Сыктывдінын бур да лада семьяыс зэв уна. А талун ми кежалам Сёськаӧ, Соколов семьяӧ.
Лышкыд кӧзяйкаыс, Вероника Николаевна, юксис ассьыныс челядьсӧ да тшӧтш и босьтӧм кага быдтанногын гусяторъясӧн, а сідзжӧ тӧдмӧдіс семьяпытшса традицияясӧн.
Коми кӧлысь ворсӧмаӧсь
Вероника Николаевна чужлӧма Кулӧмдін сиктын, а вит арӧсӧн бать-мамыскӧд вуджӧма овны Сёськаӧ.
Школа помалӧм бӧрын велӧдчӧма Сыктывкарын пусьысьӧ. Верӧспуыскӧд, Сергей Адольфовичкӧд, тӧдмасьӧмаӧсь студенталігас на.
–Коркӧ ӧти рытӧ нывъёртъяскӧд сикт кузя гуляйтігӧн паныдасим, сійӧ ёртъясыскӧд жӧ вӧлі. Кыв бӧрся кыв – тадзи и тӧдмасим.
Кадысь кадӧ аддзысьлігъясӧ сёрнитігӧн гӧгӧрвоим, мый олӧм вылӧ видзӧдласным ӧткодь.
Вӧлӧмкӧ, кыкнаннымлы окота овны сиктса ас керкаын, да мед сэні пыр дзользисны челядь, – висьталіс Вероника Николаевна.
Регыд мысти том йӧз ӧтлаасьӧмаӧсь. А 2000 воын нӧшта на и ворсӧмаӧсь коми кӧлысь.
Сёськасянь Сыктывкарӧдз воӧдчӧмаӧсь воддза моз теплоходӧн. Киров нима паркын загсын уджалысьяс дасьтӧмаӧсь Соколовъяслы быдса петкӧдчӧм: том гозъяӧс вӧччӧдӧмаӧсь та кежлӧ вурӧдӧм коми паськӧмӧ, а фольклор котыръяс ливкйӧдлӧмаӧсь-сьылӧмаӧсь налы – бласлӧвитӧмаӧсь шудаа овны-вывны.
Ас йӧзӧс моз вочаалім
Училище помалӧм бӧрын 2000 воын Вероника инасьӧма уджавны Сёськаса детсадйӧ пӧварӧн. Сэки Олеся нылыслы арӧс тырӧма.
Мыйкӧдыра нывбаба нянечкаалӧма да стӧрӧжалӧма. А 2012 воӧ пырӧма уджавны сиктса школаӧ пӧварӧн да ӧнӧдз сэн зільӧ.
Семьяын сэки быдмӧма нин Лизук. 2017-ӧдын чужӧма Катюша, а таво семьяыс содӧма — босьтӧмаӧсь пиукӧс.
–Ми верӧскӧд важӧн нин босьтчылім дасьтыны Артёмӧс опека улӧ босьтӧм могысь колана кабала-документ, – гӧгӧрвоӧдіс ань. – И зэв нимкодь, ставыс артмис да. Тёма да Катюша пӧшти тшӧтшъяяс: пинымлы сизим арӧс, а нылукнымлы та мында жӧ арнас тырӧ. Найӧ ӧтлаын ветлӧны садйӧ, да и гортын оз янсавлыны: то серпасасьӧны, то ворсӧны мыйыськӧ, котралӧны ӧта-мӧд бӧрсяыс.
Семьяас шоныда вочаалӧмаӧсь и Олеся ыджыд нылыслысь верӧссӧ – Сергейӧс.
Том гозъя олӧны-уджалӧны Сыктывкарын да окотапырысь волывлӧны Сёськаӧ гӧститны.
Выль шоныд позйын
Керкаыс Соколовъяслӧн ыджыд да кыпыд.
Овнысӧ вуджӧмаӧсь кольӧмвося арнас, а таӧдзсӧ олӧмаӧсь верӧс пӧч ордас.
Выль керка дорас быдмӧ ӧмидз, крыжовник, сьӧд туся пелысь да сэтӧр.
Шоныд позсӧ кыпӧдӧмаӧсь тшӧтш и уджалысьясӧс медавлӧмӧн.
Вероника Николаевналӧн висьталӧм серти, сійӧ тшӧтш быдлаӧ нырсӧ сюйлӧма, стройматериалсӧ ньӧбалӧма и жыръясас вӧчӧмасӧ донъялӧма. Дерт, майшасим пӧ, но медбӧрын ставыс лючки артмӧма.
И 2023 вося октябрь помын семьянас овмӧдчӧмаӧсь выль шоныд позъяс.
Кӧзяева гӧрӧмаӧсь керка гӧгӧр мусӧ да кӧсйӧны вӧчны ыджыд град йӧр.
Водзӧ вылӧ удж-могыс – юр выв тыр: тулыс-арнас помӧдз лӧсьӧдны участоксӧ, мичмӧдны дзоридзьясӧн, выльмӧдны тусь-вотӧса кустъяссӧ. Ставӧн ӧд велалӧмаӧсь нин ас компот-варенньӧӧн да солалӧм-кынтӧмторйӧн чӧсмасьны.
Мый пуӧма, сійӧс и сёям
–Уджавнысӧ челядьӧс велӧдам ичӧтдырсяньыс. Шуам, век тшӧкта идравны чачаяссӧ, – юксис Вероника Николаевна. – Овлӧ, рытнас воа удж вылысь дзик мудз да, челядь эновтчӧны кутасьӧм-дзебсясьӧмсьыс, котӧрӧн локтӧны ме дорӧ: «Мамук, кутшӧм отсӧг колӧ?». Ӧтиӧс чуйда джодж чышкыны, мӧдлы – лӧп-ёг петкӧдны, коймӧдлы – шкапӧ кӧлуй тэчны. Ӧти кывйӧн, удж-нокыс быдӧнлы вичмӧ.
Соколов семьяын ёна оз пискаасьны. Мамыс ыджыд опыта пӧвар да, быдсяма нурсӧ дасьтӧ. «Мый пуӧма – ставсӧ колӧ сёйны-куравны», – нюмпырысь шулывлӧ нывбаба.
Збыльвылас эськӧ Артём оз ёна радейт шыд, а медічӧт нылыс вермас нырсӧ кӧрлыны пельняньысь, но Вероника Николаевна велӧдӧ зонпосниӧс и та помысь кынӧмпӧт перйыны.
–Торъя традиция миян абу, но кодлӧнкӧ чужан лунӧ став семьяӧн ветлам карӧ именинниклы выль паськӧм да чӧсмасянтор ньӧбны. Дерт, и гортын пӧжала аладдя да яблӧга пирӧг.
Мича поводдя дырйи ветлывлам вӧрӧ-вадорӧ, вотам тшак-тусь. Чери кыйны Сергей челядьӧс корсюрӧ босьтлывлӧ жӧ. Коркӧ дзоля Лизукӧс босьтліс. Бать дорсьыс неылӧ и вешйӧма, кутшӧмкӧ лятиӧ веськалӧма. Сергей, дерт, Лизаӧс перйӧма, а со резина кӧмыс сэтчӧ и кольӧма. «Вот и бура вуграсим!» – шмонитіс сэк верӧсӧй, – вашнитіс ань.
Творчество кыпӧдӧ ловрунымӧс
–Сёрнитны кӧ енби-талант йылысь, семьяным творчествоа, сьылысь, – висьталіс Вероника Николаевна. – Витӧд классын велӧдчысь Лиза петкӧдчӧ культура керкабердса ансамбльын. Ачым сьыла Ирина Чувьюровалӧн веськӧдлӧм улын Сёськаса «Шуда кад» йӧзкостса хорын. А жилищно-коммунальнӧй овмӧсын уджалысь менам верӧсӧй окотапырысь ветлӧ драмкружокӧ. Кодӧс сӧмын оз ворслы! Торйӧн нин бура артмӧ хор петкӧдчӧмъяс дырйи йӧктысь гажа пӧльӧ. Ок, и дзирдыштіс 2021 воын Выльгортса музейын «Менам рӧдвуж» районса конкурсын семьяӧн петкӧдчигӧн! Ми сьылім дед йылысь, а Сергей, ляскӧм тошка, присядкиӧн йӧктіс. Ӧти кывйӧн, сяммӧ образас пырны да, став спектакляс сійӧс корӧны петкӧдчыны-ворсны.
Соколовъяс пырӧдчӧны и быдсикас концертӧ, тшӧтш и Май 9 лунлы сиӧмӧ.
Торйӧн кӧ, «Шуда кад» хор 2017 воын шедӧдӧма народнӧй ним, да ӧні сэні сьылысьяс бара на дасьтысьӧны дорйысьны.
А Вероника Николаевна петкӧдчывлӧ и сольнӧй номерӧн. Таысь кындзи «Стиль» томулов котыркӧд велӧдӧ быдсикас йӧктӧм.
–Творчествоыс отсалӧ вунӧдчывны быдлунъя тӧжд-майшасьӧмысь да кыпӧдӧ ловру! – кывкӧрталіс сёрнинымӧс нывбаба.
<> Елена Музыкант.
Снимокыс Соколов семьялӧн гортса архивысь.
Комиӧдіс Елена Плетцер.