Печораса «Досуг» культура шӧрин котыртӧма #историялюбви11 хэштег улын «ВКонтактеын» Семья лунлы сиӧм конкурс.
«Коми му» газетлӧн талунъя номерын йӧзӧдам конкурсӧ пырӧдчысьяслысь кык гижӧд.
Ӧпрӧсь да Яков
Менам Ӧпрӧсь ыджыд мамӧй да Яков ыджыд батьӧй чужлӧмаӧсь Кӧрткерӧс районса Лаборӧм грездын. Коркӧ ыджыд мам висьтавлiс меным татшӧм вӧвлӧмтор.
Яков бурлачитiгас ас коддьӧм ныв-зонъяскӧд вӧлӧм гуляйтӧ. Коркӧ бабӧлӧн керка весьттi мунiгас потшӧс вомӧныс чеччыштӧма, матыстчӧма ныв дорӧ да шуӧма:
–Ӧпрӧсь, аски тэ дорӧ корасьны локта!
–Ме дiнӧ? Со Ӧдя чойӧс корав, а ме том на, – вочавидзӧма зонлы бабӧ. Сэки сылы 17 арӧс на вӧлӧма. А Яков пӧ сiдзжӧ потшӧс вомӧныс бӧр чеччыштiс да нывъясӧс сывйыштӧмӧн водзӧ мунiс.
Мӧд лунас Яковыд збыльысь локтӧма корасьны. Сiйӧ комсомолечӧн вӧлӧма да шуӧма, вичкоад пӧ ог мунӧй, сельсӧветын гижсям. А ыджыд мамлӧн батьыс та вылӧ вочавидзӧма, мый вичкоын венчайтчытӧг нывсӧ верӧс саяд оз сет. Яковлы ёна нин любӧ Ӧпрӧсьыд вӧлӧма да, кӧсйысяс венчайтчыны, но ассяньыс вӧзъяс, мунам пӧ весь лунӧ, мед йӧзыс этшаджык вӧлi. А вичкоад том гозъя вылӧ видзӧдлыны унаӧн чукӧртчӧмаӧсь. Сэки Яков, медым кыдзкӧ торкны венчайтчан обрядсӧ, босьтӧма сисьсӧ бинас увлань да весиг чунь йывъяссӧ сотӧма…
Олӧмаӧсь Яков да Ӧпрӧсь ӧтув 52 во. Чужтылӧмаӧсь дас челядьӧс. Квайтыс быдмӧмаӧсь-верстяммӧмаӧсь да козьналӧмаӧсь бать-мамыслы найӧс бабӧн да дедӧн 16 шуысьӧс. Уна сьӧкыдлун венӧмаӧсь Ӧпрӧсь да Яков: и Эжва йывсянь Печора вожӧ воӧмаӧсь, и комынӧд воясӧ выль местаын колхоз кыпӧдӧмаӧсь, и войнадырся сьӧкыд кадсӧ ас вывтіныс нуӧмаӧсь да выль мирнӧй олӧм тэчӧмаӧсь. Яков да Ӧпрӧсь вӧлӧ-маӧсь шуда гозъя, радейтӧмаӧсь да жалитӧмаӧсь ӧта-мӧднысӧ.
Евдокия Пыстина,
Яковлӧн да Ӧпрӧсьлӧн внучка.
Екатерина да Егор
Ті тӧданныд, кутшӧм сійӧ, збыльвывса муслуныс? Верӧскӧд тӧдмасьтӧдзыс ме та йылысь эг тӧд.
Миян муслунлӧн историяыс заводитчис 2010 вося сентябрь 1 лунӧ. Сэки ми, университетын асланым группаысь ныв-зон, тӧдмасим ӧта-мӧдкӧд. Лӧз синма да еджыд кудриа зон чеччис места вывсьыс да висьтасис: «Менӧ шуӧны Егор Герасимович Логинов». Ме дзик пыр думышті, мый татшӧм овыд меным лӧсялас.
Первойсӧ Егор менӧ быттьӧ эз казяв, но вочасӧн кутім сёрнитны, шмонитны да волысьны. Медводдзаысь ми окыштчим студентъяслысь гаж пасйигӧн 2011 вося ноябрь 11 лунӧ (11.11.2011). Чайтанныд, та бӧрын ми заводитім мусукасьны? Эгӧ. Мӧд лунас меным мыйлакӧ лоис зэв яндзим да, куті пышъявны-дзебсясьны зонмысь. Но ӧтлаын велӧдчигад тайӧ эз ёна артмы.
2012 вося май 9 лунӧ Егор корис менӧ лоны сылӧн муса нылӧн. Ме сеті сӧглас. А гожӧмнас локті сы дорӧ Печораӧ, тӧдмаси бать-мамыскӧд. Ог тӧд, кыдзи менӧ аслам бать-мамӧй лэдзисны…
Артмӧ, верӧслӧн рӧдвужкӧд ми 9 во нин тӧдсаӧсь.
Егоркӧд ми ӧтлаын велӧдчим, дасьтысим экзаменъяс кежлӧ, шойччим, ветлім челядьлӧн гожся лагерӧ вожатӧявны… Ставсӧ ӧтвылысь вӧчим.
Университет помалӧм бӧрын Егор муніс Печораӧ, а ме – велӧдчыны пӧварӧ, аслам специальносьт серти зільны эг кӧсйы да. Сэсся мусукӧс босьтісны армияӧ. Тайӧ вонас зэв уна уджалі, медым гажтӧмавнысӧ кадыс эз вӧв. Мойвиис и Мурманск обласьтса Гаджиевоӧ, Егорлӧн служитанінӧ, ветлыны.
Егорлӧн армияысь воӧм бӧрас ме локті овны Печораӧ. Тадзи и заводитчис ӧтувъя олӧмным. Ми ӧтвылысь мунім и би, и ва, и ремонт вӧчӧм пыр. Тадзи овнысӧ, вӧлӧм, зэв интереснӧ! Ми быд боксянь тӧдмалім ӧта-мӧднымӧс.
2017 вося июньын, помнита, вои Сыктывкарысь да аддзи, мый мусукӧй гортын пӧльтӧма уна-уна шар. Думышті, мися, со ӧд кутшӧм рад, мый ме гортӧ вои. Но ставыс нӧшта на бурджык вӧлі – Егор ас вӧчӧм чунькытшӧн корис менӧ петны верӧс сайӧ. Дерт, ме вочавидзи «Да!».
Во мысти, 2018 вося июнь 9 лунӧ, ми лоим Логиновъяслӧн шуда семьяӧн. Загсын акт номерным – 100!
Екатерина Логинова.
Снимокъясыс авторъяслӧн.