Изьва районса Ластаын олысьяс майшасьӧны, мый вермасны кольны бурдӧдчанінтӧг. 130 во сайын кыпӧдлӧм сісь нин стрӧйбаыс регыд дзикӧдз киссяс. Та йылысь юӧр «ВКонтакте» лист бокын йӧзӧдӧма Людмила Филиппова.
–Ӧні сиктын 300 сайӧ олысь, на пиысь 50-ыс – челядь. Бурдӧдчыны найӧ волывлӧны сісь пу больничаӧ. Тӧвнас стрӧйбаас зэв кӧдзыд, тӧв шутьлялӧ. Абу дивӧ, дӧмлы кӧть эн стенсьыс розьяссӧ, шоныдсӧ оз кут. Ӧшиньясыс потласьӧмаӧсь жӧ. Уджалысьяслы колӧ ломтыны пач, ваявны юкмӧсысь ва. Асмогасяніныс улич вылын. Таво ёна кӧдзыд дырйи жыръясас шоныдыс сӧмын 3 градус вӧлӧма. Электрообогревательӧн эськӧ шонтысьӧны жӧ, но температураыс оз лыб. А ӧд татшӧм «кӧзӧдас» колӧ бурдӧдны йӧзӧс, дзоньвидзалунсӧ видлавны и пузчужӧмаяслысь, – висьталӧ Людмила Филиппова.
Ластасалӧн кывъяс серти, Изьва районын тайӧ ФАП-ыс медся важъяс лыдын. 1891 воын кыпӧдлӧм стрӧйбаыс подувсяньыс и вевтсяньыс сісьмӧма. Стенмыс сісьысла киссьӧ-дрӧ-битчӧ жӧ.
Майшӧдлӧ грездсаӧс, мый и татшӧм больничатӧг регыд колясны. А орчча сиктыс ю сайын. Транспорт оз ветлы. Ковмас кӧ медицина отсӧг, воӧдчыны лоӧ вӧлӧн да пыжӧн. А сідзкӧ, позьӧ-ӧ надейтчыны бурдӧдчӧм вылӧ?
Майшасьӧны ластаса и сы вӧсна, мый матысса кадӧ сиктас оз кӧсйыны кыпӧдны выль бурдӧдчанінсӧ.
Колӧ пасйыны, мый Людмила Филипповалысь Ластаын олысьяс вӧсна дойсӧ казялӧмаӧсь Коми Республикаса дзоньвидзалун видзан министерствоын. Вочакывйын такӧдӧмаӧсь, мый кыпӧдасны выль ФАП.
Ведомствосянь юӧртӧмаӧсь: Изьва районын шогмытӧмӧн шуӧма 13 бурдӧдчанін. Урчитӧма, кӧні да кор кыпӧдасны выльӧс. Ластасалысь элясьӧмсӧ тӧд вылӧ босьтӧмӧн 2021 воын шуӧмаӧсь шогмытӧмӧн и татчӧс больничасӧ. А сідзкӧ, вежыштасны «Модернизации первичного звена здравоохранения» регионса уджтассӧ, медым водзджык (2022-2023 воясӧ) стрӧитны Ластаын выль ФАП-сӧ.
Дзоньвидзалун видзан министерствоын пасйӧны, мый Ластаын бурдӧдчанін кыпӧдӧм вылӧ ковмас 18,5 миллион шайт. Но тайӧ пӧ абу на стӧч лыдпас.
Изьва районса администрация урчитӧма нин выль бурдӧдчанінлы инсӧ: Расвыв уличаса 11-ӧд номера керка.
Екатерина МАКАРОВА.