«Демография» нацпроект весьтӧ мынтысьтӧг выль специальносьт-профессия босьтӧ Комиын 605 олысь.
Регионса удж, занятосьт да йӧзӧс социальнӧя доръян министерствоысь юӧр серти, та могысь медся уна велӧдчысьыс – 274 морт – республикаса занятосьт службаын уджтӧмалысьӧн пасйӧмаяс пӧвстысь.
–Выль тӧдӧмлун-сям босьтны шуӧмаӧсь сідзжӧ 176 ань, кодъяс быдтӧны сизим арӧсысь ичӧтджык челядьӧс да отпускалӧмӧн дӧзьӧритӧны куим арӧсӧдз дзолюкъясӧс. «Демография» нацпроект весьтӧ велӧдчысьясысь матӧ 23 прӧчентыс – ыджыд арлыдаяс, а 2%-ыс – 35 арӧсӧдз том йӧз, – висьталіс республикаса удж, занятосьт да йӧзӧс социальнӧя дорйӧм кузя министр Екатерина Грибкова.
Сійӧ юӧртіс, мый ӧні Комиын олысьяслӧн эм позянлун босьтны регионын колана специальносьтъяс кузя тӧдӧмлун-сямсӧ 98 велӧдчан программа серти. Медся унаӧн окотитӧны лоны документоведӧн, бухгалтерӧн, маркетплейс, а сідзжӧ кадръяс кузя специалистӧн.
Казьтыштам, «Демография» нацпроект весьтӧ выль специальносьт-профессия босьтны вермасны матысса воясӧ пенсия вылӧ петан арлыдаяс, 50 арӧсаяс да олӧмаджыкъяс, кагаӧс куим арӧс тыртӧдзыс отпускалӧмӧн дӧзьӧритысь аньяс да сизим арӧсӧдз челядьнысӧ быдтысь-воспитайтысь нывбабаяс, а сідзжӧ 35 арӧсӧдз том йӧз, занятосьт службаын пасйысьӧм-гижӧдчӧм уджтӧмалысьяс да кодъяс матысса кадӧ вермасны воштыны уджсӧ.
–Таво тулыссяньыс шуӧма дон босьттӧг велӧдны и спецоперацияын участвуйтысьясӧс да СВО-ын пӧгибнитӧм военнослужащӧйяслӧн семьяясысь матыссаяссӧ. Велӧдчӧм бӧрас найӧс удж вылӧ босьтысьяслы шуӧма вичмӧдны государствосянь отсӧг – первой, коймӧд да квайтӧд тӧлысь мысти Россияса Социальнӧй фондсянь тӧлысся медічӧт удждон мында субсидия, – висьталіс Екатерина Грибкова.
Татшӧм кокньӧдсӧ босьтӧм могысь предприятие-организация-котырӧн веськӧдлысьяслы колӧ юӧртны «Работа в России» порталын «Личнӧй кабинет» пыр занятосьт шӧринӧ, кутшӧм специалистъяс колӧны налы, да «Соцстрах» система пыр шыӧдчыны, мед субсидия босьтӧм могысь реестрӧ пыртасны.
Та кузя унджык юӧр позьӧ тӧдмавны занятосьт шӧринын. «Демография» нацпроект весьтӧ велӧдчӧм могысь колӧ шыӧдчыны «Работа в России» порталӧ.
<> Гижӧдсӧ дасьтіс Александра Артеева.
Снимокыс ӧтуввезйысь.