Татьяна да Сергей Токарчук Кӧрткерӧс районса Баяркерӧсын мазі вӧдитӧны 16 во нин.
2021 воын ёна отсалӧма «Агростартап» грант. А нӧшта кык во мысти агротуризм сӧвмӧдӧм могысь вичмӧма федеральнӧй грант. Тӧдсаяс пӧ тшӧкыда волывлісны мала да узьмӧдчылісны. Мукӧдысьсӧ пӧ кольччывлісны и лун-мӧд кежлӧ. Орччӧн – Лӧкчим ю, видз да парма-яг. Го-жӧмнас позьӧ гожйӧдчыны, купайтчыны, вуграсьны да чукӧртны тшак-вотӧс. Тӧвнас – иславны лызьӧн, даддьӧн да конькиӧн.
Олан керка йӧрас сулалӧны улейяс. Сергей да Татьяна чӧсмӧдлӧны волысьясӧс маӧн, прополисӧн, пергаӧн да маысь вӧчӧм вӧлӧгаӧн. Но таысь ӧтдор пывсянын позьӧ мавтчыны маӧн, вӧчны массаж да корӧсясьны.
Медся ёна чуймӧдӧны апикеркаяс. Татшӧмыс тані кык. Мойдса Ёмалӧн кодьӧсь, вужля кок вылынӧсь. Пытшкас чӧскыд дука тьӧскысь кык узьланін, а на улын – малязі позъяс. Дзизгысьясысь мортсӧ торйӧдӧны сӧмын плакаяс. Водан пӧ вольпасяс, кунян синтӧ да быттьӧ веськалан дзоридза видз вылӧ. Орччӧн дзизгӧны мазіяс, насянь ӧвтӧ ма дукӧн. Час пӧ и ныровмунлан, а быттьӧкӧ войбыд сургин-узин. И петан апикеркасьыс югыд юрӧн да томмӧмаӧн.
Токарчукъяслӧн куим пасека. Кыксӧ новлӧдлӧны парма-ягті, кӧні дзоридзалӧ уна сикас быдмӧг. А коймӧдыс, медічӧтыс, – Баяркерӧсын. Бӧръяас видзӧны-рӧдмӧдӧны бакфаст да карника пӧрӧдаа шаньджык да мелі малязі.
Грант весьтӧ кыпӧдӧмаӧсь пывсян, гӧсьтъяслы керка, маа ингаляция жыр да мукӧдтор. Колӧ на пӧ лӧсьӧдны апипывсян, нюжӧдны би. Кӧсйӧны пуысь вӧчӧм звер-пӧткаӧс «овмӧдны» челядьлы ворсан площадкаӧ.
Малязіысь ӧтдор Токарчукъяс вӧдитӧны кӧза. Гӧсьтъяс пӧ вермасны велӧдчыны лысьтыны йӧв, вӧчны сыр. Кӧза йӧлыс зэв бура лӧсялӧ и челядьлы, и верстьӧлы, и олӧма войтырлы.
–Кӧсъям восьтыны пачын шаньга пӧжалан мастер-класс. Дум-кӧсйӧмыс уна, мӧдам водзӧ паськӧдчыны-сӧвмыны, – юксис аслас мӧвпъясӧн Татьяна Токарчук.
<> Николай Размыслов. Снимокъясыс ӧтуввезйысь.