Талун шондіа, а аскинас зэрӧ. Гожӧм нин торкӧдчӧ, а ывлаын усьӧ лым. Татшӧм со таво миян войвылын май тӧлысьыс.
Бӧръяысьсӧ татшӧмыс вӧлӧма 2018 воын. Поводдяыс ёна дурӧма и 2002 воын. Сэки дзик нин гожся шоныд бӧрын май 20 лунсянь виччысьтӧг кӧдздӧдӧма 1-3 градусӧдз, лымъялӧма да 22 сантиметра толаыс абу сылӧма вежон кымын.
Коми ЦГМС-ын гидрометеорология прогноз дасьтан юкӧнӧн веськӧдлысь Ольга Козак серти, повны колӧ оз майся, а июнься лымйысь, кор быдмӧ-сӧвмӧ град выв пуктас. Поводдяыс тадзи дурӧма 1983 вося июнь 22-23 лунъясӧ.
–А майын усьӧм лымйыд абу нин дивӧ. Со и таво миян войвыв поводдяным петкӧдліс ассьыс этшсӧ. Май 23 лунся асылӧ Сыктывкарын лымйыс вӧлі 13 сантиметр джуджда. Таысь мыжа Лунвыв Уралсянь воӧм циклон, – висьталӧ Ольга Козак. – Но мӧд лунас нин циклоныс слабмис. Шоныдыс воӧ Урал сайысь, медводз войвыв районъясӧ, а сэсся и лунвылӧ. Май тӧлысся бӧръя шойччан лунъясӧ шондӧдас 16-21 градусӧдз.
Кутшӧм лоас таво гожӧмыс? Ольга Фёдоровна серти, июльын да августын поводдяыс лоӧ нормалы матыс, а вот июньыс, кыдзи виччысьӧны гидрометшӧринын зільысьяс, нимкодьӧдас миянӧс шоныд гожся лунъясӧн. <>
Екатерина МИКУШЕВА. Снимокыс авторлӧн.