Керчомъяысь крестьянин овмӧс кутысь Маргарита Ивановна Самарина асшӧр уджӧ босьтчис государстволӧн соцконтракт программа серти да урчитӧм кад кольӧм бӧрын эз дугӧдчы, сӧвмӧдӧ овмӧссӧ водзӧ, ырыштчис нин лэптыны нӧшта скӧт карта.
Ань ас нянь вылӧ петіс 2020 вося июньын. Государствосянь вичмӧдӧм сьӧм вылӧ «Пезмӧг» кооперативысь ньӧбис тыра нин нёль холмогор мӧс.
Овмӧдчӧминса администрация сетіс кӧртымӧ видз-му овмӧс министерствоӧн водзті вичмӧдлӧм трактор да сы дорӧ агрегатъяс. Асланыс вӧлі нин гид да нӧшта кыпӧдісны выльӧс.
Талун ань овмӧсын 14 скӧт юр, сизимыс лысьтана. Йӧв да сыысь вӧчӧм вӧлӧга иналӧ сиктсаяслы. Тӧв кежлӧ заптіс 66 тонна турун, ӧти мӧс вылӧ артыштӧмӧн 29 центнер кӧрым. Кольӧм во вӧлӧга вузалӧмысь нажӧвитіс воддза воын серти 62 прӧчентӧн унджык. Вӧчис 16 тонна йӧв, сизим прӧчентӧн унджык, босьтіс 11 тонна картупель.
–Пуктім ӧти гектар картупель. Техникаыд гӧрӧ и визьйӧдлӧ, мудйӧ и керӧ, сӧмын сюялім да чукӧртім киӧн. Отсасис рӧдвуж, корлім и сиктсаясӧс. Кӧйдыс да гырысьсӧ сюйим гӧбӧчӧ, а скӧтлы картупельсӧ мыськи, ӧтчыдысь вердӧм вылӧ торйӧдалӧмӧн пукті теплицаӧ, тӧвнас пырта да пуа кынсӧ. Кынмылӧмыд юмов, чӧскыд, сюрукъяс ёна радейтӧны. Техниканад и кӧрым заптам, отсасям пуктысьны ас овмӧс кутысьяслы, сиктса администрациялы тӧлын весавны туйяс, – сёрнитіс ань.
Овмӧссӧ бергӧдӧны семьяӧн. Виталий Анатольевич Лютоев верӧсыс и техникаӧн уджалӧ, и лысьтысьӧ, и идрасьӧ – ставсӧ вӧчӧ.
Нина нылыс торгово-экономическӧй техникум бӧрын пырис велӧдчыны Сыктывкарса вӧр институтӧ.
Софья Микуньын кӧрт туй техникумын велӧдчӧ проводникӧ. Гортӧ волігӧн нывъяс индытӧг аддзӧны уджтӧ.
Сизимӧд классын велӧдчысь Василей тшӧтш зэв зіль, сюся вӧдитчӧ мотоблокӧн, кӧсйӧ лоны механизаторӧн.
–Маргарита Ивановна зэв кывкутысь, оз элясь сьӧкыдлун вылӧ. Ёна уджалӧны семьянас, сӧвмӧдӧны овмӧссӧ водзӧ. Ань кӧсйӧ кыпӧдны нӧшта 30 юрлы скӧт карта.
Ӧні дзескыд нин. Волісны видз-му овмӧс министерствоысь кывкутысь йӧз, видзӧдлісны овмӧссӧ да вӧзйисны пырӧдчыны «Семьяӧн сӧвмӧдан ферма» конкурсӧ. Дасьтам документъяс локтан воын конкурсын петкӧдчӧм могысь. Районысь кодъяс босьтчылісны фермеравны соцконтракт серти, кад кольӧм бӧрын тупкысисны, кодъяскӧ уджалӧны на вӧляникысь, а Маргарита Ивановналӧн делӧыс сӧвмӧ водзӧ, – аньӧс ошкис районса видз-му овмӧс юкӧнӧн веськӧдлысь Анастасия Ревокатовна Ярова. <>
Марина Дадашова.
Снимокыс авторлӧн.