Украинаын торъя военнӧй операция дырйи Комиысь куимӧн лоисны Россияса Геройясӧн. Тайӧ Чилимдін районса Мӧскашор сиктысь гвардияса капитан Владимир Николаевич Носов, сэні жӧ чужлӧм гвардияса подполковник Иван Владимирович Поздеев, Удора районса Чим посёлокысь ефрейтор Александр Александрович Власенков.
Чилимдін районса администрациялӧн шуӧм серти Мӧскашорысь кадет школалы вӧлі сетӧма Россияса Герой В.Н. Носовлысь ним.
Декабрь 9 лунӧ, кор ми нимӧдам Россияса Геройясӧс, школаас восьтісны Владимир Николаевич Носовӧс казьтылан пӧв, сылӧн бюст дорӧ пуктісны дзоридзьяс. Митинг дырйи сёрнитісны Чилимдін районӧн юрнуӧдысь Николай Канев, йӧзӧс велӧдан регионса министерствоӧн веськӧдлысьӧс вежысь Александр Пасечник, районса военком Олег Носов, 28-ӧд Невельскӧй дивизияса ветеранъяс рӧдвужлӧн сӧветысь кывкутысь секретар Сергей Таскаев. Найӧ пасйисны, мый школалы Геройлысь нимсӧ сетӧмыс ышӧдас быдмысь войтырӧс радейтны Айму да олӧмсӧ жалиттӧг дорйыны сійӧс.
– Менам пиӧй олӧмсӧ сетіс лӧг петана вӧрӧгкӧд тышкасигӧн. Мед жӧ некор некод оз ырыштчы миян Чужан му вылӧ! – висьталіс Геройлӧн мам Надежда Владимировна Носова.
Казьтылан пӧв восьтӧм бӧрын вӧлі «Реквием Герою» концерт. Сійӧс дасьтӧмаӧсь школаса военрук, хорунжий Алексей Тирановлӧн веськӧдлӧм улын. Кадетъяс да налӧн педагогъяс тӧдмӧдісны Владимир Николаевич Носовлӧн олан туйӧн: Рязаньын В.Ф.Маргелов нима воздушно-десантнӧй училищеын велӧдчӧмнас, Калининград обласьтса Балтийск карын Россияса Вооружённӧй вынъясын службанас. Концертсӧ сигӧртіс бард Ольга Дубова. Сылӧн сьыланкывйын медся мӧрччанаӧсь лоины «Медаль Героя России – святая высшая проба, медаль Героя России – звезда, омытая кровью» кывъяс.
Ассьыс Геройяссӧ нимӧдысь-ыдждӧдлысь войтырӧс некод оз вермы! Збыльысь сідзи и эм. <>
Сергей ВЛАДИМИРОВ.
Авторлӧн снимокъяс вылын: кадет школаын казьтылан пӧв восьтігӧн Геройлӧн мам-батьыс – Надежда Владимировна да Николай Иванович Носовъяс. Геройлӧн гу вылӧ дзоридзьяс пуктӧны В.Н.Носовлӧн Николай Иванович батьыс да Сергей Таскаев.