Но мый, дона лыддьысьысь, тэ кутан киад 2023 вося бӧръя номер.
Чайтам, удитін нин вӧчны кывкӧртӧдъяс, гӧгӧрвоин, мый артмис, мый эзджык. Ми, «Йӧлӧгаса» нывъяс, тшӧтш юксям тэкӧд сьӧлӧмӧ мӧрччана здукъясӧн.
Надежда Пунегова
Бурас лачаӧн
Кутшӧм ӧдйӧ котӧртӧ кадыс! Лун бӧрся лун. Бара нин со матысмис декабрь пом.
Мый мен сетіс Кролик воыс? Медводз, дерт, казьтышта кольӧм Тигр восӧ: сійӧ менӧ ёна шензьӧдіс да вӧчис шуда мамӧн. Та понда Кролик восӧ коллялі аслам дзоля нылуккӧд. Сыкӧд ӧтвылысь вӧляникысь быдмим-сӧвмим, велӧдчим пукавны да сулавны, кутны киын пань да асшӧра ворсны чачаӧн. А мыйта на миянӧс виччысьӧ нӧшта!
Эг вунӧд и аслам мӧд быдтас – «Йӧлӧга» – йылысь. Корси выль геройясӧс, кодъяс, чайта, воисны сьӧлӧм вылас журнал лыддьысьяслы. «Йӧлӧга» мичаммис-верстяммис, республикаын кындзи бура лоис тӧдса и Россия пасьтала.
Артыштны кӧ, «Йӧлӧгаын» менам стажӧй зэв нин ыджыд – таво лоис 17 во. И мый шензьӧдӧ: ньӧтчыдысь эг мӧвпыштлы, мый ме абу ас инын. Воысь-во тай корсим выль материал, геройясӧс, аддзысьлім лыддьысьысьяскӧд. И таысь некутшӧм мудзӧм абу. А мый виччыся локтан восьыс? Ола бурас лачаӧн. Окота аддзыны выль лыддьысьысьясӧс, ёртъясӧс да пырӧдчыны унджык конкурсӧ. Да, и шензьӧдана выль юӧрыс воас, вот аддзыланныд! Выль воӧн! Ставныдлы сӧмын шуд!
Ирина Терентьева
Колӧ, Ира, колӧ
Во сайын юӧртісны, мый менӧ пуктӧны «Йӧлӧга» главредӧ. «Но ме ог кӧсйы», – висьталі сэки синмӧс гӧгыльтӧмӧн. «Колӧ, Ира, колӧ», – быттьӧ юрын сук ру пиысь кылі вочакывсӧ.
Шуа веськыда, главредалан медводдза 3-4 тӧлысьыс вӧлі, ой, сьӧкыд. Тӧдтӧм уджӧ босьтчигӧн тшӧкыда ковмывліс пукавны редакцияын войӧдзыс, а журналысь кутшӧм-сюрӧ лист бок весиг кӧтӧдлі синваӧн. Сэсся вӧляникысь мунан туйвизьыс быттьӧ тыдовтчис. И ӧні со кута киын ассьым дас кыкӧд номер. Но, дерт, нинӧм тайӧ эськӧ эз артмы бур командатӧг – «Йӧлӧгаса» редакторъястӧг да внештатникъястӧг, вёрстка вӧчысьтӧг, сюся лыддьысьысь корректоръястӧг. Аттьӧ быдӧнлы, кодкӧд мойвиис ӧтув уджавны 2023 воын!
Тшӧтш жӧ шуда, мый таво артмис путешествуйтны и удж кузя, и отпускалігӧн: ветлі Крымса «Тавридаӧ», Калининградӧ, Ижевскӧ, некымынысь Москваӧ. Лэбовтлі радейтана артистлӧн концерт вылӧ. Салехардын сеті верӧс сайӧ нывъёртӧс. Чайта, кӧлысясигас ме вӧлі невестаыс кодь жӧ шуда – важӧн нин кӧсйи кодӧскӧ гозйӧдны, да окотитысьыс эз вӧв.
Кутшӧмӧн вӧлі 2023-ӧдыс? Уна пӧлӧсӧн. Шудаӧн да сьӧкыдӧн, бордтӧ вунданаӧн да бӧр быдтанаӧн, ӧта-мӧд костын йитӧдъяс ёнмӧданаӧн да дзикӧдз найӧс орӧданаӧн.
А кутшӧмӧн лоӧ 2024-ӧдыс? Кадыс петкӧдлас. Но вайӧ вӧчам ставсӧ, медым тайӧ воыс лоис медся шаньӧн да бур юӧрнас озырӧн.
Элина Шлопова
50 мог
Во сайын на ме и думыштлыны эг куж, мый локта уджавны «Йӧлӧгаӧ», мый гижӧдъясӧс кутасны лыддьыны Коми му пасьтала. 2023 во кежлӧ пукті ас водзӧ матӧ 50 мог. Дерт, мыйтакӧ артмис пӧртны олӧмӧ, эз жӧ тай ставсӧ-а. Но и мед, тайӧ бурланьӧ!
Юкся тіянкӧд тырвыйӧ либӧ джынвыйӧ збыльмӧм 7 кӧсйӧмӧн:
> Аддзылі Йошкар-Ола, Саранск да Ханты-Мансийск, кӧть и пукті ас водзын мог ветлыны став финн-угор регионас.
> Лыдди 19 небӧг. Кӧсйи 30.
> Ветлі Казаньӧ. Пӧжи тайӧ мӧвпсӧ 2020 восянь!
> Пӧдлалі университетын кык сессия сӧмын «вит» вылӧ.
> 257 лун гижалі сьӧлӧмкылӧмъясӧс да лунся кывкӧртӧдъяс дневникӧ.
> Во чӧж вежоннас кыкысь ветлі фитнес вылӧ.
> Видлі ачымӧс интервьюер да велӧдысь пыдди.
Аттьӧ, 2023, мый видзин менӧ да матыссаясӧс ыджыд шог-тӧждысь, вӧчин менӧ 365 лун вылӧ сямаджыкӧн, шудаджыкӧн да вынаджыкӧн, эн кусӧд сьӧлӧмсьым бисӧ.
Выль воын ми кутам корсьны интереснӧй геройясӧс, велӧдчыны опыта йӧзлысь, сӧвмӧдны «Йӧлӧганымӧс» ӧтуввезйын, топыдджыка тӧдмасьны лыддьысьысьяскӧд да гижны, гижны, гижны. 2024 во, кутчысь, тэ вылӧ миян ыджыд планъяс!
Виктория Королева
И пӧсь биӧн ыпъялӧ сьӧлӧм
2022 воын Россияса финн-угор войтырлӧн фестиваль бӧрын гӧгӧрвои: кӧсъя йитны олӧмӧс комиӧн. Ӧд чужи-быдми коми мортӧн, ёртася коми ныв-зонкӧд, велӧдча коми кыв велӧдысьӧ. Коли сӧмын видлыны гижны чужан кывйӧн. Сэки пукті аслым мог – пырӧдчывны журналистикаӧ!
Ӧти гожся лунӧ менам кӧсйӧмӧй збыльмис. «Йӧлӧга» журналса шӧр редактор Ирина Терентьева вӧзйис волыны собеседование вылӧ. Корӧмсьыс сьӧлӧмӧй ыпнитіс пӧсь биӧн, синмӧй югзис, радӧйла вӧлі окота сьывны.
Редакцияӧ воӧм бӧрын сьӧлӧмӧй ёнджыка на вӧрзис. Ме быттьӧ веськалі гортӧ, кӧні ставӧн сёрнитӧны комиӧн. Карын дыр олігӧн шензян уличын коми мортӧс аддзылӧмысь. А тані со лэдзӧны газет-журнал, мӧвпалӧны да сёрнитӧны чужан кывйӧн, радейтӧны мам кывсӧ ме моз жӧ ёна.
Медводдза интервью кежлӧ дасьтысьӧмыс некор оз вун. Дыр тэчи юалӧмъяссӧ, сэсся полі шыӧдчыны герой дорӧ, аддзысьны сыкӧд. Но ставыс колис лючки: гӧсьтыс вӧлі шань да вежавидзысь. Ӧні менам пызан вылын куйлӧны коми статьяяс «чужтыны» отсалан кывкудъяс да «Йӧлӧга» петасъяс.
Аттьӧала журналсӧ да уджъёртъясӧс аслыспӧлӧс йӧзкӧд тӧдмӧдӧмысь, бурӧ ышӧдӧмысь. Мед 2024 воыс ваяс «Йӧлӧгалы» выль проектъяс, конкурсын вермӧмъяс да уна лыддьысьысьӧс!
Лист бокъяссӧ дасьтіс Ирина Терентьева.