Комиын уджалысьясӧс пайкӧмаӧсь 150 миллион шайт дон. Татшӧм лыдпас йӧзӧдісны сентябрь 16 лунӧ республикаса юралысьлӧн Общественнӧй приёмнӧйын «веськыд йитӧда» телефон пыр сёрни нуӧдігӧн. Коми Республикаса Росреестрлӧн управлениеысь, удж кузя государственнӧй инспекцияысь, удж, занятосьт да йӧзӧс социальнӧя доръян министерствоысь специалистъяс вочавидзисны звӧнитысьяслы, кытчӧ колӧ шыӧдчыны, уджӧн могмӧдысь кӧ торкӧ оланпас да оз ас кадӧ мынты удждон.
Кыдз юӧртіс удж, занятосьт да йӧзӧс социальнӧя доръян министерствоысь главнӧй специалист-эксперт Татьяна Шулуванова, налӧн ведомствоын ӧні торйӧн видлалӧны удждон кузя уджйӧз йылысь 36 делӧ. На пиысь 70 сайӧ прӧчентыс йитчӧма банкрот выйӧдз воӧм предприятиеяскӧд.
–Татшӧмъясыслысь зэв сьӧкыд косӧдны удждон кузя уджйӧзсӧ, – висьталіс Татьяна Николаевна. –
Ӧти-кӧ, банкроталӧмыс вермас нюжавны дыр кад. Мӧд-кӧ, уджйӧзсӧ мынтӧм кузя урчитӧма ӧчеред. Предприятиеыслӧн кӧ эм сьӧмтор, медводз вештысясны судлы банкроталӧм кузя делӧсӧ нуӧдӧмысь, сэсся – арбитражса веськӧдлысьлы да налы, кодъясӧс сійӧ босьтіс аслыс отсасьны. И сӧмын та бӧрын босьтасны тӧд вылӧ уджалысьясӧс, кодъяслы абу мынтӧмаӧсь удждонсӧ. Предприятиеыслӧн сьӧмкудйыс кӧ тыртӧм да эмбурсӧ иналӧмысь сэтчӧ воис войт мында, зэв вермас лоны, мый йӧзлы удждон кузя уджйӧзсӧ нинӧмӧн лоӧ вештыны да найӧ дьӧбӧ колясны.
Коми Республикаса Росреестрлӧн управлениеӧн веськӧдлысьӧс вежысь Елена Галикаевалӧн висьталӧм серти, на дорӧ таво шыӧдчылӧма ӧкмыс морт, кодъяслы банкроталӧм предприятие абу мынтӧма нажӧткасӧ. Норасьӧмъяссӧ видлалігӧн тыдовтчӧма, мый кык арбитражнӧй управляющӧй асланыс уджын торкалӧмаӧсь оланпас. Та понда ӧтисӧ кыскӧмаӧсь административнӧй кывкутӧмӧ – перйӧмаӧсь 25 сюрс шайт штрап.
–Во чӧжӧн миян дорӧ шыӧдчыліс 400 гӧгӧр морт, кодъясӧс мыйӧнкӧ пайкӧмаӧсь удж вылас, – содтіс удж кузя государственнӧй инспекцияысь веськӧдлысьӧс вежысь Павел Муравьёв. – Талун кежлӧ ми вӧчим кывкӧртӧд 289 шыӧдчӧм кузя. Сэні сёрниыс абу сӧмын удждон йылысь. Торкалӧны йӧзлысь правосӧ и отпускӧ петіганыс, и уна сикас пособие-компенсация мынтігӧн да с.в.
Тавося кӧкъямыс тӧлысьӧн уджӧн могмӧдысьяс бергӧдӧмаӧсь 7,5 сюрс мортлы пайкылӧм сьӧмсӧ 100 миллион шайт. Сэк жӧ йӧзлы уджйӧзыс «ӧшалӧ» на 150 миллион шайт. Кӧнсюрӧ та боксянь лыдпасыс абу нин сэтшӧм повзьӧдлана. Сідз, Печораысь «Техник» ООО-ын кык уджалысьлы абу мынтӧмаӧсь 300 сюрс шайт.
Мисьтӧмджык серпасыс Сыктывдін районса Выльгорт сиктысь «Парма ПЭВ» ООО-ын, коді удж-йӧза котырас зільысьяслы 14 миллион шайт. Талун предприятиеыс оз уджав, став эмбурыс закладын, кӧртымӧ сетӧм стрӧйбаясысь немтор жӧ оз во. Кад кежлӧ индӧм веськӧдлысь корсьӧ петан туй. Октябрын чукӧртчыласны кредиторъяс да Росреестрса специалистъяскӧд ӧтув вӧчасны кывкӧртӧд, вичмас-ӧ сьӧм сувтӧдны кок йылас уджйӧзӧ вӧйӧм предприятиесӧ али ковмас сійӧс банкротавны.
Елена Галикаева лыддьӧ, мый «Парма ПЭВ» ООО-ӧн веськӧдлысьяс тӧдӧмӧн вӧчӧмаӧсь ставсӧ, медым найӧс банкроталісны. Фирмаыс уналаысь удждӧма кызьсянь сё миллион шайтӧдз.
Елена Канифовна гӧгӧрвоӧдіс, мый «О несостоятельности» федеральнӧй оланпасысь 142-ӧд статья серти предприятиеяслы кивыв банкротасьнысӧ. Ӧд сылысь став удж-йӧзсӧ киритасны. И, артмӧ, тӧрытъя банкрот вермас босьтчыны выль бизнесӧ. Оланпас серти кӧ татшӧмыслы аслыс оз позь тайӧс вӧчны, сійӧ ас пыддиыс вермас индыны кодӧскӧ мӧдӧс.
Николай Размыслов.