Быдöнлы гöгöрвоана, мый колö тöдны ас семьялысь, чужанінлысь история. Тайö тöдöмлуныс отсалö мортлы зумыда сулавны кок йылын да повтöг видзöдны аскиа лунö. Ыджыд Вермöмлöн тшупöда пас — нöшта öти помка босьтчыны туявны ордпу. Тайö лист бокын юöрыс лоас коланаöн сылы, кодлы окота тöдны ас семьялысь историясö.
Айму вöсна Ыджыд тышса ветераныс воысь-во чинö-бырö. Эм на кö семьяын ветеран, позьö сёрнитны сыкöд. Абу нин кö некод, сы йылысь юöр-казьтылöмъясöн вермасны юксьыны матыссаясыс. Позьö шыöдчывны олöма йöз дорö, кодъяс тöдлісны ветеранöс да вермасны висьтавны сылöн война вылö ветлöм либö кутшöмкö лоöмтор йылысь.
Войнакöд йитчöм уна документ (фронтсянь письмö, снимокъяс, награда кабала, боевöй характеристика, война вылын усьöм йылысь юöр да мукöд) эмöсь Коми Республикаса Национальнöй архивысь фондъясын na.rkomі.ru лист бокын.
Война кад йылысь уна гижöд йöзöдлöма районса да республикаса газетъясын. Листавны важ петасъяс позьö Коми Республикаса национальнöй библиотекалöн nbrkomі.ru лист бокын. Лыддьысян жырйö либö краеведение юкöнö шыöдчигöн сэт-чöс уджалысьяс отсаласны корсьны колана юöрсö.
Айму вöсна Ыджыд тышса ветеранъяс, войнадырся лоöмторъяс йылысь юöр сідзжö позьö аддзыны öтуввезйысь.
Некымын сайт йылысь паськыдджыка:
memorybook-rk.ru Коми Республикаса Паметь небöглöн лист бок. Ветеран йылысь пасйöдын позьö аддзыны ним, вич, ов, чужан во да ин, звание да мукöдтор. Тані жö йöзöдöма Сöветскöй Союзса Геройяслысь биографияяс, кодъяслöн олöмыс йитчöма Коми Республикакöд, фотогалерея, казьтылана инъяс да мукöдтор.
obd-memorіal.ru «Мемориаллöн» сайтын чукöртöма Айму вöсна Ыджыд тыш воясö да сёрöнджык пöгибнитöм да юöртöг вошöм салдатъяс йылысь юöр.
pamyat-naroda.ru «Память народа» лист бокысь юöрсö позьö корсьны некымын нырвизь серти: «Боевые операции», «Воинские части», «Документы частей», «Воинские захоронения» да мукöд.
podvіg-naroda.ru «Подвиг народа» банк — документъяс электроннöя видзанін, кöні позьö аддзыны награда кабала, приказъяс, на серти нин позьö тöдмавны, кутшöм подвигысь салдатлы сетісны медаль либö орден.
rf-poіsk.ru Вöвлöм тыш мунанінъ-ясын пыр уджалöны поискöвикъяс. Найö корсьöны Айму вöсна Ыджыд тышын пöгибнитöмаяслысь нимъяс. «Поисковое движение России» сайтын эм «Имена из солдатских медальонов» лист бок. Сэні чукöртöма юöртöг вошöм матö 20.000 салдатлысь да офицерлысь биография.
Военнослужащöй олöмкöд йитчöм либö дзебан ин йылысь юöрла позьö шыöдчыны РФ-са оборона министерстволöн медшöр архивö. Кыдзи дасьтыны сэтчö анкета-шыöдчöмсö, гö-гöрвоöдöны archіve.mіl.ru лист бокын.
Колö пасйыны, быд сайтын индöма, кыдзи бурджыка корсьны Айму вöсна Ыджыд тышса ветеран йылысь колана юöрсö. Оз кö артмы, колö тöдмасьны правилöясöн, видлыны корсьны мöд ногöн. Тшöкыда овлö, война кадся документъясын ним-вич-овсö либö чужан кадсö гижöма сорсьöмöн, шыпас воштöмöн. Сöмын колана ногöн да бура кор-сьысигöн уджыс артмас.
А кутшöм юöр колö чукöртны ветеранлысь олöмсö туялігöн? Медводз индыны:
- ним, вич, ов;
- чужан кад да ин;
- оланін, уджсикас, уджалан нырвизь;
- призыв кадö семья йылысь юöр (гöтыр, челядь);
- кор да кысянь муніс служба вылö (военкоматлöн корöм али ас кöсйöм серти);
- кутшöм воинскöй часьтын (подразделенньö, полк, дивизия) служитіс;
- боевöй туй (кадколаст, сикт-грезд-кар, аслыспöлöслун);
- фронт вывсянь письмö-фотосö колö: сканируйтны; индыны, коді фото вылас, кöні да кор вöчöма снимоксö; медым нинöм оз вош, документъяссö позьö сетны музейö;
- тöдчана казьтылöмъяс (высота босьтöм, ю форсируйтöм, пленö веськалöм);
- фронтысь локтöм либö пöгибнитöм (во, уволитчан приказ либö лун, кор салдат пöгибнитöма, юöртöг вошöма);
- наградаяс (кор, кутшöм подвигысь сетöма, номер, фото);
- война бöрын олöм (уджсикас, семья).
Кыдзи чукöртны юöрсö?
Ветеран йылысь колана юöр аддзöм могысь колö водзвыв сёрнитчыны рöдвужыскöд либö олöма йöзкöд, индыны кад да ин. Аскöд босьтны диктофон, ручка, тетрадь, фотоаппарат, запас вылö батарейка, а сідзжö позьö вöдитчыны сканерöн да ноутбукöн. Чукöртöм юöрсö матысса кадö колö печатайтны, быть ко-лö пасйыны интервьюерлысь ним, вич, ов да гижан кад. Та кындзи позьö вöчны фотографияа презентация.
Архивысь, газет-журналысь, электроннöй запросысь чукöртöм гижöд-снимокöн позьö вöдитчыны аслыд, тшöтш и конференцияяс кежлö дасьтысигöн. Шуам, велöдчысьяслöн «Отечество — Земля Коми» быдвося республикаса конференция кежлö лöсьöдчигöн — www.komiturcenter.ru/page/i839/
Владислав Каракчиев,
Коми наука шöринысь История, кыв да литература институтын зільысь.