Гырысь вузасян шӧринъясысь, уна сикас лавкаысь да ичӧтик киоскысь ӧтдор карса улич вылын вузасьӧны олӧма нывбабаяс. Тӧвнас найӧ вӧзйӧны ветлысь-мунысьлы картупель, кос тшак, сола да маринуйтӧм град выв пуктас. Тулыснас та дорӧ содӧ теплицаын быдтӧм лук турун, петрушка-укроп. Гожӧм-арнас вӧзйӧны быдсикас тшак-вотӧс, дзоридз да мукӧдтор.
Тшӧкыда волывлӧны республикаса юркарӧ, сиктъясӧ да весиг грездъясӧ Кировысь да Йошкар-Олаысь «гастролёръяс», кодъяс вузасьӧны кӧм-паськӧмӧн, вольпась кӧлуйӧн. Йӧзыс окотапырысь ньӧбасьӧны налысь, и этша кодлы юрас волӧ, миян быдсикас надзор службасьыс кодкӧ кутӧ-ӧ найӧс син улас, мед вузасян правилӧяссӧ оз торкавны.
Июль 18 лунӧ республикаса юралысьлӧн Общественнӧй приёмнӧйын «веськыд йитӧда» телефон пыр сёрниыс вӧлі буретш та йылысь. Юркарса администрацияысь экономика да анализ управлениеӧн веськӧдлысь Лариса Туркова, асшӧр удж да вузасьӧм кузя отделысь инспектор Максим Братусь да Комиын Роспотребнадзорлӧн управлениеысь отделӧн веськӧдлысь Андрей Сорокин юӧртісны, кыдзи найӧ водзсасьӧны оланпас торкалӧмӧн вузасьысьяслы паныд.
Лариса Владимировна висьталіс, мый тавося квайт тӧлысьӧн налӧн управлениеса специалистъяс 205-ысь петалӧмаӧсь рейдӧ. Оланпас торкалӧмӧн вузасьӧм кузя гижӧмаӧсь сизим акт да 17 административнӧй протокол. Кык вузасьысьӧс штрапуйтӧмаӧсь 22 сюрс шайт дон, квайтӧс чирыштӧмаӧсь. Сы мындалысь жӧ разьӧмаӧсь юасьтӧг лӧсьӧдӧм вузасянінсӧ. Тайӧс вӧчӧны администрациялӧн тшӧт весьтӧ. Но тшӧкыда ас вылас уджалысьяс асьныс разьӧны ларёксӧ да… нуӧны мӧдлаӧ. Кольӧм во 38 киоскысь комын нёльсӧ разьӧмаӧсь кӧзяеваыс. Таво предпринимательяс асьныс идралӧмаӧсь-нуӧмаӧсь квайт вузасянін.
Став «коммерсантсӧ» администрацияын бура тӧдӧны. Габов изэрд, «Парма» шӧрин, 3 номера поликлиника, Доручасток, Нювчимлань туйвеж дорын, кӧні оз позь вузасьнысӧ, медсясӧ пукалӧны пенсионеръяс. Специалистъяс накӧд сёрнитӧны, янӧдӧны, корӧны дугдыны вузасьны. Оз кӧ тайӧ отсав, юӧртӧны на йылысь полицияӧ. Погона йӧз Коми Республикаын административнӧй кывкутӧм йылысь оланпаслӧн 7.16-ӧд да 6.22-ӧд статьяяс вылӧ мыджсьӧмӧн пӧчӧяслӧн «нажӧвитчӧм» йылысь дасьтӧны протокол, код серти колӧ мынтыны 2 сюрс шайта штрап. Мӧдысь кӧ «шедасны» — вештасны куим сюрс нин….
Водзӧ лыддьӧй «Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.