Сыктывдін районса Парчӧгын олысьяс видео пыр шыӧдчӧмаӧсь Россияса президент дорӧ, медым лӧсьӧдасны-дзоньталасны грездсянь Зеленечӧдз туй.
Парчегсалӧн висьталӧм серти, тайӧ абу нин медводдза шыӧдчӧм. Кык во сайын Зеленеч сиктса депутат Владимир Королёв да Вилядьса старӧста Александр Напалков видео пыр юӧртӧмаӧсь, кутшӧм шогмытӧм туйӧд лоӧ ветлыны йӧзыслы. Туйсӧ пӧ пасьвартӧны гырысь техникаӧн, оравлытӧг новлӧдлӧны лыа да. Весиг пӧ ӧлӧдан пасъяс оз падмӧдны.
–Туйнас нин сійӧс оз позь шуны, кузяла гырысь гуран, быттьӧ война кадӧ бомбитӧмаӧсь. И таті колӧ быд лун ветлыны, и оз сӧмын верстьӧлы, а тшӧтш и челядьӧс школаӧ новлӧдлыны. Таті жӧ колӧ мунны и «Гренада» лагерӧ. Полігтырйи, неминучаысь видзчысигмоз туй бокӧдыс вӧляникысь руньгам. Дыр-ӧ колӧ виччысьны дзоньталӧмсӧ, уна во кӧ нин корам? – элясьӧны сиктсаяс.
Шогмытӧм туй йылысь сиктсаяс юӧртлӧмаӧсь и ставроссияса «Народнӧй фронтӧ». Общественникъяс рейдӧ петалӧм бӧрын шыӧдчӧмаӧсь Сыктывдін районса администрацияӧ (тайӧ туйыс сылӧн дӧзьӧр улын), медым лӧсьӧдасны. Пасйӧмаӧсь сійӧс «Пасьмунӧм туйяс картаӧ». Сэки общественникъяслы чинаяс вочавидзӧмаӧсь, мый капитальнӧя дзоньтасьӧм вылӧ районса кудйын сьӧмыс абу. Та йылысь ОНФ-са юӧртӧмаӧсь ГИБДД-ӧ, шыӧдчӧмаӧсь ёрдӧ. Судын вӧчӧмаӧсь туй дзоньталӧм кузя кыв-кӧртӧдсӧ, но…
Кык во сайын артыштлӧмаӧсь да, туйсӧ капитальнӧя дзоньталӧм вылӧ колӧ вӧлӧм 50 миллион шайт.
Тавося апрель помын стрӧитчан да жилищно-коммунальнӧй овмӧс министерствоӧн веськӧдлысьӧс вежысь Эдуард Слабиков да Сыктывдін районса администрацияын уджалысьяс аддзысьлӧмаӧсь Зеленечын, Парчӧгын да Час сиктын олысьяскӧд. Шуӧмаӧсь котыртны торъя комиссия, медым туявны пасьмунӧминъяссӧ да артыштны, уна-ӧ ковмас дзоньтасьӧм вылӧ сьӧмыс. Майын тайӧ уджсӧ вӧчӧмаӧсь. Комиссияыс дасьтӧма колана кабалаяс. Медся шогмытӧминъяссӧ шыльӧдӧм-мольӧдӧм вылӧ пӧ колӧ 31 миллион сайӧ шайт. Ӧні республикаса минстрой корсьӧ тайӧ сьӧмсӧ.