дорӧ уна сикас висьӧмӧн шыӧдчӧны. Да тшӧтш и ёна нёрпалысьяс дорӧ гортӧдзыс колӧ ветлыны, олӧмаджыкъяслы унджык кад вичмӧдны.
–Уджӧй ёна воӧ сьӧлӧм вылӧ, – висьталӧ Кира Андреевна. – Став сьӧкыдлун вылас видзӧдтӧг гӧгӧрвоа, мый ассьым олан туйӧс – лоны бурдӧдысьӧн – стӧча бӧрйыссьӧма. <>
Галина МАКАРОВА.
Снимокыс авторлӧн.