Комиын квайтӧд во збыльмӧдсьӧны Россияса президентӧн вынсьӧдӧм национальнӧй проектъяс, на лыдын «Дзоньвидзалун», код весьтӧ шуӧма сӧвмӧдны республикаса кар-районын олысьяслы сідз шусяна первичнӧй медико-санитарнӧй отсӧг сетӧм.
Тайӧ уджтас сертиыс урчитӧма ӧнія кадся тшупӧдӧ вайӧдны фельдшерско-акушерскӧй пунктъяс, врач амбулаторияяс, кар-районса поликлиникаяс, кытчӧ медвойдӧр шыӧдчӧны йӧзыс, кор висьӧм-дой найӧс топӧдӧ.
«Дзоньвидзалун» нацпроект весьтӧ республикаса дас куим районын кыпӧдӧма да уджалӧны медицина отсӧг сетан кызь куим мобильнӧй комплекс, ньӧбӧма татшӧм жӧ маммографъяс, флюорографъяс, ФАП-яс, мыйӧн районса шӧр больничаясысь врач бригадаяс ветлывлӧны ылі сикт-грездӧ сетны сэні олысьяслы медико-санитарнӧй отсӧг, а сідзжӧ нуӧдны медосмотр да диспансеризация.
Бюджетысь вель уна сьӧм видзӧма выль ФАП-яс стрӧитӧм вылӧ, кӧні ставсӧ артыштӧма, медым кивыв вӧлі фельдшеръяслы сетны на дорӧ шыӧдчысьяслы колана отсӧг.
Республикаын кыпӧдӧма дас ӧкмыс татшӧм бурдӧдчанін. Уджалӧны нин найӧ Кӧрткерӧс районса Важкуаын, Нёбдінын да Вомынын, Эжва йывса Донын, Джеджимын, Мылдінын да Пожӧгдінын, Изьва районса Діюрын, Вертепын, Сизябын да Бакурын, Емдін районса Ильяшорын, Сыктывдінса Нювчимын, Сыктывса Бӧртӧмын, Усинск районса Колваын да Сосногорск районса Ираёльын. Таво лицензия босьтӧмаӧсь Кӧрткерӧс районса Визябӧжын да Ыджыдвиддзын ФАП-яс. Нӧшта ӧти фельдшерско-акушерскӧй пункт кыпӧдӧма Изьва районса Кыдзкар сиктын.
–Республикаса правительстволӧн медтӧдчана могъясысь ӧти – вӧчны став коланасӧ, медым сикт-грездын олысьяс вермисны шыӧдчыны отсӧгла асланыс овмӧдчӧминса медучреждениеӧ. И мед сэні вӧлі та могысь ӧнія кадся выль да бур оборудование-аппаратура-техника. И воысь-во кутам стрӧитны унджык татшӧм бурдӧдчанін. Таво Комиын кыпалӧ нин модуля 22 ФАП да врачьяслы кык амбулатория, – висьталіс регионса правительствоӧн веськӧдлысьӧс вежысь Лариса Карачёва.
<> Гижӧдсӧ дасьтіс Александра Артеева.
Снимокъясыс ӧтуввезйысь.