Республикаса кар-районын босьтчӧмаӧсь сигӧртны «Жильё и городская среда» нацпроектлӧн «Формирование комфортной городской среды» уджтас весьтӧ парк-сквер да олан керка ӧшинь ув пелькӧдан-мичмӧдан, челядьлы ворсанін кыпӧдан-дзоньталан, памятник выльмӧдан да уна сикас мукӧд удж.
Таво Комиын шуӧма дзоньтавны-выльмӧдны-мичмӧдны карса да сиктса 46 овмӧдчӧминын йӧзлысь 73 шойччанін да 50 ӧшинь ув. Кызвынлаас став колана уджсӧ вӧчӧма нин.
Сідз, Айкатылаын XX нэмӧ Айму дорйысьяслы памятник дорын вольсалӧмаӧсь 190 квадрата метр брусчатка, керамогранитӧн эжӧмаӧсь свеж краскаӧн мавтӧм танклы постаментсӧ да выльмӧдӧмаӧсь сэн гижӧдсӧ.
Койгортын Сӧветскӧй улича вылын «Некодӧс абу вунӧдӧма, нинӧм абу вунӧма…» памятник гӧгӧрын сідзжӧ вольсалӧмаӧсь брусчатка, сувтӧдӧмаӧсь йӧзӧдлытӧм войнаса ветеранъяслы сиӧм скульптураяс да флагштокъяс, вӧчӧмаӧсь мукӧд удж.
Изьва сиктын «Радлун» паркын восьтӧмаӧсь татшӧм жӧ нима этнопарк, кодӧс лӧсьӧдӧмаӧсь Яг-морт йылысь легенда вылӧ подуласьӧмӧн коми-изьватас ногӧн.
Пыранінас ӧтар бокас сувтӧдӧмаӧсь кӧр видзысьяслысь чум, а мӧдар бокас серпасалӧмаӧсь-вӧчӧмаӧсь йӧра юръяс. Юяс моз шылькнитчӧмаӧсь кельыдлӧз рӧма бетон трӧпаяс.
Тані жӧ коми мойдъясысь Яг-мортлӧн, Туганлӧн, Райдалӧн скульптураяс.
Гӧсьтъяс вермасны нимкодясьыштны и коми-изьватаслӧн нэмӧвӧйся рӧдвуж пасъясӧн, пукалыштны-шойччыштны пыж-лабичьяс вылын да с.в.
Кӧрткерӧс районса Мордін сиктын Набережнӧй улича вылын дзоньталӧмаӧсь-выльмӧдӧмаӧсь челядьлы ворсанін, а Сыктывкарын – «Ур парк», 1-ӧд номера школа дорын – сквер, Эжваын, Лесозаводын да Гӧрд Затонын – уна йӧза шойччанінъяс да олан керка ӧшинь увъяс.
Казьтыштам, тайӧ да став мукӧд национальнӧй проектсӧ шуӧма збыльмӧдны странаса президент Владимир Путинлӧн индӧд серти.
2021 восянь республикаын олысьяс ӧтуввез пыр асьныс гӧлӧсуйтӧны-бӧрйӧны, кӧні да мый колӧ выльмӧдны-дзоньтавны кар-сикт чужӧмбансӧ мичмӧдӧм да йӧзлысь оланрусӧ кыпӧдӧм могысь.
<> Гижӧдсӧ дасьтiс Александра Артеева.
Снимокъясыс ӧтуввезйысь.