Чолӧм, дона лыддьысьысь! Гижӧ тэныд бур ёртыд. Менам чужан Няшабӧжса школаын велӧдчысь, «ВЫНА ЛЭБАЧ» нима премия шедӧдысь Олеся Ануфриевакӧд юасим том йӧзӧс. Найӧ висьтасисны, кыдзи велӧдчӧмаӧсь школаын, босьтлӧмаӧсь-ӧ бура велӧдчӧмысь медаль, кутшӧм ассьыныс вермӧм чайтӧны медся тӧдчанаӧн, ёна-ӧ уджалӧмаӧсь, медым сійӧс шедӧдны. Да тшӧтш и ышӧдісны томуловӧс бур кывйӧн.
Лыддьӧй, шензьӧй, мыйкӧ аслыныд босьтӧй!
Алина Павлова,
PR-специалист, Ухта:
Школаын велӧдчи бура, четвертьясын вӧліны «4» да «5». Университетын зіли ёнджыка: гӧрд дипломӧн помалі и бакалавриат, и магистратура.
Сёрнитны кӧ ыджыд вермӧм йылысь… Меным мойвиис тӧдмасьны сибыд да восьса йӧзкӧд, кодъяс зэв бура тӧдӧны ассьыныс уджсӧ: Коми Республикаса культура, туризм да архивын удж министерствоын, Александринский театрын да «Газпром трансгаз Ухта» котырын, кӧні ме зіля ӧнi.
Тайӧ ставыс – суткичӧжся да быдлунся удж, быдсяма полӧмтӧ да майшасьӧмтӧ венӧм.
Сиа тіянлы лоны медводдзаӧн! Восьсаӧн! Повтӧмӧн! Радейтӧй сійӧ, мыйысь помтӧг аттьӧаланныд олӧмсӧ. Ставсӧ вӧчӧй сьӧлӧмсяньыд да нинӧмысь энӧ полӧй!
Павел Круцкевич,
ас вылӧ уджалысь, Сыктывкар:
Школаын быд во вӧлі «хорошистӧн». Четвертьын кӧ петавліс «3», вӧлі забеднӧ. Некымынысь татшӧмыс вӧвлі. Но ас водзӧ пуктылі мог: вося оценкаыс – сӧмын «нёль» да «вит». Медальыд эз вӧв. Бать-мамӧй шулісны, мый колӧ оз дон, а тӧдӧмлун.
Медся ыджыд вермӧмӧн чайта йӧзсӧ кывны, гӧгӧрвоны, радейтны кужӧмӧс. Ковмис велӧдчыны виччысьны, мукӧддырйи терпитны, пыр лоны веськыдӧн да восьсаӧн, лоны дасьӧн пыр чеччыны усьлӧм бӧрын.
Школаын велӧдчысьяслы сиа тӧдмавны асьтӧ мыйкӧ вӧчигӧн, а оз мӧвпалігӧн; быдлаын да быд пӧрйӧ тӧдмасьны йӧзыскӧд – тадзи уналадорсяньджык гӧгӧрвоан олӧмсӧ налӧн видзӧдлас пыр; эскыны, но не сетны асьтӧ кӧкӧдны; корсьны сэтшӧм йӧзӧс, кодкӧд вирыд лӧсялӧ, кодкӧд лӧсьыд лоны орччӧн; видлыны асьтӧ спортын, сьылӧмын, музыкаын, волонтёралӧмын, уджын, мед кыдз позьӧ водзджык гӧгӧрвоны, мый тіянлы стӧча оз кажитчы, а сэсся казявны, мый збыльысь тіянӧс ышӧдӧ, вынсьӧдӧ, вӧчӧ шудаӧн.
Ляна Ануфриева,
художествоа веськӧдлысь, Изьва:
Эг вӧв тырвыйӧ отличницаӧн, но, помнита, бура велӧдчӧмысь да школаса олӧмӧ пырӧдчӧмысь 5 классын менӧ ыстылісны Коми Республикаса юралысьлӧн выльвося гаж вылӧ. Медальтӧ эз сетлыны, но водзмӧстчӧмысь вӧлі вель уна грамота да козин.
Ичӧтсянь кӧсйи лоны артисткаӧн, петкӧдчыны сцена вылын да козьнавны йӧзыслы шуд. Кӧсйӧмӧй збыльмис. Уджӧс ассьым радейта. Ме дасьта да нуӧда районса, республикаса да регионкостса гажъяс, фестивальяс, ордйысьӧмъяс. Лои ставроссияса да войтыркостса сьылан фестиваль-конкурсын лауреатӧн. Изьва сиктын веськӧдла сьылан котыръясӧн. Велӧдан уджӧй сетӧ позянлун юксьыны тӧдӧмлунӧн, отсавны йӧзыслы збыльмӧдны кӧсйӧмъяссӧ, радлыны аслым да нимкодьӧдны войтырсӧ!
Школаын велӧдчысьяслы сиа збыльмӧдны ассьыныд могъястӧ! Энӧ полӧй! Вӧчӧй!
Максим Бобровский,
профсоюзын зiльысь, Сосногорск:
Школаын ёнджыкасӧ велӧдчи «4» вылӧ, но вӧліны и «3», и «2». Менӧ кыскис гуманитарнӧй наукаяслань. Медаль эз вӧв. Тӧдчана вермӧмыс – лои Россияса почёта донорӧн, ӧні век на тшӧкыда юкся йӧзыскӧд вирӧн, сідзжӧ котырті Ухтаын «Ukhta Runners» котравны радейтысьяслысь клуб.
Томуловлы сиа видзчысьны лёкас сетчӧмысь! Лоӧй сэтшӧмӧн, кутшӧмӧсь ті збыльвылас, сӧвмӧдӧй-ёнмӧдӧй и ловтӧ, и ки-коктӧ, энӧ полӧй йӧз видзӧдласысь!
Наталья Холопова,
ас вылӧ уджалысь, куим челядя том мам, Сыктывкар:
Велӧдчи ме шӧркодя, медальыс вӧлі сӧмын физкультураысь. Чайта, медся коланасӧ да тӧдчанасӧ олӧмын эг на шедӧд. Школаын велӧдчысьяслы сиа видлыны олӧм кӧрсӧ быдлаын: выль тӧдӧмлунъясын, ёртасьӧмын, ветлӧмъясын, небӧгъясын, сёянын, спортын! Сэсся лоас некор.
Юалі «ВЫНА ЛЭБАЧ» премия босьтысьяслысь, коді налӧн кумирыс. Вочавидзисны, мый кывзӧны MiyaGi рэперӧс. Ёртъяс пыр тӧдмалі, мый музыкантыс оз ёна сёрнит журналистъяскӧд. Но артмис сёрнитны батьыскӧд. Казбек Кудзаев висьталіс, мый Азамат (тадзи збыльвылас шуӧны рэперӧс) бура велӧдчис школаын, помаліс медицина академия, а сэсся пырӧдчис музыкаӧ. Юалі, мыйӧ батьыс велӧдӧма писӧ. Вомъёртӧй вочавидзис тадз: ыліті гӧгӧртны агрессия да наркотик.
Ме тшӧтш воа сыкӧд ӧти кывйӧ да вӧзъя тіянлы куар-код серти видзӧдны тайӧ тема сертиыс интервью, кодӧс гижи вичкоса служитысь, экономика наукаса кандидат Максим Стыровкӧд
Дасьтісны Инесса Орёл да Олеся Ануфриева.
Снимокъясыс геройяслӧн.