«Демография» нацпроектлӧн «Спорт – норма жизни» уджтас вылӧ подуласьӧмӧн Тула обласьтса Алексин карын паралимпиечьяслӧн «Мы вместе. Спорт» ворсӧм дырйи нуӧдісны вермытӧмъяс костын пауэрлифтинг кузя ставроссияса вермасьӧм.
Странаса 33 регионысь вын-эбӧс петкӧдлісны ветымын спортсмен.
Петкӧдчис вермасьӧмас и Комиысь спортса мастер, Россияса да регионса сборнӧй командаысь пауэрлифтер Галина Маринцева. 73 килограмм сьӧкта спортсменкаяс пӧвстын сійӧ лоис коймӧд.
Казьтыштам, Украинаын лоӧмторъяс вӧсна 2022 воын войтыркост паралимпиада комитет (МПК) эз лэдз вермасьны Пекинса Паралимпиадаын Россияса да Белоруссияса спортсменъяслы. Та вӧсна мӧйму март 18-20 лунъясӧ Ханты-Мансийскын медводдзаысь нуӧдісны «Мы вместе. Спорт» ворсӧм, кӧні петкӧдчисны Россияысь, Арменияысь, Белоруссияысь, Казахстанысь да Таджикистанысь вермытӧмъяс.
Таво «Мы вместе. Спорт» гожся ворсӧмыс муніс во джын, июнь 20 лунсянь. Сійӧс нуӧдісны Москва да Санкт-Петербург каръясын, Краснодар крайын, Курган, Москва, Улыс Новгород, Саратов да Тула обласьтъясын, Башкортостан, Дагестан, Мордовия, Татарстан, Удмуртия да Чувашия Республикаясын.
4.500 спортсмен вермасисны 22 спорт сикасын: бадминтонын, коляскаа теннисын, фехтованиеын, регбиын да баскетболын, боччаын, байдаркаӧн, каноэӧн да велосипедӧн ордйысьӧмын, пукса волейболын, голболын, дзюдоын, вӧла спортын, кокньыд атлетикаын, пызан- вывса теннисын, пауэрлифтингын, варччӧмын, пуляӧн, ньӧввужйӧн лыйсьӧмын, триатлонын, тхэквондоын, футболын да с.в. Найӧ петкӧдлісны мирса вит, Европаса дас нёль да Россияса ветымын рекорд.
71 зарни медаль шедӧдіс Москваса сборнӧй, Санкт-Петербургса командалӧн 40, а Башкирияса паралимпиечьяслӧн – 34 татшӧм медаль.
Татшӧм жӧ спорт сикасъясын вермытӧмъяс мӧдасны вермасьны и локтан воын август 28 – сентябрь 8 лунъясӧ Парижса Паралимпиадаын, кытчӧ миянлысь спортсменъясӧс лэдзасны сідз шусяна нейтральнӧй статусын, Россияса кыптӧг да дӧрапастӧг.
Локтан воын «Мы вместе. Спорт» тӧвся ворсӧм мунас Ханты-Манси автономия кытшын, Челябинск да Сахалин обласьтъясын.
<> Гижӧдсӧ дасьтiс Николай Размыслов.
Снимокъясыс ӧтуввезйысь.