Колӧ нуӧдны кыпыд рыт, сьывны йӧзкостса либӧ Сӧвет кадся хит, ворсны скӧр Карабас-Барабасӧс, наян боярин Полканӧс либӧ шань Ошкӧс, Выль во дырйи лоны Кӧдзыд пӧльӧн, гажӧдны верстьӧӧс либӧ челядьӧс, сьывны Аймулы либӧ республикаса учреждениелӧн тшупӧда паслы кып — ставсӧ вермас вӧчны Коми Республикаса енбиа заслуженнӧй артист Дмитрий Уляшев.
Тӧрыт Коми Республикаса филармонияын «Всё ещё впереди» концертӧн зарни юбилей пасйис енбиа сьылысь Дмитрий Уляшев. Юргисны Сӧвет кадся эстрада, роч йӧзкостcа да паськыда тӧдса сьыланкывъяс. Юбиляркӧд тшӧтш петкӧдчисны «Зарни ёль» да «Асъя кыа» ансамбльяс, Игорь Маткаримов, Виктория Пыстина, Валентина Ковальчук да мукӧд.
Концерт водзын ми варовитыштім Дмитрий Уляшевкӧд олӧм да творчество йылысь.
Мед гажтӧм эз босьт
–Дерт, ӧти сьылысьӧс быдса концерт кывзыны сьӧкыд. Но ме видлі вӧчны сідз, мед видзӧдысьӧс гажтӧм эз босьт. Менам репертуарӧй озыр, та вӧсна юки некымын пельӧ: Сӧвет кадся эстрада, военно-патриотическӧй, йӧзкостcа, дуэтъяс, «Зарни ёлькӧд», «Асъя кыакӧд». Меным мойвиис уджавны енбиа йӧзкӧд, – висьталӧ Дмитрий Васильевич.
–Аслым медъёна кажитчӧны патриот сьыланкывъяс, Сӧвет кадӧ быдми да. Вӧлі тӧдса ветеранъяскӧд. И «патриот» кывйыс меным абу сӧмын шуӧм, а вирӧ йиджтысьӧма. Радейта ассьым Айму, а ог сідз-тадз дулльӧн рез. И видзӧдысь тайӧс кылӧ-казялӧ. Тӧданныд, менам репертуарын дас (!) кып. Абу сӧмын Аймулы, тшӧтш и сійӧ либӧ мӧд организация-предприятиелы. Мыйлакӧ кодкӧ кӧ лӧсьӧдас котырлӧн тшупӧда пас кежлӧ кып, пыр и меным вӧзйӧны. Веськыда шуа, ме наысь мудзи нин.
–И ставыс юргас концертын?
–Сэки эськӧ ставныс пышъясны, – сералӧ сьылысь.
–Концертыс шусьӧ «Ставыс на водзын». А мый – водзын?
–Ставыс! Меным окота дыр на сьывны. Мед эськӧ формаӧс эг вошты. Ог тӧд, мый колӧ та могысь. Ӧд уналӧн водз на гӧлӧсыс оз нин томлӧн моз юргы. А кодсюрӧ ыджыд арлыдӧдз сӧдз гӧлӧсаӧсь. Кыдз, шуам, миян шонъянӧй Анатолий Смирнов. Сцена вылын петкӧдчис бӧръяӧдзыс, 73 арӧса вӧлі, а гӧлӧсыс кыдзи юргис! Меным тадзи жӧ окота.
–А кыдзи видзны гӧлӧссӧ? Эм гусятор? Эн сылысь юавлӧй?
–Гашкӧ, генъяс, либӧ бур вокал школа, асьтӧ пыр сӧвмӧдӧм… Веськыда кӧ шуны, ме эг велӧдчыв сьывны. Ме духӧвик. Сьывнысӧ велӧдчи ачым. А, гашкӧ, мыйкӧ тшӧтш и Енмыс сетӧма. Кор босьтчи сьывнысӧ, пыр вӧлі ачымӧс гижа, а сэсся кывза. Тадзи казялан, кӧні артмӧ, кӧні озджык, мый колӧ лӧсьӧдны-бурмӧдыштны.
Ывла да Пионер керка
–Кыдзи велӧдчытӧг веськавны ыджыд сцена вылӧ?! И оз сӧмын хорын сьывны, а солиставны?
–Косавлам челядьдырӧ. Ме чужи-быдми Кӧрткерӧсын. Вӧлі зэв гажа сӧветскӧй челядьдыр. Некутшӧм телефон, а ывла да Пионер керка. Ветлі пӧшти став кружокас: фото, самбо-дзюдо. Винёв детинкаӧн быдми. Самбо-дзюдо кузя республикаса ордйысьӧмын вӧлі эзысь призёрӧн. Кыдзи и став детинаыслӧн, быдторйыс вӧвлі.
Ставыс вежсис витӧд классын велӧдчигӧн. Вӧлі чеччалам стрӧйба вевтсянь да, сэті мунысь мужичӧй шуис: «Мый ті йӧйталанныд?! Локтӧй ме дорӧ Пионер керкаӧ, ме петкӧдла духӧвӧй инструментъяс». Ме и пыралі, да сэтшӧм интереснӧ лои, весиг куті ветлыны челядьлы музыка школаӧ ворсны тубаӧн. Тайӧ медся ыджыд духӧвӧй инструмент.
Ворсім демонстрацияяс дырйи, гуасигӧн (сэки кулӧмаӧс бӧръя туйӧ колльӧдлісны духӧвӧй оркестр ворсӧм улӧ). Миян оркестрын вӧлі 42 морт – опера да балет театрын ӧнія мында. Петкӧдчылім ыджыд гажъяс дырйи. Медся кыпыдсӧ помнита: республика пасьталаысь 15 духӧвӧй оркестр Коммунистическӧй улича кузя ветлім ворсӧмӧн, а сэсся Киров нима паркын ворсім ӧти и сійӧ жӧ шыладсӧ.
Кӧрткерӧсса школаын 8 класс помалӧм бӧрын мӧдӧдчи Сыктывкарӧ искусствояс училищеӧ велӧдчыны духӧвӧй инструментъяс юкӧнӧ, но мамӧй эз лэдз. Помалан пӧ 10 класс да, вӧлисти (сэки 10-ӧдӧдз на велӧдлісны).
И ме петкӧдлі ставныслы, кыдзи колӧ велӧдчыны: 9 классӧ помалі 8 (!) «дваӧн».
–Нарошнӧ?
–Да! Сы вӧсна мый менӧ эз лэдзны велӧдчыны сэні, кӧні кӧсъя. И мам шуис, мун пӧ кытчӧ кӧсъян. Ме, дерт, во вошті, но училищеӧ, кыдз шуласны, киӧн и кокӧн босьтісны. Тубаӧн ворсысьыс сэні некод абу вӧлӧма дас вит во нин. Ставныс локтӧны: валторна, труба, кларнет, саксофон. А ме – тубаӧн! Весиг ӧні Сыктывкарын тубаӧн ворсысьыс кык: опера да балет театрын да колледжын.
–И ті коймӧд…
–Ме важӧн нин ог ворс. Кӧть эськӧ кольӧм концертасян сезонӧ филармонияын петкӧдчи «Гоголь. Сюитаын», кӧні лыдди произведениесӧ и ворсі тубаӧн. Сергей Гусевлы кывсьӧма, мый коркӧ ворслі, да ышӧдіс. И ӧд 25 во мысти бара ворсі! Тӧлысь чӧж репетируйті, инструментсӧ колледжысь босьті да. Кыдз шуласны: ме на все губы мастер – и сьыла, и ворса, – шмонитӧ Дмитрий Уляшев.
А сідз ӧд и эм. Енбиа артист хорын и ӧткӧн сьылӧ, лыддьӧ верстьӧлы кывбур, челядьлы мойдӧ, ворсӧ мойдъясын, нуӧдӧ концертъяс, ачыс сэні сьылӧ. Бархат гӧлӧса артист репертуарын роч, коми, итальянеч, испанеч, француз да мукӧд кывъя сьыланкывъяс.
Абу кӧ шуӧма «гуын» ворсны
Но Дмитрий Уляшев абу дзик пыр веськалӧма филармония сцена вылӧ.
–1993 воын помалі училище да муні велӧдны Кӧрткерӧсса музыка школаӧ. Кык-куим во уджалі, а сэсся лои зэв сьӧкыд.
–Мыйла?
–Челядь сетчисны «Дендиӧн» ворсӧмӧ. Миян челядьдырйи кӧ гажыс вӧлі кружокӧ ветлӧмын да небӧг лыддьӧмын (ичӧтсянь ёна радейта лыддьысьны. Бать-мам, ичӧтджык вок вӧлі пуксям пызан сайӧ да лыддьысям. Гортын вӧлі да и ӧні эм вель уна небӧг. Мам уджаліс небӧг лавкаын да, став дефицитыс гортын вӧлі), «Дендиыд» челядьтӧ ылӧдліс, дышӧдчыны кутісны. Ме вӧлі бать-мамыскӧд сёрнита, мырдӧн корала, ачым дась вӧлі мынтысьны на пыдди, мед сӧмын ветласны кружокӧ. И тадзи вӧлі вӧча. А сэсся сьӧлышті.
Ёрткӧд пырӧдчим бизнесӧ. Восьтім лавка, кӧні вузалім быдтор: йӧвсянь линолеумӧдз. Но бара на олӧмыс сконйыштіс: йӧзыслы дугдісны сетны удждонсӧ. Лавкаӧ волысьыс чині-быри. Кодкӧ, дерт, легыштіс-кутчысис на, а миян эз артмы. Пӧдласим.
Мӧдӧдчи Сыктывкарӧ. Сэки воинскӧй часьтын вӧлі кык оркестр: ӧтиыс гарнизонын, мӧдыс – Човйын. Но сы шӧрӧ Човсьыд оркестртӧ бырӧдісны да, меным местаыс эз вичмы.
Сэсся сёрнитчылі опера да балет театрсакӧд. Но веськӧдлысьыскӧд урчитӧм кадӧ аддзысьлыны эг вермӧй. Ог нин помнит, мый торкис. Ме и сьӧлышті: сідзкӧ, абу судьба.
И сэки жӧ тӧдмалі, мый «Асъя кыа» хорӧ колӧны сьылысьяс.
–А ті кужинныд сьывнысӧ?
–Кыдзи висьтавлі, вокалистӧ эг велӧдчыв. Но училищеын на велӧдчигӧн сьылі. Сэки ӧд кутшӧм вӧлі олӧмыс студентыдлӧн? Вой шӧр кадӧ гузьгам-петам кухняӧ да ливкйӧдлам гитара улӧ. Сійӧ ӧні 11 часын отбой. Весиг армияын «тихий час» эм.
Картупель керны ветлігъясӧн сьывлам жӧ вӧлі и. Сэки нин меным шулісны, тэныд пӧ, Дима, колӧ сьывны. А ме, веськыда шуа, эг чайтлы ачымӧс сьылысьӧн. Сідз, мися, сӧмын аслым мурга…
Ме, дерт, эг думайт, мый кужа сьывны, но прослушивание вылас ветлі. И менӧ босьтісны! Эг чайт, мый татчӧ вужъяся, но со 25 во нин лэбыштіс.
–Сідзкӧ, тіянлы шулӧма абу оркестр «гуын» ворсны, а сцена вылын сьывны…
–Пӧжалуй, сідз!
Тридцать три, семна-а-адцать…
Кыдзи висьталіс Дмитрий Уляшев, сылы пыр вӧлӧма окота ӧткӧн сьывны. Гашкӧ пӧ, кодкӧ чайтӧ, мый ачымӧс петкӧдлӧм ради. Но тайӧ абу сідз. Мортыслы пӧ колӧ сӧвмыны, и эм кӧ окотаыс, сійӧ лоӧ солистӧн.
–Меным кажитчӧ сьывнысӧ. Пыр сьыла, весиг гортын. Ньӧби колана оборудование да вӧчи неыджыд студия. Ӧні суседъяс концерт вылӧ волытӧг менӧ кывзӧны. Эз на шулыны, мед ог сьыв: либӧ кажитчӧ, либӧ полӧны синмӧ висьтавнысӧ, – бара шмонитыштіс Дмитрий Васильевич.
–Войнас садьмӧдасны кӧ, став сьыланкывсӧ тӧда, а сцена вылӧ петігӧн кывъясыс пыр вунӧны…
–Ӧнӧдз майшасянныд?
–Да. И вермас лоны, пыр тадзи лоӧ. Сцена вылӧ петтӧдз – еджыд кабала, ӧти кыв он тӧд.
–А збыль кӧ вунӧдан, мый вӧчны?
–Сувтны оз позь. Коркӧ сьыланкывъяс коймӧд куплетыс вуні. И мый? Ковмис выль кывъяс думыштны да сьывны! Мый юрӧ воис, сійӧс и лӧсьӧдлі. А тайӧ вӧлі патриотическӧй правительственнӧй концерт. Залын пукаліс республикаса вӧвлӧм юралысь Вячеслав Гайзер. Сійӧ сэсся юалӧма бӧрас: «Кутшӧм тайӧ сьыланкыв, вывті уна Россия кывйыс да?». А менам Россияыс кындзи нинӧм сэсся эз рифмуйтчы да…
–Ті кывбуръяс гижанныд?
–Чӧв!.. Дзолядырйи лыддьысьӧмӧй отсалӧ. Сідз шусяна экстремальнӧй ситуацияын ог вош-джӧмды. Хорын сьылысьлы та боксянь кокньыдджык. Сэні оз казявны: вунӧ кӧ, сӧмын вӧтчы бӧрсяньыс.
Эм сэтшӧм мудеритӧм: сьыланкывъяс кӧ эн велав, колӧ мотив сертиыс лыдпасъяс сьывны: 44, 57, 88, 55, 33, 17, 25…
Вомтӧ кӧ весь восьтавны кутан, тӧдчӧ, кывъяссӧ он тӧд. А лыдпасъяс шуалӧмнад быттьӧ и сьылан.
Кӧсъян кӧ вӧсньӧдчыны – сьыв
–Дмитрий Васильевич, унаӧн век на чайтӧны, мый артисталӧмыс – абу удж.
–Коркӧ петі «Край ты мой рябиновый» сьывны. Оркестр ворсӧ, ме сулала. Вот-вот заводита… И кыла, кодкӧ залын: «Ха-ха-ха». Мися, мый бара-й лои? Сьыланкывйыс ӧд абу серамбана. Эз али мый артмы…
Сцена вылысь муні да шуа, мися, менӧ сералісны. Да зэв пӧ бура сьылін. А бӧрыннас кывсис: видзӧдысьяс пӧвстысь кодкӧ залас шуӧма, талы пӧ эськӧ гӧрны! А сійӧ сьылӧ…
Ёртӧй тшӧтш сьылысь. Мунӧма гӧтыр рӧдвужыскӧд тӧдмасьны. Дедыс пӧ и юалӧ: «Кӧні уджалан?». Сьыла пӧ. Ме пӧ сьыла жӧ, а уджалан кӧні? Сьылысь пӧ ме. А дедыд и юрнас легӧдӧма: «Мыйӧн тэ гӧтыртӧ кутан вердны?».
Унаӧн чайтӧны, мый сьылӧмыд абу удж. Но быд концерт бӧрын ме 500 грамм чинта. А сэсся лыдди ӧтуввезйысь, мый сьылӧмсьыд збыльысь вӧснялан, уна калория сотчӧ да.
«Ми кикимеритчам, а челядь зумышӧсь»
–Гастрольын уна жӧ мый овлӧ. Казьтыштанныд?
–«Добрый Новый год» программаӧн республика пасьтала ветлім торъя поездӧн. Поездыс ветліс эз мукӧдыс моз. И мед некодӧс эг торкӧй, сувтӧдлісны кытчӧкӧ вокзалсьыс бокын. Поездным сувтас, да ми лым пиӧ – бурс. Толаыс кӧнсюрӧ голяӧдз.
–Челядь водзын петкӧдчыны – збыль мастерлун колӧ…
–Дзик сідз. Кодӧн сӧмын эг вӧв Кӧдзыд пӧль кындзи. Выльвося гаж нуӧдысь и сэні жӧ сьылысь. Мойдын – Ош, Карабас-Барабас, Полкан…
Петкӧдчим Воркутаса интернатын олысь кӧр видзысьяслӧн челядь водзын. Пырим на дорӧ, а сэні жыр шӧрас чум сулалӧ, челядьыс ворсӧны лыторъясӧн. Меным сэтшӧм дивӧ кажитчис! Асьныс ичӧтик тушааӧсь, крепыдикӧсь, кизь кодьӧсь, быттьӧ абу челядь, а мужикъяс, чужӧмныс суръёзнӧй да. Мый пӧ налы и Кӧдзыд пӧльыд да Лымнылыд – веськодь. Ми на водзын кикимеритчам, гажӧдам, а найӧ сэтшӧм зумыш чужӧмаӧсь. Быттьӧ час ёсь пурт перъясны да небыдінад гусьӧн сатшкасны. Ичӧтик юр вундысьяс! Миянлы, артистъяслы, вӧлі зэв интереснӧ видзӧдны на бӧрся.
Караокеӧ оз мун, трусик кежысь оз котрав
–Ті нималана артист! Дерт, тӧдӧны улич вылын, лавкаын…
–Менам поклонницаясыд унджыкыс 60+ арлыдаӧсь. Ме таысь, дерт, ог шогсьы. Овлӧ, юаласны, кута ог петкӧдчыны сійӧ либӧ мӧд концертын. Козинъяс вайӧны. Ӧти ань пыр локтӧ дзоридзӧн да некымын кампет кӧрӧбӧн. Ме серти ӧд тӧдчӧ, мый тшыгъяла, – сералӧ Дмитрий Уляшев.
–Ёртъяс мукӧддырйиыс корасны, сьыв пӧ. Мися, дышӧдінныд нин! Ме тай тіянлы ог тшӧкты гортын машина разьны. Ме сьыла удж вылын.
Ог радейт ветлыны караокеӧ. Ог вермы кывзынысӧ, пельӧй чукыртчӧ весиг. А кодсюрӧ ӧд гӧрлӧпанитӧны быттьӧ зэв мастерӧсь. Сьылысьыдлы караокеын – пытка.
–Некор эз вӧв окота мунны татысь?
–Эз. Бурджык лоны, рочышта, «первым парнем на деревне, чем последним в городе». Менсьым юавлісны, мыйла пӧ он мун. А мыйла? Мунны колӧ 20 арӧсӧн, сэки ставыс на водзын. Но кор тэныд нелямын арӧс, тані нин ставсӧ вӧчин, мыйла чепсасьнысӧ? Выльлаад ӧд выль пӧв ставсӧ ковмас заводитны. Сэсся и ни ёртъяс, ни тӧдсаяс, ни оланін…
–Артист унатор вермӧ ворсны сцена вылын. А мый эськӧ эн вӧчӧй? Абу сы вӧсна, мый он кужӧй, а он кӧсйӧй?
–Ме ог кут трусик кежысь сцена вылын котравны, мед видзӧдысьлы вӧлі гажа. Ме ог кӧсйы! Меным оз кажитчыны ӧнія «йӧй» сьыланъяс. Академическӧй хорлы быд лӧпсӧ сьывны оз туй! Ме классика концертъяс дор, мед бӧрыннас эз вӧв яндзим сцена вылын кимӧститчӧмысь. Оз кажитчы классикасӧ ӧнія ног выльмӧдӧмыс. Классикаыд классика и эм. Сійӧ и сідз лӧсялӧ ӧнія кадыслы. И оз ков сійӧс тшыкӧдны.
Вирӧй пузьӧ ӧнія сьыланкывъясысь (позьӧ кӧ найӧс сідз шуны: текстыс ни шыладыс абу!), сьыланногсьыс. Водзынсӧ сьыланкывйыс вӧлі сюрӧса. Позьӧ быдса кино снимайтны. А ӧні мый? Весиг абу гӧгӧрвоана, мый сэні пинь пырыс шушкӧны.
Дӧзмӧдӧ и «Ну, погоди!», «Простоквашино» мультфильмъяс выльысь снимайтӧмыс. Да энӧ ті вӧрӧдӧй классикасӧ! Мӧвпыштӧй мыйкӧ мӧдтор. Кыдзи оз позь выльысь снимайтны «Кавказская пленница» либӧ «Приключения Шурика», сідз жӧ оз позь выльног сьывны «День Победы».
Самасис-ӧ чими?
–Дмитрий Васильевич, радейтанныд-ӧ кыйсьыны-вӧравны?
–Кыйсьыны – ог. Дзолядырйи на бать нуӧдліс вӧравны. Уткаыс сэки эз лэб, да лыйис рака. Меным сэтшӧм жаль лои, весиг бӧрді рака кулігас нора горӧдӧмсьыс.
А вуграсьнытӧ радейта. Кӧть эськӧ тайӧ вӧлі важӧн. Ю дорын олім-быдмим. Май помсянь август помӧдз купайтчим да вуграсим. Бать-мам некор эз повны пӧдӧмысь. Эжва юсӧ ме медводдзаысь витӧд классын вуджи. Сэки кер кылӧдісны. Варччыштам, кер вылас пуксьылам либӧ водлам шойччӧм могысь и бара юӧ бузгысям.
Шойччыны радейта вадорын, тані. Таво гожӧм мӧвпышті казьтыштны челядьдырӧс да ньӧби пыж, мотор, шатин – став эмбурсӧ. Та вылӧ гӧтырӧй шуис, видзӧм сьӧм вылас пӧ эськӧ вермим дас во чими сёйны. А, мися, удовольствиеыс?!.
–И ёна вуграсинныд? Чимиыд шедіс?
–Кутшӧм чими?! Сьӧлӧм бурмӧдӧм ради ӧд…
<> Екатерина Макарова.
Снимокъясыс Евгения Цветковалӧн.