Коми Республикаса вужвойтырлӧн шылада-драмаа театр сентябрь 10-19 лунъясӧ пырӧдчас «Белая Вежа» войтыркостса театральнӧй фестивальӧ, кодӧс таво нуӧдӧны комынӧдысь нин Белоруссияса Брест карын. Миян артистъяс петкӧдласны Александр Твардовскийлӧн «Василий Тёркин» поэма серти татшӧм жӧ нима спектакль.
Казьтыштам, вужвойтырлӧн шылада-драмаа театрын «Василий Тёркин» спектакль дасьтӧма оперетта-сьыланкыв жанрын Анатолий Новиков композиторлӧн шылад вылӧ да Пётр Градовлӧн либретто серти. Комиӧдіс Анжелика Елфимова, а режиссёрыс Россияса культураын да искусствоын нималана уджалысь, Калмыкияса Б.Басангов нима национальнӧй драмтеатрын художествоа веськӧдлысь Борис Манджиев.
–Поэмаын петкӧдлӧма роч салдатӧс, коді и смел, и шмонитысь, и вежавидзысь да бур сьӧлӧма. Тёркин ставлы гӧгӧрвоана, сы вӧсна мый сійӧ прӧстӧй морт. Йӧзыс сійӧс радейтӧны, сы вӧсна мый сыын аддзӧны асьнысӧ, рӧдвужсӧ, матыссаяссӧ, ёртъяссӧ. Роч мортлӧн лолыс сэтшӧм, мый быд сьӧкыдлун колӧ венны, быд «лэчкысь» мынтӧдчыны нинӧм вылӧ видзӧдтӧг. Пасъя, мый миянлысь «Василий Тёркинӧс» пасйисны дипломӧн «Золотая Маска» Россияса национальнӧй театральнӧй премияын, – висьталіс вужвойтырлӧн шылада-драмаа театрӧн веськӧдлысь Валентина Судакова.
Колӧ пасйыны, вужвойтырлӧн шылада-драмаа театр оз нин медводдзаысь петкӧдчы Беларусьын. «Белая Вежа» фестивальын петкӧдлісны Светлана Горчаковалӧн пьеса серти «Ясӧвӧй» шылада драма. А 2024 воын Николай Лесков серти «Шуйгун» шылада теш лоис вермысьӧн «Лучший спектакль театра драмы» нимпасын.
Кыдзи висьталісны театрын, таво фестиваль афишаӧ экспертъяс пыртӧмаӧсь мирса 11 странаысь котыръяс: Азербайджанысь, Арменияысь, Белоруссияысь, Болгарияысь, Грузияысь, Казахстанысь, Китайысь, Кыргызстанысь, Монголияысь, Россияысь, Узбекистанысь. Программаын комын ӧти театрлӧн 31 спектакль. Жанр серти кӧ, и драма, шылада, экспериментальнӧй, акань театр постановка, балет, Уцзюй опера, а сідзжӧ уличаса петкӧдчӧмъяс.
«Белая Вежа» театральнӧй фестиваль, кодӧс нуӧдӧны Беларусьын, важӧн лои нималана да тӧдчана традицияӧн искусствоын. Могыс – петкӧдлыны и татчӧс, и суйӧрсайса театральнӧй искусстволысь став палитрасӧ, а сідзжӧ кыдзи театр котыръяс видзӧны йӧзкост традицияяс. Комын воӧн Брестын 770 спектакльӧн петкӧдчис 60-ысь унджык страна, а сідзкӧ «Белая Вежа» зэв колана да тӧдчана уджтас Беларусьын.
<> Гижӧдсӧ дасьтіс Екатерина Макарова.