Кольӧм вежонӧ Коми йӧзӧдчан керка чукӧртліс ас дорас уджвывса ветеранъясӧс, кодъяс уна во чӧж сьӧлӧмсӧ сетісны Коми печатьлы.
Кутшӧм нимкодь вӧлі вочаавны ставнысӧ ӧти пызан сайын! Кодсюрӧ ӧта-мӧдныскӧд абу аддзысьлӧмаӧсь дас-дас вит воысь дырджык нин.
Некыдзи шуд эз усьлы ставнысӧ ӧтувтлыны: кодкӧ дачаын ноксьӧ, кодкӧ сиктӧ муніс овны да телефон ни адрес эз коль, кодкӧ висьӧдчыштӧ да сідз водзӧ. А октябрыд, вӧлӧмкӧ, медбур кад. Мыйла? Ӧти-кӧ, пыдди пуктӧмӧн да вежавидзӧмӧн октябрь медводдза лунӧ ми пыр зілям ичӧтик козинтор вичмӧдны ветеранъяслы. Но та пӧрйӧ эг лысьт весиг звӧнитлыны да чолӧмавны Олӧма йӧз лунӧн. Кывйӧй весиг эз бергӧдчы! Югъялан-ӧзйян синмаӧсь, мичаӧсь да статяӧсь, збойӧсь, ен сыкӧд, пыр томӧсь! Кутшӧм нӧ найӧ «олӧмаяс»?! Со и шуим бӧрынджык аддзысьлыны.
Мӧд-кӧ, сетім позянлун ставныслы дачавывса удж сигӧртны-помавны. Лысьтлы зіль йӧзтӧ гӧра-кӧдза либӧ град-йӧр идралан кадӧ чукӧстны! Слабог, октябрь помнад ставсӧ нин эштӧдӧмаӧсь.
Коймӧд-кӧ, ёна жӧ нин гаж бырӧма тіянысь! Зэв нин окота вӧлі аддзӧдлыны быдӧнӧс. Чукӧртчывны ӧтув, варовитны-сёрнитны, казьтывныуджалан каднысӧ.
Томджык уджалысьясӧс окотапырысь тӧдмӧдім миян «эзысь гвардиякӧд». Чайта, томуловлы быть колӧ ним-вич-овнас тӧдны да пыдди пуктыны уджвывса ветеранъясӧс, сюся кывзыны да пель сайӧ сюркнявны ыджыд опыта уджъёртъяслысь туйдӧм-велӧдӧмсӧ.
И кыдзи нӧ ог казьтыштӧй миян дорӧ волысьясӧс?! Елизавета Михайловна Старцевалӧн стажыс 50 воысь (!!!) унджык – 1971 воын локтӧма уджавны корректорӧн сэки «Югыд туй» газетӧ на. Матӧ комын во зілис корректорӧн Галина Васильевна Новосёлова. Зинаида Дмитриевна Пантелеева кызь сайӧ во уджаліс «Югыд туйын» письмӧ юкӧнса редакторӧн да ответсекӧн. Том молодечьяс кодьӧсь локтісны Михаил Александрович Ладанов (26 во стажыс) да Валерий Анатольевич Каракчиев (36 во) – «Коми му» газетса вӧвлӧм журналистъяс. Некор оз вунӧд пыравлыны миян дорӧ Надежда Николаевна Быковская – кык пӧрйӧ зілис «Коми му» газетын главнӧй редакторӧн да тшӧтш и веськӧдліс Коми йӧзӧдчан керкаӧн. Нимкодь вӧлі аддзывны Нина Михайловна Кушмановаӧс, коді уна во уджаліс медводз «Югыд туй» газетын, а сэсся «Чушканзі» журналын. «Войвыв кодзув» журнал редакцияын зільысь Надежда Ивановна Кузнецова да «Ордым» лавкаын вузасьысь Любовь Николаевна Доронина – том пенсионеръяс на, сӧмын таво петісны заслуженнӧй шойччӧм вылӧ.
Жаль, дерт, мый корӧмаяс пӧвстысь эз быдӧн вермыны волыны. Чайтам, мӧдысь быть на ставныскӧд аддзысьлам пӧсь чай стӧкан сайын. Ӧд пыдди пуктана ветеранъяс ёна аттьӧалісны найӧс корӧмысь да быть шуисны пыртны традицияӧ татшӧм чукӧртчылӧмсӧ. А кыдзи нӧ ми вермам воча мыйкӧ шуны?
Крепыд дзоньвидзалун да керка тыр шуд, миян пыдди пуктана «эзысь гвардия»! Дыр на лоӧй татшӧм жӧ збойӧсь, тэрыбӧсь, томӧсь да мичаӧсь! <>
Пыдди пуктӧмӧн, Галина Макарова,
Коми йӧзӧдчан керкаӧн веськӧдлысь.
Снимокъясыс Ирина Терентьевалӧн.