Ставӧн, буракӧ, коркӧ видзӧдлім Джеки Чан йылысь фильмъяс, нимкодясим сылӧн вын-сямӧн. Со нималана актёр чеччыштіс, горӧдіс «Киа!» да ки-кокнас и пӧв жугӧдіс, а сэсся стен писькӧдіс да вӧрӧгӧс уськӧдіс-веніс…
Кольӧм вежонӧ кутшӧмакӧ Джеки Чанъясӧн вӧлім и ми, «Коми йӧзӧдчан керкаын» уджалысьяс. Тхэквондоысь мастер-класс дырйи нималана спортсмен Анатолий Чиканчи велӧдіс миянӧс дорйысьны да татшӧм ногӧн тшӧтш ышӧдіс выль вын-эбӧсӧн босьтчыны уджӧ.
Директорнымлы, Инесса Орёллы, урок помланьыс мойвиис кокнас чорыд пӧв пусь-пасьвартны, и таысь сылы козьналісны еджыд рӧма вӧнь…
Кольӧм четвергся асылыс «Коми йӧзӧдчан керкаын» уджалысьяслӧн заводитчис… тхэквондоысь мастер-классянь. Анатолий Чиканчи нима боевӧй искус-ство школаын зільысьяс корисны миянӧс, коми газет-журналысь нывъясӧс, велӧдчыны, кыдзи колӧ водзсасьны, кодкӧ кӧ уськӧдчас на вылӧ.
Уроксӧ нуӧдіс тхэквондоысь мирса ӧкмысысь чемпион Анатолий Чиканчи. Медводз сійӧ петкӧдліс тайӧ спортас бертчанногсӧ: кытчӧ да ёна-ӧ колӧ кучкыны-вартны да кыдзи видзчысьны-саймовтчыны кодлӧнкӧ чорыд кабырысь.
–Кор, шуам, паныд веськалӧны ён мужичӧй да вӧсньыдик ань, нывбабалӧн эбӧсыс кык пӧв содӧ да, сійӧ вермас венны вынаджыксӧ, – юксис тӧдӧмлуннас спортсмен. – Колӧ стӧча тӧдны, кытчӧ вачкыны: веськалан кӧ тшӧкаас, вӧрӧгыд сӧмын неуна вӧрзьыштас, а пель дорас кӧ швачкан – некымын секунд кежлӧ садьсӧ воштас.
Тренировка шӧрланьыс ми кыкысь-куимысь вартӧмӧн видлім гымӧдны боксёръяслысь груша.
Ӧта-мӧдкӧд тай эг жӧ тышкасьӧй-а, кӧть торъя сідз шусяна техникаяс и видлім ёрта-ёрт вылын.
Чайтім, мый тайӧ лоӧ кокньыдик мастер-класс, а збыльвылас залсьыс ставӧн петім пӧсялӧмаӧсь да мудзӧмаӧсь.
–Тайӧ вӧлі зэв интереснӧ! – пасйис «Коми му» газетса корректор Вероника Габова. – Но татшӧм спортыс меным оз лӧсяв. Ачым рам да, тышкасьны-водзсасьны ньӧти абу окота.
–Сьӧлӧмкылӧмтӧ колӧ кужны петкӧдны да петкӧдлыны. Кор сійӧ пуӧ-жуӧны, оз позь кутны пытшкӧсад. И тхэквондо таын ёна отсалӧ! – висьталіс «Коми йӧзӧдчан керкаса» директор Инесса Орёл. – Чайта да, тайӧ мастер-класс бӧрас коми газет-журналнымӧс водзӧ кутам лэдзны выль вын-эбӧсӧн!
Ирина ТЕРЕНТЬЕВА.