Бара чукöртчим ыджыд пызан сайö… Юам чöскыд чай, сёрнитам грездса олöм-вылöм йылысь. Тайö керкаыс меным пыр рад: шонтас, вердас, пöсь тшайöн юктöдас. Кöзяйкаыс прабабöй – Евдокия Алексеевна Артеева. Керкаыс абу ыджыд, но кымынöн кöть оз локны, ставныс век тöрöны.
Быд во Öдуш баб (тадзи велалöмаöсь шуны бабсö став внукыс да правнукыс) Айму вöсна Ыджыд тышын Вермöм лун кежлö мыччöдö прадедлöн медальяса неыджыд гöрд юрлöс. Ичöтдырйи ме вöлi видзöда медальяс вылас да думайта: «Кытысь пöрысь баблы та мында зарниыс да мыйла найöс юрлöсö пысалöма? Гашкö, мед оз вошны?». Бöрын нин гöгöрвои, мый зарни рöма медальясыс быдсяма дона изсьыс на донаджыкöсь, öд зэв сьöкыда найö шедöмаöсь.
Таво бабö кыскöма жö нин медальяссö…
Михаил Кузьмич Артеев – менам прадед. 1940 воö Изьва районса ичöтик Ёль грездысь армияö мунöмаöсь 4 том зон. Служитiгас весьшöрö кадсö абу воштылöмаöсь, велöдчöмаöсь устав серти. 1941 вося лöддза-номъя тöлысь 22 лунö асывнас командирныс висьталöма лёк юöр: вошйöма война.
Июнь 23 лунö нин катеръясöн Суйда ю кузя найöс мöдöдöмаöсь враглöн тылö. Фашистъяс шöтöмаöсь миномётъясысь да артиллериялöн биöн, тыш чöжыс на дорö пыр воöмаöсь содтöд вынъяс, но – ставыс весьшöрö. Немечьяс воштöмаöсь уна салдатöс да офицерöс. Прадедлöн полкыс дас вит лун да вой абу сетöма вöрöглы вöлясö, абу лэдзöма налы писькöдчыны Мурмансклань.
Война туйыс прадедлöн вöлöма кузь – Мурмансксянь Финляндия пыр Норвегияöдз. Войвыв мездöм бöрын сiйö сюрöма II Белорусскöй фронт вылö. 1945 вося апрель 1 лунö Польшаса Гданьск кар дорын прадедöй нёльöдысь сьöкыда ранитчöма – осколокöн орöдöма шуйга кисö. Победа лунсö сiйö вочаалöма госпитальö туйын.
Гортас Михаил Кузьмич Артеев локтöма 1945 вося августын. Мамыс вочаалöма сiйöс синваöн да висьталöма, Илья да Василий вокъясыд пö усьöмаöсь война вылын, а Тарас да Степан доймалöмöн воисны.
Прадедлöн нёль медаль: кык «За отвагу», «За оборону Заполярья», «За победу над Германией». Öнi медальяс вылö видзöдiгöн юрö воöны нин дзик мöд думъяс: «Эз тай öти вир войт усь му вылö, эз тай öти юрси сi еджды Чужан мунымöс дорйигöн. Оз öти семья öнöдз на синвасö кисьты сьöлöмтöм войнаöн вöчöм ыджыд дой вöсна…».
Война бöрас Михаил Кузьмич Артеев уджалöма Изьва сиктын начкысянiнса веськöдлысьöн. 1950 воö Евдокия Алексеевнакöд лöсьöдöмаöсь семья. 1957 воö вуджöмаöсь овны Кулим сиктö. Быдтöмаöсь 8 челядьöс – квайт нылöс да кык пиöс. Радпырысь век виччысьлöмаöсь внук-внучкасö: бабö чöсмöдлöма вöсни шаньгаöн да калиткаöн, а дедö ылöдлывлöма теша сёрниясöн. Öнi налöн 17 внук да 27 правнук нин. Öтув олöмаöсь 42 во. Дедö вöлöма зэв бур верöсöн, айöн, дедöн, некор абу пукавлöма уджтöг. Кöть öтар киыс и абу вöлöма, вöчалöма пыж, кыйöма чери, зэв бура ворсöма гудöкöн.
Прадедöй кувсьöма 1992 вося апрель 3 лунö. Уна во нин сiйö оз пукав миянкöд тайö ыджыд пызан саяс. Гажтöмтчам сыысь… Но рöдвуж пиысь бы-дöн помнитö да тöдö, мый миян семьяын вöлi ге-рой – повтöм, вына, уджач да бур сьöлöма морт!
Эвилина Филиппова,
Коми Республикаса юралысь бердын
искусство гимназияын 10-öд классын велöдчысь.