Кольӧм во И.А.Куратов нима гуманитарно-педагогическӧй колледж пасйис восьтӧмсяньыс 100 во. Тайӧ каднас, быдса нэм чӧж, тані велӧдчӧны республика пасьталаысь том йӧз.
Талун И.А.Куратов нима педколледж – Коми Республикаын инновационнӧй велӧдчанінъясысь ӧти. Тані студентъяслы вӧчӧма ставсӧ, медым вермисны босьтны зумыд тӧдӧмлун, кужисны петкӧдлыны творчествоа сямсӧ да сӧвмыны быд боксянь.
Асланыс кывкутана удж да велӧдчӧм йылысь, да и абу сӧмын, висьталӧны педколледжын зільысьяс да тӧдӧмлун босьтысьяс.
– Школа помалӧм бӧрын кӧсйи пырны И.А. Куратов нима педколледжӧ, но артмис сідз, мый помалі Сыктывкарса университет да лои роч да коми кыв велӧдысьӧн. Сэксянь колис кызь во, и зэв нимкодь, мый ӧні уджала буретш И.А. Куратов нима педколледжын. Студентъяскӧд дасьтам театральнӧй сценкаяс, быдсикас петкӧдчӧм, тшӧтш и сьылам-йӧктам. Торйӧн нин нимкодь, кор миян ныв-зон вермӧны уна сикас конкурсын. Шуам, Лариса Мартюшева шедӧдліс «Райда» ним карса конкурсын. Миян велӧдчысьяс зэв шаньӧсь, енбиаӧсь да, рочӧн кӧ, креативнӧйӧсь. Быдӧн аслыспӧлӧс, и миян мог – отсавны налы водзӧ олӧмас.
Радейтана велӧдчанінлы сиа водзмӧстчысь да бур студентьясӧс, медым найӧ и водзӧ вермасны уна сикас конкурсын. А нӧшта ставлы бур дзоньвидзалун, – висьталӧ Ольга Данилович, студентъяслӧн производственнӧй практика юкӧнӧн веськӧдлысь, педколледжса «Искра» педотрядӧн юрнуӧдысь.
И.А. Куратов нима педколледжын бура сӧвмӧма студентъяслӧн ӧтмунӧм. Шуам, 60 сайӧ во нин зільӧ «Искра» педотряд. Коми Республикаын татшӧмсӧ котыртлӧмаӧсь медводдзаяс лыдын. Сылӧн мог – дасьтыны-велӧдны челядьлӧн шойччан-ёнмӧдчан лагерын уджалысь вожатӧйясӧс. Та могысь тані тырвыйӧ восьтӧны велӧдчысьлысь творчествоа сямсӧ, а ӧтув удж-гаж нуӧдігӧн студентъяс топыдджыка заводитӧны ёртасьны.
Ыджыд удж нуӧдӧны ныв-зонмӧс Коми му, кыв да культура радейтны ышӧдӧм могысь. Енбиа да тӧлка велӧдысьӧн лоас сійӧ, коді радейтӧ ассьыс чужан мусӧ. Та могысь 1993 воын колледжас котыртӧмаӧсь национально-культурнӧй шӧрин, кӧні ныв-зонмӧс тӧдмӧдӧны уна сикас войтырлӧн культура-традицияӧн. Велӧдчысьяс озырмӧдӧны тӧдӧмлуннысӧ коми культура, литература, история, краеведение, этнография нырвизьясын.
–Педколледжкӧд йитчӧма менам олӧмын ыджыд юкӧн. Велӧдчи сэні 1995-1998 воясӧ, лои ичӧт классъяс велӧдысьӧн, содтӧд босьті хормейстерлысь специальносьт. Колледжын студенталігӧн на Кулӧмдінса землячествоӧн юрнуӧді. Тшӧкыда сэки петкӧдчылім сцена вылын: сьылім-йӧктім, гудӧкасим да пуктім важся традицияяс серти сценкаяс.
17-ӧд во нин уджала педколледжын национально-культурнӧй шӧринын содтӧд тӧдӧмлун сетысьӧн. Нуӧда студентъяскӧд коми кыв, история, обряд да традицияяскӧд йитчӧм конкурс-фестивальяс, рытпукъяс, а нӧшта воспитательнӧй удж кузя практика. Велӧда ныв-зонмӧс гижны сценарийяс да нуӧдны школаын класснӧй час, а нӧшта котырта коми культура кузя мастер-классъяс да вожатӧйяслы практика. Та могысь майын вежон чӧж олам челядьлӧн гожся лагерын моз: сьыліын пионеръяслӧн гӧрд галстукӧн нуӧдам линейкаяс, ворcам, сьылам, йӧктам, ветлам походӧ да с.в. Тайӧ кадыс миян колледжын торйӧн нин гажа.
Сиа миян велӧдчанінлы водзӧ сӧвмыны, видзны ассьыс нэмӧвӧйся традицияяс, да мед татчӧ и водзӧ локтасны велӧдчыны зіль, енбиа да зумыд тӧдӧмлун босьтны зільысь студентъяс! – бурас лача кутӧ Ольга Рогожникова.
Студенталан кадыд – медгажа. Выль ёртъяс, выль тӧдӧмлун… Быд во педколледжын босьтӧны тӧдӧм-лун оз сӧмын миян республикаысь, но и суйӧр сайысь ныв-зон. Но век жӧ унджыкыс – коми сикт-грездысь локтӧмаяс.
– Кольӧм во пыри Сыктывкарса гуманитарно-педагогическӧй колледжӧ. Ичӧтсянь окота вӧлі лоны велӧдысьӧн да, со и вои татчӧ. Бӧрйи «Коррекционная педагогика в начальном образовании» специальносьт. Олам-велӧдчам ӧтсӧгласӧн да ёртасьӧмӧн, – висьталӧ Татьяна Латкина.
Педколледжлӧн логотипын серпасалӧма парус да пыж – водзӧ мунӧм-сӧвмӧм, повтӧмлун да кӧленаяс костын топыд йитӧд петкӧдлан пас.
– Сідзкӧ, восьлалам водзӧ – выль тӧдӧмлунъяслань! – кыпыд руӧн видзӧдӧны аскиа лунӧ том йӧз.
* * *
Колледжлӧн историяыс пансьӧма 1921 вося ноябрь 14 лунӧ, кор Усть-Сысольскын восьтӧмаӧсь педагогическӧй техникум, медым кыпӧдны республикаын олысьяслысь тӧдӧмлунсӧ. Тайӧ кадсяньыс Комиын дасьтӧны сиктса да карса школа-детсадйын велӧдысьясӧс. 1932 воын нин педтехникумас вӧлӧма подготовительнӧй, школьнӧй, школаӧдзса да заочнӧй юкӧнъяс.
1940 вося январь 19 лунӧ велӧдчаніныслы сетӧма коми литературалы подув пуктысь Иван Куратовлысь ним. Вочасӧн колледж сӧвмис-паськаліс, босьтчисны сэні велӧдны том йӧзӧс выль специальносьтъясӧ. Быд во сійӧс помалӧны енбиа ныв-зон, кодъяс водзӧ сӧвмӧдӧны тӧдӧмлун-сямсӧ, нимӧдӧны республиканымӧс. На лыдын и мир пасьтала нималана спортсменъяс Раиса Сметанина, Николай Бажуков, Василий Рочев (батьыс), Василий Рочев (пиыс).
Екатерина Микушева.