Кольӧм вежалунӧ Коми Республикаса филармонияын вӧлі «От Севера до Юга» аслыспӧлӧс яръюгыд концерт. Сизьдісны Адыгеяысь «Нальмэс» ансамбль да миян «Асъя кыа».
Тавося тулысӧ тайӧ жӧ концертсӧ петкӧдлӧмаӧсь Майкопын да Краснодарын. Сэки лунвылӧ ветлӧмаӧсь миян артистъяс, а ӧні Адыгеяысь «пӧсь вира» артистъяс гажӧдісны сыктывкарсаӧс национальнӧй йӧктӧмъясӧн.
Сцена вылӧ медводз петісны «Асъя кыаса» «Тулыс» хореография постановкаӧн. Сэсся сцена вылӧ чепӧсйисны «Нальмэс» ансамбльысь артистъяс «Моя Адыгея» петкӧдчӧмӧн. Дерт, лунвывсалӧн йӧктӧмыс торъялӧ войвывсаысь. Кызвыныс вӧлі кок чунь йылын. Артистъяс сэтшӧм пелькӧсь, кокнас быттьӧ муас оз и инмӧдчывны. Мужичӧйяс «бордсӧ» шевкнитӧмӧн (пельпом вылас шлапкӧмаӧсь вурунысь вӧчӧм сьӧд бурка) «лэбалісны» быттьӧ сьӧд варышъяс. Сэтшӧм ярӧсь, синныс кодзлалӧ, сотыштасны на видзӧдласнас. А аньяс рамӧсь, кывзысьысьӧсь, статяӧсь, тшапӧсь, юсьяс моз мужи-чӧйяс гӧгӧр шлывъялісны.
Сцена вылын кык сикас войтырлысь концертсӧ позьӧ шуны ордйысьӧмӧн. Ордйысисны мастерлуннас, пельклуннас, яръюгыдлуннас. Артмис йӧзкостса йӧктӧмъясысь аслыспӧлӧс микс. Часӧн-джынйӧна концертыс сэтшӧм ӧдйӧ помасис. Залын пукалысьяс весиг шогӧ усины. Окота вӧлі кӧть асылӧдзыс видзӧдны.
«Нальмэс» адыг кыв вылысь вуджӧдсьӧ кыдз алмаз. Тайӧ государственнӧй ансамбльсӧ лӧсьӧдӧмаӧсь 1936 воын. Кольӧм каднас ансамбльлӧн кудйӧ чукӧрмӧма уна аслыспӧлӧс да яръюгыд сьылан-йӧктан петкӧдчӧм. Абу сӧмын чужан Адыгеяса, тшӧтш и суйӧрсайса мукӧд йӧктӧмъяс. Дерт, сыктывкарсалы мойвиис аддзывны сӧмын некымынӧс, но кутшӧмӧс!
Петкӧдчӧ «Нальмэс» мир пасьтала. Сыктывкарын найӧ медводдзаысь на. Кыдзи пасйис ансамбльӧн веськӧдлысьыс Аслан Хаджаев, ӧткымын артист чайтӧмаӧсь, мый тундраӧ мунӧны, а веськалӧмаӧсь мича войвыв карӧ.
–Зэв нимкодь, мый сэтшӧм пӧся вочаалінныд. Пасъя, тадзи жӧ «Асъя кыаӧс» примитісны тулыснас Майкопын, – аттьӧаліс видзӧдысьясӧс Аслан Хаджаев.
* * *
Казьтыштам, «Нальмэс» – Кавказысь абу нин медводдза котыр, коді воліс Комиӧ. Филармонияса сцена вылын петкӧдчылісны нин «Лезгинка» да «Кабардинка». А декабрын лоӧ Удмуртияысь «Италмас» ансамблькӧд ӧтувъя концерт.
Екатерина МАКАРОВА.