Коми Республикаса госслужба академияын июнь 27 — июль 1 лунъясӧ муніс вузъяскостса «Ворлдскиллс» медводдза чемпионат.
Чемпионат котыртысьнас вӧлі ачыс академия, и буретш сэтчӧс студентъяс медводдзаясӧн пырӧдчисны вузъяскостса тайӧ ордйысьӧмас. Нёль лун чӧж томулов петкӧдлісны тӧдӧмлун-сямсӧ «Реклама» да «Предпринимательство» юкӧнъясын.
—Зэв нимкодь, мый буретш миян велӧдчанін лоис татшӧм ыджыд да тӧдчана чемпионат нуӧдӧмын медводдзаяс лыдын, — пасйис Коми Республикаса госслужба академияын ректорлысь удж вӧчысь Сергей Ткачёв. — «Ворлдскиллс» сетӧ позянлун томуловлы оз сӧмын петкӧдлыны сямлунсӧ, но и водзӧ сӧвмӧдны да ёнмӧдны подув тӧдӧмлунъяссӧ, мӧвпыштны водзӧ вылӧ олӧмас колана нырвизь бӧрйӧм йылысь.
Чемпионат водзвылын сэтчӧ 15 пырӧдчысь ныв-зон медводз тӧдмасисны подув тӧдӧмлунъясӧн реклама да ас вылӧ уджалӧм кузя нырвизьясын: тайӧ маркетинг, соцсеть-сайтъяс сӧвмӧдӧм, проектъяс дасьтӧм-гижӧм да уна мукӧдтор.
«Реклама» нырвизьын ордйысисны вит студент, быдӧнлы ас кежас коліс котыртны реклама компания. «Предпринимательство» юкӧнын нин сямсӧ петкӧдлісны кык морта вит команда. Налы коліс гижны-дасьтыны тырвыйӧ дась да стӧч бизнес-план. А медбӧрын тӧдмӧдны уджтаснас презентация отсӧгӧн. Быд нырвизьын томуловлы отсасисны экспертъяс.
Колӧ пасйыны, студентъяслы ёна воис сьӧлӧм вылас тайӧ чемпионатыс, ӧд сы мында выль тӧдӧмлун босьтісны, а тшӧтш и ассьыныс вынсӧ видлісны.
И сідз, вузъяскостса чемпионатын «Реклама» юкӧнын медводдза местасӧ шедӧдіс Юлия Першина, мӧдӧн лои Ассоль Истомина, коймӧдӧн лои Родион Демин.
«Предпринимательство» юкӧнын кык первой местасӧ юкисны кык команда: Эвелина Лавит, Алина Шпенглер да Анастасия Лобкова, Анаста
сия Михеева.
Коймӧдсӧ босьтісны Кристина Волобуева да Светлана Колесникова.
* * *
Коми йӧзӧдчан керка «Ворлдскиллс» медводдза чемпионатын петкӧдчис партнёръяс пӧвстысь ӧтиӧн да козьналіс коймӧд места босьтысь Родион Деминлы «Лок_татчӧ» коллекцияа козин-бокс.
Чолӧмалам чемпионатӧ став пырӧдчысьсӧ, сиам водзӧ вылӧ уна на вермӧм-шедӧдӧм! <>
Галина МАКАРОВА.