Коми Республикаын меставывса общественнӧй асвеськӧдлан тэчаслы (ТОС) тырӧ дас во. Такӧд йитӧдын регионса куим районын шуӧма котыртлыны «10 во – кывкӧртӧдъяс да водзӧ сӧвман позянлунъяс» форумъяс.
Странаын ТОС-лысь медводдза ассоциациясӧ дас во сайын вӧлі лӧсьӧдӧма буретш Коми муын. Миян республика вылӧ видзӧдӧмӧн и мукӧд регионын кутісны котыртавны ТОС-сӧ, медым власьт тэчасын зільысьяс да водзмӧстчысь войтыр ӧтув збыльмӧдісны йӧзыслы колана уджтасъяс.
Ӧні Комиын пасйӧма сё дас общественнӧй асвеськӧдлан котыр. Сикт-грездын, карын олысьяс ӧтувтчӧны, корсьӧны сьӧм (гранта конкурсъясын вермысьяслы вичмӧдӧны и некымын сё сюрс, и миллион шайтӧдз) да вӧчӧны челядьлы ворсанінъяс, лӧсьӧдӧны тренажёра комплексъяс, дзоньталӧны туйяс, югзьӧдӧны уличаяс, пелькӧдӧны паркъяс, ловзьӧдӧны вичкояс…
Кольӧм вежонӧ форумсӧ, кытчӧ воліс сёысь унджык морт, нуӧдісны Луздорын, кӧні котыртӧма кызь вит ТОС.
Чукӧртчылісны сэтчӧ Сыктывдін, Сыктыв, Койгорт да Луздор районъясысь водзмӧстчысь войтыр да чина йӧз.
Ношуль овмӧдчӧминӧн юрнуӧдысь Сергей Елдин тӧдмӧдіс форумсаӧс сиктнас да петкӧдліс, мый сэні вӧчӧмаӧсь дас вонас ТОС отсӧгӧн.
А Абъячойса культура керкаын общественнӧй асвеськӧдлан тэчасӧ ӧтувтчӧмаясӧс, старӧстаясӧс, депутатъясӧс, сиктса веськӧдлысьясӧс чолӧмалісны Москваысь ТОС тэчасса общенациональнӧй ассоциацияысь директор Захарий Юдин, Комиысь ТОС да социальнӧй тӧдчанлуна организацияясса ассоциацияӧн веськӧдлысь Дмитрий Сизев, республикаса юралысьлӧн администрацияысь меставывса асвеськӧдлан управлениеӧн юрнуӧдысь Виктор Шевцов, Комиысь муниципалитетъяс сӧвет ассоциацияса директор Юрий Болобонов, Госсӧветса депутатъяс Степан Чураков да Илья Семяшкин, «Единая Россия» партиялӧн Коми регионса юкӧнысь исполкомӧн веськӧдлысь Ольга Сычугова, экономика сӧвмӧдан, промышленносьт да транспорт министерствоысь эксперт Наталья Панкратьева.
Найӧ пасйисны, мый меставывса асвеськӧдлан тэчасыс и водзӧ кутас сӧвмыны. ТОС-лы отсалӧм могысь республикаса кар-районын котыртасны муниципальнӧй шӧринъяс, кӧні кутасны велӧдны дасьтыны проектъяс да нуӧдны йӧзӧс юӧртан удж.
–Ми кутам зільны кыпӧдны ТОС тӧдчанлунсӧ, та могысь вӧзйим нин общественнӧй асвеськӧдлан тэчасъясса председательясӧс индыны муниципалитетса веськӧдлысьлы сӧветникӧн, а регионса ассоциацияӧн юрнуӧдысьӧс – республикаса юралысьлӧн ТОС сӧвмӧдӧм кузя сӧветникӧн, – висьталіс Дмитрий Сизев.
Ошкис Комиысь ТОС уджсӧ Ульяновск обласьтысь Владимир Сидоров. Сійӧ воліс форум вылас юксьыны опытӧн.
–Тіянлы эм мыйӧн гӧрдитчыны, – шуис сійӧ. – Меным кажитчис, кыдзи Комиын йӧзыс пыдди пуктӧны чужан му историясӧ да ас войтырлысь культурасӧ, ӧд грантъясса сьӧм отсӧгӧн Луздорса сиктъясын лӧсьӧдӧма уна арт-объект.
Бур кывъясӧн висьтасьӧны чукӧртчылӧм йывсьыс и форум вылӧ воӧмаяс. Гаръинскӧйысь ТОС-ӧн веськӧдлысь Ольга Иващенколӧн кывъяс серти, татшӧм аддзысьлӧмъясыс ӧтувтӧны республикаын олысьясӧс да власьт тэчасын уджалысьясӧс.
Матысса кадӧ форумсӧ нуӧдасны тшӧтш Кулӧмдін да Емдін районъясын.
<> Гижӧдсӧ дасьтіс Павел Симпелев.
Снимокъясыс Луздор районса администрацияысь пресс-службалӧн.