Ті коркӧ казявлінныд, мый эмӧсь сэтшӧм сьыланкывъяс, кодъяс быттьӧ йиджӧны сьӧлӧмад, дыр кежлӧ кольӧны паметяд? Окота кывзыны найӧс дугдывтӧг. Кажитчӧ, мый бура гӧгӧрвоан сьыланкывлысь вежӧртассӧ, весиг сэк, кор кывыс тӧдтӧм. Шылад ышӧдӧ мортӧс уна бур тор вылӧ. Тайӧ петасын окота тӧдмӧдны лыддьысьысьясӧс Помӧсдінысь енбиа том морт Николай Горбачкӧд. Сійӧ вуджӧдӧ радейтана сьыланкывъяссӧ англия кывсянь коми вылӧ да сьылӧ найӧс гитара улӧ.
— Николай, корсянь тэнад сьӧлӧмад ыпнитіс музыка да творчество дорӧ муслун?
— Стӧча ог вермы шуны. Школаын велӧдчигӧн кывзі ставсӧ, мый кажитчис, жанр да стиль вылӧ видзӧдтӧг. Бӧрынджык, кор чужан лун кежлӧ бать-мамӧй козьналісны гитара, заводиті ворсны да сьывны кажитчана сьыланкывъяссӧ. Мӧд инструментсӧ, кодӧн ӧнӧдз на ворса, ньӧби ачым нин. Ӧні кызвыннас кывза англия сьыланкывъяс. Гашкӧ, та вӧсна и заводиті найӧс вуджӧдны да сьывны роч да коми кыв вылын.
— Гитара кындзи кутшӧм шылада инструментӧн нӧшта кужан ворсны?
— Радейта ворсны укулелеӧн. Тайӧ гитара сяма инструмент, но нёль струнаа. Шыладыс кыпыд, небыд. А гавайскӧй кывсянь “укулеле” вуджӧдсьӧ зэв тешкодя – “чеччалысь пытш”. Неважӧн сідзжӧ ньӧби аслым синтезатор да ньӧжйӧник велӧдча сы вылын ворсны. Но кадӧй ӧні оз тырмы, занимайтчыны артмӧ гежӧда. Та вӧсна синтезатор пырджык бусӧссьӧ общежитиеын.
— Уна-ӧ сьыланкыв вуджӧдін нин?
— Медшӧрнас лыддя кыкӧс. Тайӧ “Twenty One Pіlots” группалӧн “Tear іn My Heart” (“Тэ дой менам сьӧлӧмын”) сьыланкыв да “Half the world away”, кодӧс сьылӧ “Oasіs” котыр. Эм на ӧткымын вуджӧдӧм, но, веськыда кӧ шуны, найӧ эз ёна бура артмыны.
«Тэ дой менам сьӧлӧмын» зэв мича юргӧ, да и текстыс бур, сьӧлӧмтӧ вӧрзьӧдӧ. Тайӧ сьыланкывнас петкӧдчи кык во сайын «Койташын». Гитараысь кык струна убериті да мӧд ногӧн настроиті, быттьӧ укулелеӧн ворсі. Англия кывсянь вуджӧдны текстсӧ роч вылӧ кокниа артмис, а медым комиӧдны, ковмис мырсьыштны. Ыджыд аттьӧ кӧсъя шуны Ксения Кармановалы, сійӧ меным ёна отсаліс. Мӧд сьыланкывсӧ — “Half the world away” – дасьті каверъяслӧн «Поющие голоса» онлайн конкурс кежлӧ.
— Шылад – тайӧ хобби. А шӧр уджыд тэнад кутшӧм?
– Ме велӧдча СГУын магистратураын, зіля биология институтын (ИБ ФИЦ Коми НЦ Уро РАН). Удж кузя тшӧкыда ветлӧдла Печора-Ылыдзса заповедникӧ да татшӧмсяма инъясӧ, бӧръя торф мусинлысь сикасъяс да туяла голоцен кадӧ вӧвлӧм пӧжаръяслысь история. Шуам, кор водзмӧстча кутшӧмкӧ туялан удж вылын да колӧ вӧчны неыджыд шойччӧг, радейта босьтны киӧ гитара да ворсыштны. Тайӧ отсалӧ ӧдйӧ вуджны ӧтиторсянь мӧд вылӧ. Пандемия кадӧ, кор ковмис пукавны нёль стен пытшкын, радейтана гитараӧй ёна гажӧдіс. Менам олӧмын музыка ӧтпырйӧ и сьӧлӧм долӧдан тор, и сійӧ, мыйтӧг овны ог нин вермы.
– Кутшӧм сӧвет верман сетны миян лыддьысьысьяслы, кодъяс окотитӧны вуджӧдны кажитчана сьыланкывсӧ коми кыв вылӧ? Мыйсянь заводитны?
– Медводз колӧ англия кывсянь вуджӧдны текстсӧ роч вылӧ сідз, медым шӧр вежӧртасыс эз вош. Бӧрти колана рифма бӧрйӧмӧн вуджӧдны нин рочсянь коми вылӧ. Сэк жӧ юргӧмыс да шӧр мӧвпыс сьыланкывлӧн медым эз вежсьыны. Уджыс абу кокньыд, но зэв интереснӧй!
Антонина Микушева
Снимокъясыс Николай Горбачлӧн