Таво Комиын «Агростартап» уджтас весьтӧ фермеръяслы грантъяс вичмӧдӧм вылӧ лоӧ видзӧма 31 миллион шайт, мӧйму дорысь матӧ кык пӧв унджык.
Быд во тайӧ сьӧма отсӧгсӧ сетӧны налы «Ичӧт да шӧр предпринимательство, ас вылӧ уджалысьяслы отсӧг» национальнӧй проект вылӧ подуласьӧмӧн.
Кыдзи висьталіс регионса юралысь Владимир Уйба, 2023 воын «Агростартапӧ» пырӧдчӧма миян республикаысь дас куим фермер. На лыдысь витыс лоӧма вермысьӧн. Налы проектъяснысӧ збыльмӧдӧм вылӧ бюджетысь вӧлі вичмӧдӧма дас квайт миллионысь унджык шайт. Тайӧ коланасьыс 90 прӧчент, а дассӧ шуӧма корсьны фермеръяслы аслыныс.
Владимир Уйбалӧн кывъяс серти, мӧйму «Агростартап» отсӧгӧн Кулӧмдін районысь аграрий ньӧбӧма видз-му вӧдитан техника, Чилимдін районысь фермер босьтчӧма выльмӧдны-бурмӧдны йӧв вӧчан цех, а Сыктывдінысь ас вылас уджалысь — переработайтны чипан яй.
Комиын бӧръя вит вонас сьӧма отсӧг сетӧма и малязі вӧдитысь квайт мортлы, ставсӧ артыштӧмӧн дас миллионысь унджык шайт. Изьва да Кӧрткерӧс районъясысь ас вылас уджалысьяслӧн лоӧма позянлун лӧсьӧдны содтӧд пасекаяс да вӧчны унджык ма.
Кыдзкар сиктысь фермер государствосянь отсӧг весьтӧ ньӧбӧма «УАЗ-фермер» автомашина, оборудование да овмӧсас мукӧд коланатор. «Агростартаплӧн» грант вылӧ содтӧма мазі котырсӧ 12-сянь 35-ӧдз да кутӧма вӧчны масӧ вонас 800 килограммӧдз. Прӧдукциясӧ иналӧ ас районас, а сідзжӧ мукӧдлаӧ ӧтуввез пыр.
Кӧрткерӧс районса Дань грездысь малязі вӧдитысь кӧсйӧ тавосянь инавны масӧ тшӧтш и Россияса мукӧд регионын. Грант вылӧ сійӧ ньӧбӧма «УАЗ-фермер» автомашина да пасекаын колана оборудование. Лӧсьӧдчӧ содтысьны 32-сянь сё мазі котырӧдз, а ма вӧчӧмнас — 400-сянь 2.900 килограммӧдз.
—Миян республика босьтчис «Агростартап» уджтасӧ 2019 воын. Кольӧм вит вонас грант босьтіс 26 фермер, ставсӧ артыштӧмӧн матӧ 76 миллион шайт. Правительство и водзӧ кутас сетны фермеръяслы сьӧма отсӧг. Комиын джын олысьыс – сикт-грездса, и миянлы зэв тӧдчана, медым вӧлі налы кытчӧ инасьны удж вылӧ, – кывкӧртӧд вӧчис Владимир Уйба.
<> Гижӧдсӧ дасьтіс Александра Артеева.
Снимокыс ӧтуввезйысь.